【社區小小事】港青潮玩點香減壓　焚香究竟有乜玩法？

香港這個名字，有說是由於昔日製香業興盛，只是香木種植和製香行業在香港已不復見。過去每當提及「燒香」，第一時間想到的可能是寺廟內香火鼎盛，或是家中神枱要每日點香。不過近年年輕一代也興起「點香」文化，認為在家中小香爐中放入這些天然的香木，點燃後散發的幽香，有助紓緩工作壓力。

開業50年的祥盛檀香扇莊，為全港碩果僅存的手造檀香扇店。隨着這個行業沒落，該店亦沒再生產檀香扇，現時專門賣香。第二代傳人羅老闆指，今時今日「香」已不只限於宗教用途，「除咗傳統香，我哋依家發展多元化，唔止係拜神或者敬佛，更加係品香態度，甚至發展用嚟享受嘅香。」

線香、盤香、塔香、香丸、香粉……現代人生活忙碌，不少人愛上點香，希望藉香來紓緩神經緊張。「沉香、檀香都係天然木材，有好舒服嘅香味，燒起上嚟唔止當香薰咁用，更可以令空氣、空間都淨化。」羅老闆指，近年很多年輕人來到店舖買香，他們亦設計了多款新式香爐，相比傳統香爐外型更小巧，花紋亦較精美。

「的而且確係多咗後生仔嚟，因為工作壓力大又搵到少少錢，返到屋企要平靜下。」羅指，都市人將焚香當成一種享受。

現時店舖售賣的，有檀香和沉香兩種，「檀香不嬲都受歡迎，但近10年8年都多咗人追捧沉香，佢嘅品種非常廣泛，有好多種唔同香味，用法好簡單，有時會製成一條條香枝，一點着就可以聞到；如果追求原汁原味，可以燒原木，不過要用工具輔助，啲木燒起來香氣較純，亦維持得較耐。」