【超時空香癡．下】穿漢服彈琵琶 走古人之路 曾有孤獨的青春
眼前這位26歲的男生，說話時語調慢，語氣有時像小朋友，驟眼看與一般年輕人無異。誰想到他的手機用標楷體，閒時用Instagram睇香爐，Facebook的頭像是穿着漢服彈琵琶。他就像一個生不逢時的古人，寂寥地出生在1991。
Aaron正職是合規專員，同時是香港傳統香文化保育的香藝師，研究香文化10年，自稱香癡，不行街不夜歸，每天醒來或放工回家第一件事就是要看香。Aaron一邊示範將香粉搓成三角形的塔香，一邊說着：「（我當佢哋）好似BB咁㗎。」不同的香班中，Aaron永遠是最年輕的一員。身邊的朋友對於他如此鍾愛香藝會否感到奇怪？他回答說：「其實我平時都玩好多古老嘢，着古裝衫、彈中樂，所以佢哋都無咩奇怪。」
上集請看：
漢服是一件隆重的禮服
訪問當天，Aaron準備了自己訂造的漢服：「平時睇得大戲多，覺得個袖飛飛吓好得意，就去咗訂造。我平時唔會咁着，對我嚟講係一件隆重嘅禮服，隆重嘅香藝示範或者表演中樂先會着。 」中學時代，同學們都在聽陳奕迅和容祖兒，他已經喜愛聽古老音樂，例如60年代的流行曲、大戲，甚或凡人覺得吵耳的打齋音樂，他都喜歡。除此之外，他亦喜愛不同地方的古老文化，例如日本演歌、印度教的拜神歌、越南和印尼的傳統歌曲等等。「有啲人都會話，我外表係個後生仔，其實內裏係一個老人家。我阿姨有時都會笑我，係咪古代嚟㗎？」Aaron笑說。
孤獨的青春期
喜歡打齋、大戲，不是因為悅耳，而是因為夠熱鬧，「我係好鍾意熱鬧，可惜我屋企偏偏熱鬧唔到。」他是獨生子，興趣小眾，生於錯誤的時空，甚少有志同道合的好友，一生似乎離不開孤獨。本來他曉彈鋼琴、玩戲劇，校內薄有名氣，可衝破命格。父母不欲愛子讀中文中學，中二時讓他轉校：「啱啱中二比較出名，全級都識我嘅時候，我啊媽就話要同我轉學校，我所有識嘅朋友無晒。」
插班生Aaron自覺格格不入：「好難埋堆囉，結果都係小貓幾隻啲friend。所以我中學時代麻麻哋開心，個感覺好似為咗讀書離鄉別井。」他沒有參加課外活動，課餘時間不是練琴考級，就是去補習班。插班生不諳運動，亦不喜好打機：「所有球類活動我都玩唔到，隻眼好慢，追唔到。一玩槍game，嗰啲砰砰砰就暈到啊媽都唔認得㗎啦。」他打機也是為了和朋友一齊玩，但是三兩下就會覺得無聊。比起這些主流的玩意，他更喜愛練習樂器，感覺更加實在：「大部分時間都係發展自己嘅興趣，我比較自閉㗎。」
Aaron中學開始已經自學不同中樂，但是學校卻沒有中樂團：「我樣樣都掂吓，二胡、簫、笛、古箏、琵琶。其實我好想好多人一齊玩嘅，以前就無人同我玩，自己玩晒佢囉，覺得邊個好聽就去玩。」
尋宗教慰藉 唸經以為讀錯音無效 研究印度讀音
Aaron的生活圈子曾經只有家人和不太熟稔的同學，有煩惱和心事都無處申訴，一直想找一個「宗教」：「中學嘅時候都仲係尋找緊Miracle。」為逃離孤寂，向諸神祈求，期望百發百中：「求耶穌保佑、求聖母保佑、 求佛祖保佑......阿們！」Aaron自言曾經很迷信，手執佛經似懂非懂的唸：「以為玩魔術咁，唸個咒就攞到啲咩，然後唸完一大餐咩都無。」就如誤入歧途的朋友始終沒有返回正途。但他竟然沒有放棄，還誤以為經文是中文翻譯字，「冇法力」因為音讀不準，認真至還跑去學習印度語讀音，繼而了解印度教。他中學時期比較不同宗教支派，還是選了佛教，大學時期還學習襌修，學習基本的佛教義理，理解情緒和慾望，更能為自己的情緒找到出口：「慢慢就係改變自己，去接受萬變嘅情況。」
然而，在天主教學校中選擇信佛，又是一條難走的小眾路。他還記得，有次學校舉辦活動帶他們去認識不同宗教。到了寺蓮淨苑，館方邀請同學體驗他們的佛教的宗教儀式，Aaron主動舉手參與，覺得一試無妨，後來學校的牧民助理對他的態度就改變了：「以前見到我會同我Hi，嗰次之後佢即刻擰歪面，好似我係一個沾污咗嘅人咁，我就覺得好唔開心。」在追尋宗教的路途上，他繼續是孤身一人。
古人尋友 求Facebook大神
後來能拯救他的是原來是Facebook大神，想不到古人終有用上社交媒體的時候，主動尋友。他在Facebook開了個中樂群組，吸引了不少同好加入，相約夾歌。一位佛教青年協會中樂團的團員，經他介紹終於加入了人生第一個中樂團。
古人Aaron說，恆常會見面的朋友未必是古老文化的同好：「我去搵我共同嗜好嘅朋友都係喺facebook，因為日常之中你好難接觸佢哋。」Aaron在Facebook上認識到世界各地的香友，有馬來西亞、新加坡、澳門。到了今年，他主動向不同機構提出開香班。雖然前來參與香班的學員大多是「世伯伯母」，不是同聲同氣的年輕人，但他亦很享受交流的過程：「有時可以從佢哋身上知道以前香港啲香舖頭嘅事。」香班上更認識不少喜愛古老文化的知音，有熱愛茶道的人，也有修復瓷器的人：「大家都係想復興古老文化，想佢多啲人玩。」
期望拍拖活動：觀賞香雲
那女朋友呢？Aaron說他還未有戀愛經驗，未有遇上心儀對象。令他的聞之動情的仍只有「香」。他只希望未來女友不抗拒香藝。觀賞浪漫的香雲會否成為未來的拍拖活動？他笑着說：「我唔知啊，如果佢都鍾意嘅話，我覺得會係。」