迪士尼員工不快樂 野蠻港客舉機要求保安笑：我係嚟開心㗎！
「祝您有開心奇妙的一天！」由坐上迪士尼列車的一刻起，彷彿進入了與世隔絕的童話世界。迪士尼樂園，是個遠離繁囂，尋找開心的地方。樂園自落成至2016年10月，已經招待了超過6400萬人次。但是，為客人帶來歡樂的迪士尼員工快樂嗎？已離職的「保安款待員」Alice（化名）說，這份工作要隨時面對客人「挑機」，加上公司「精簡人手」後工作量大增，員工都變得消極：「做咗5年以上個啲係望佢炒我哋，然後補一筆。對間公司係無歸屬感，覺得無咗以前嘅歡樂氣氛。」
公司規則愈來愈虛無
Alice也是看上樂園的歡樂氣氛才轉工到迪士尼：「以前未開始做，入去玩覺得好開心，入到去啲員工會主動派貼紙畀你，老人家都會派，又主動同你講啲開心嘢，例如祝你有奇妙的一天，或者玩得開心啲。」
滿懷期待加入了迪士尼的大家庭，但是員工的身份與客人始終有別：「原來係入面返工都同出面差唔多。有啲同事會話，覺得幻想破滅咗。」這些年來，Alice覺得客人變得野蠻是最令人氣餒的事：「以前嘅客人未咁衰，挑戰規矩或者走窿罅都係少啲發生，『聽話啲』，而家公司嘅規則變得越來越虛無。」為了滿足客人，公司要求員工要彈性處理客人違規的情況，例如小朋友同行就可放寬帶食物入場。客人若投訴員工，公司則多認為是員工問題。Alice說，由起初大部份員工都會做齊要求，向客人打招呼、主動派貼紙，後來愈來愈少人做齊：「我做咗公司都唔support㗎啦，我做嚟做咩？」
令客人開心的保安 檢查袋子被刁難
原來，迪士尼保安要令客人開心滿意，其實好不容易：「我哋同普通保安唔同㗎。」保安款待員需要在入園處檢查客人的隨身物品和在園內巡邏，一方面攔截違規物品，令客人配合之餘，另一方面亦要令客人稱心滿意，卻時常令Alice陷入左右為難的局面。
Alice說，例如機場的保安檢查隨身物品會被尊重，在樂園門口檢查的保安卻被處處刁難：「有啲客一伸手入去就話，你隻手污糟喎，你唔好掂我啲嘢。咁我有禮貌哋請佢自己拎出嚟。佢就話，你哋要check之嘛，點解要拎。」如果客人最後不願合作，他們也唯有請經理出面處理，有時連經理也會被投訴不禮貌。
香港客最難搞
這些難搞客人都不是內地人，而是香港人：「大陸客人見到啲規矩，佢唔會同你太多拗撬，香港客就會challenge（挑戰）啲規矩。」樂園規定客人不准帶玻璃樽入場，向香港客人解釋網站和小冊子都有詳列規則，他反而說：「我唔識睇，點解你哋唔喺𠵱度擺？」同事拿出指示牌，他繼續說：「你擺喺𠵱度我點睇，我都帶咗嚟啦！點解唔可以帶？」
客人亦不能帶食物進樂園，尤其易變壞的食物。公司會讓員工彈性處理，如果客人稱是為小朋友準備，都會盡量酌情放行。但是，Alice說有些客人參考「網上教學」，結果個個都聲稱是為小朋友準備：「幾個家庭一齊嚟，帶著3盒雞翼、幾盒壽司，話係BB食。你諗都諗到無可能㗎喇！如果咁樣話佢又話你唔啱、無禮貌，最鍾意一個屈尾十就去投訴你。」
提醒小孩別攀爬 怪獸媽投訴
檢查客人袋子，不是EQ高便行，還得要眼耳口鼻手腳同時配合。因為保安員要同時派貼紙給小朋友，也要留意周遭環境，以防意外發生。有一次，有個小朋友在入口處的鐵閘攀爬，Alice見狀立即叫他：「小朋友，你快啲落返嚟啦，危險啊。」怎料，小朋友以囂張態度轉身向他媽媽說：「啊媽，佢話我喎。」Alice向那位媽媽解釋事情，她卻即時指著Alice的名牌，然後說：「好！我會投訴你！」被投訴的Alice心有不忿：「我係做緊自己應該做嘅嘢呀嘛，security，保安，安全啊嘛。但係成件事由頭到尾係我錯？」
「你做咩仲唔笑啊？笑啦！」
有時候，Alice覺得客人的「開心」已成為他們為所欲為的理由。有一次，客人把樂園酒店準備的生日蛋糕帶到園區。酒店理應事先告知客人不可帶進園內，Alice在進園的檢查處向他們解釋之後，他們卻說：「我哋而家嚟玩，我哋係嚟開心㗎。」Alice再次解釋這是公司規定時，可能無意間收起笑容，語調較嚴肅，客人隨即指著她問：「我嚟應該係開心架嘛！你做咩仲唔笑啊？笑啦！」還拿出手機影著她：「笑啦！望著呢度笑！」
經理不體諒：同客人say sorry 先
為了執行公司規矩，Alice始終無放行，但是心裏卻有說不出難受：「我覺得係好侮辱，好唔開心。嗰刻唔知應該點處理佢。究竟係咪應該對住佢笑？但係佢又咁樣影住你。我做緊公司嘅嘢咋嘛，點解要受呢啲對待？呢啲規矩，唔係淨係迪士尼，你去到邊都要守㗎啦，地鐵都唔准食嘢啦。」 Alice最後選擇吞聲忍氣：「經理可能會話，呢啲小事你就唔好搞啦。」每次遇到投訴，Alice覺得公司大可以向客人解釋規矩，可是公司卻甚少站在前線員工的角度處理：「人哋投訴你無禮貌，經理第一個反應覺得係你嘅問題，同個客人say sorry先。」
萬聖節夜場加十一黃金周 迪士尼精簡人手
「客人已經對啲同事衰，公司都係咁。」Alice語帶無奈地說。除了事事客人至上，迪士尼近年「精簡人手」，繁忙日子當值時間愈來愈長，早更遲收3小時，中更的早返3小時，每逢周末就返11小時，只有休息時間可以坐下來休息。現在的萬聖節夜場時段已經開始，下星期又到十一黃金周，對迪士尼員工來說是惡夢嗎？「到大節日真係疲勞轟炸。唔算真係好多客人，但係唔夠人手，你又要顧個客可能隨時挑你機，以往企半個鐘去唞一唞，後來起碼一粒鐘。」Alice憶述。
根據香港迪士尼樂園2016財政年度業績報告，去年的入場人次較上一年少70萬，主要是由於內地旅客減少。Alice說，3、4年前的黃金周起碼有2、3萬人入場，以前排隊檢查的人龍至少排至海豚噴水池。後來人客減少，內地客隨地便溺的事亦較以往少發生，Alice卻感覺比以前辛苦：「嗰時係最多內地人嚟，係辛苦但人手係夠。後來Cut到以往嘅2／3。兩個人同時on duty，同一個人on duty。之前可能兩個人分嘅，咁點會無多咗嘢呢？」
黃金周快到了，Alice覺得舊同事的心情應該有點矛盾，一來人流增加，希望公司不會再減人手，同時卻覺得工作很辛苦。迪士尼員工夾在客人和公司之間，似乎已經歡樂不再：「趁著𠵱個黃金周，你入嚟睇下就會見到員工面無表情咁企，係無咩笑容、好痛苦，個個都黑口黑面。」
迪士尼表示不就報道作出回應。