【農夫貼地團．有片】試過一日食一餐︰寧願慳啲使都唔想父母擔心
嚟緊星期四，就係農夫開Show，歌手們開Show通常都會改返個富理想又優雅的演唱會名，咩「beautiful life」、咩「Classic Moment」之類，即使最終目標都係想賺錢，都好少講到咁明。
不過農夫就老實得多，今次個唱開宗明義叫《等錢洗世界巡迴演唱會》，最終有冇巡迴就唔知，但「等錢洗」就堅到冇朋友。「01娛樂」會一連3集，同兩位傾下舊史，睇下到底有幾等錢使？第1集先同你講飲講食，回想最窮時，可以食到幾平幾盡？
攝影︰黃國立
著19蚊Tee出Show
近年農夫的確大紅，不單止有劇拍，連港姐大騷司儀都有主持過，人氣急升收入大增，所以演唱會定名為「等錢洗」都係得個噱頭啦，而家唔等啦。不過要兩位講返初入行捱世界的日子，原來都幾多辛酸，雖然今日聽返你得啖笑，但都笑中有淚。
C君說︰「而家籌備演唱會諗下著咩衫，以前農夫出Show邊有衫？都是在出口店買件白Tee，印象中19蚊就有交易。然後買支粗的箱頭筆，畫個公仔就話係農夫隊Tee。」兩件衫夾埋都係38蚊，加埋支Marker，50蚊有找，而當時二人畫上身的就是隻熊貓。「好似在痾尿定點，至於點解要用Marker？貪佢就算唱到流晒汗都唔甩色嘛！」
相關文章
【農夫貼地團．有片】重遊188同你講玩 老闆最鍾意首「芒亨歌」
【農夫貼地團．有片】樂迷效法歌詞辭職追夢 陸永︰唔使照做嘛！
「人哋慶功包場食火鍋，我哋係食一哥火鍋！」
歌曲《456 Wing》有這樣一句︰「我Rap到戶口跌到雙位數」，問返陸永有冇咁誇，原來係真，而且兩個人窮到要從食去入手慳錢。C君說︰「食方面我們好講究，好講究地點樣唔食。」兩位甚至勁過霍金，超越《時間簡史》的概念，用時間去醫肚餓。陸永說︰「只要晏少少起身，再晏少少才食第一餐，就可以食到一個早餐連晏畫連下午茶再帶少少早晚飯的一餐。食完都6點幾，朋友7點叫食飯你真係食唔落。」
今時今日慳餐飯是為了買乜買物或者去旅行，但兩位強調當時不是要慳，而係手頭得咁多，你想用多都冇。C君說︰「最常幫襯係當年7仔推出個XX茶樓的10蚊蒸飯，豉油仲要任你拎，我拎到好似要飲一樣。」去到需要食好一點的時候，例如首次出Show後慶功，經理人DJ Tommy就帶兩位食好啲，食一哥火鍋。「人哋慶功包場食火鍋，我哋係食一哥火鍋！我們仲要排隊的，好正。」
講到拎綜援咁，因為當時真係冇乜收入，更加唔想要家人接濟。C君說︰「我們不是窮到冇飯開，只不過走去做音樂，已經令家人好擔心，連家用都俾唔到，就無謂再問家人拎錢用啦，否則只會令他們更加擔心你，更加唔想你玩音樂。」今時今日生活有改善，唔使餐搵餐餐清，但兩位都好珍惜這種堅貼地的鍛鍊。陸永說︰「這種訓練，令我們想點樣抽，都離不到地呀！」
《農夫等錢洗世界巡迴演唱會》
日期︰2017年11月9日 - 14日 （共6場）
票價︰HK$580 / $480
場地︰旺角麥花臣場館