【社區小小事】曾經是「石塘咀小姐」專用　香港僅存手造檀香扇

酷熱天氣，香港鬧市翳焗難當，走在街上一會兒已汗流浹背，年輕男女都手執電動「芭蕉扇」，試圖吹散悶熱。潮流興復古，手執一把古色古香的檀香扇，又會否是現代文青的另類選擇？過去，手造檀香扇行業在香港盛極一時，但時至今日，碩果僅存的檀香扇店，或者只剩油麻地的祥盛檀香扇莊。老闆更指，現時全港以至廣東一帶已沒再生產檀香扇，而他店中的存貨，亦將會「賣完就冇」：「冇數過，唔知仲有幾多，都係賣多幾年。多人買嘅，咪會快啲冇晒囉。」

近年檀香和沉香大受追捧，坊間認為其天然香氣有助寧神安心。1958年開業的祥盛檀香扇莊，屹立油麻地上海街50年，做扇之餘也有做香。店舖第二代掌舵人羅業強(羅老闆)指，他與太太從外國回流後，眼見父親年紀漸大，決定接手生意，「老竇以前喺國內，咩都冇咁落到嚟香港，投靠咗親戚，個親戚就造檀香扇嘅，就開始咗所謂嘅學師啦，過程當然係好辛苦......做下做下佢自己儲咗啲錢，就開自己嘅工場仔，做下多啲做下多啲，去到我呢代，唔想浪費咗佢，咪盡量做囉。」

檀香扇會發出幽香，與只是後期沾上香水的膺品不同，真品即使存放多年，仍能保持香氣四溢，撥扇時清風伴上香氣襲來，心靜之餘亦有辟暑之感。羅老闆指，過去檀香扇也不是家家戶戶有得用，只有中產階層的文人雅士，或者是風情萬種的「石塘咀小姐」才會使用。檀香扇看似離地，但基層家庭都不感陌生，「有啲工序都好似以前嘅『穿膠花』咁，可以喺屋企度做。譬如係『穿線』(將線穿進扇孔)，我哋都會判出去畀家庭主婦做。」羅表示，檀香扇每個工序是全人手製作，一直以來產量不多，由60至80年代，都是百分百香港製造，而工序亦相當繁複。

現時所見，檀香扇上有各式各樣的花紋圖案，一塊塊薄身的木片上，雕上了山水園林、駿馬或是仕女圖，甚至有《般若心經》。雖說是「雕」，其實中通花紋是以鋼線鋸拉出來的。羅老闆指，要將一塊檀香木變成檀香扇，中間玨少需經十數個工序，「工序好省略咁講，就係首先將一塊大原木切成一碌碌，再用鋸切到一塊塊板，板材就再鋸到一塊塊薄片，之後拎薄片去打磨，再做上面啲通花，跟住就係穿線、釘較，最後再要打磨，同埋包裝入盒。」每一把扇，當年都是本地工場內，由一位位老師傅金晴火眼仔細打造，惟做檀香扇吃力不討好，到了後期已是無人願學。

80年代初內地開放，各種本地工業生產線亦隨之北移，而祥盛的檀香扇工場，也搬了到廣東一帶。羅老闆表示，一直以來該店的檀香扇以出口為主，「嗰時生產嘅，相信有百分之80或以上都係出口，東南亞嗰邊就星馬泰啦，其次係日本，嗰邊嘅撥扇文化好濃厚，反而香港呢度嘅消費者只佔好少部分。」6、70年代幾蚊就有一碗雲吞麵，檀香扇已賣上數十元，但原來現時全港、甚至整個廣東華南一帶都無人生產，買少見少之下，更是升價十倍，最低消費都要過千元一把，「冇人肯做，其實我哋已經冇再生產新扇，依家賣緊嘅都係剩低嘅存貨......早幾年有啲大陸人嚟，想買一百幾十把，我哋做開生意知㗎嘛，與其畀佢哋買完拎去賣，不如我留返自己！」他又指，現時只售予識貨之人予收藏用，最多每款只可買一把。

被問到是否擔心此門手藝就此失傳，羅老闆笑指「冇得驚」，「呢門手藝一定係失傳㗎啦，就算係國內，都只得返零星嘅人會去做，不過國內經濟發展咁快，相信下一代都唔會揀呢行。」他也不希望因此而逼自己的下一代接手，皆因未來都似乎是「冇得做」，「近年原材料相當昂貴，有材料喺手都唔會捨得將佢造成一把扇，做其他工藝品可以賣貴啲，所以市場會萎縮，去到過萬蚊一把扇，一定冇人接受到。」雖然檀香扇已經停產，不過羅生羅太亦沒坐以待斃。近年都市人興起「品香」，用來紓緩壓力，他們亦積極發展本業，成功吸納不少年輕人的生意。