【仙氣崩壞】身邊有幾多麻甩女？　睇睇女同事有冇𠵱5大特徵……

同事三分親，女神同事更教人想親多兩親。但其實不少好眉好貌的女同事，遠看似女神，近睇先知是麻甩女！下列5大麻甩特徵，看看有沒有說中你身邊的「職安女漢子」吧。

1. 着裙掰大脾坐

不少麻甩系女子都有隱藏特性，表面上薄施脂粉，外形大方得體，然而一坐低，雙腿霸氣一掰，麻甩味即時濃濃散發。你問同事「唔怕走光咩？」，麻甩系一句「秒殺」：「鬼睇你咩！」除了無懼走光，麻甩系亦非常注重身體健康，不難發現久不久她們就會「un腳」促進血液循環。你禮貌提示：「咪un啦，唔好睇呀！」，麻甩系回敬：「瘦腿呀嘛！」

2. 流利粗口

有指再斯文的女仔，出社會工作幾年都會變得爛口。雖然你不知你的麻甩同事前塵有幾坎坷，但句句以「鵰」行頭兼夾雜對波士高堂熱情問候的說話，你大概可想像麻甩系之育成，應和多年的風霜打滾有關。

3. 大牌檔忠實fans

白天不懂夜的黑，就如綠茶系女子不懂大牌檔美食的奧義。只要跟過一次麻甩同事食飯，你就會發現不論外表打扮得再精緻，平日喜歡gel甲也好，名牌包包也好，一到食飯時間，一顆麻甩的心就掩飾不來。見斯文同事穿梭佬味食堂如入無人之境，你便知道大牌檔才是麻甩同事的歸宿。

4. 永遠混亂的枱面

「不要叫姐執枱，姐返工是用腦的」，這大概就是麻甩系女生的內心獨白。愈混亂愈快樂，亂中有序無礙我創意爆發；亦不要奢望麻甩系同事枱頭會有粉紅色的擺設、少女figure，因為麻甩系絕對是實事求事的實務派。

5. 唔驚小強

麻甩系同事頭髮長長，樣子斯文，打扮女性化，但她們多半不怕小昆蟲。當一眾男女同事為米粒大小的蟑螂大呼小叫搞得一室驚惶之際，麻甩系女生早已拿出Tempo一手包走「小強」，拯救全office於水深火熱之中，事後也不張揚邀功，默默退隱。

如果你身邊也有這種麻甩女同事，請好好珍惜，因為她一定不會lunch time嚷着要食貴價東西令你傷荷包，性格也多半是直腸直肚的爽快之人，可以放心相交。