【任噏樂評】農夫《返工咁辛苦為咩》太寫實　刺痛打工仔惹負評？

一提本地Hip Hop組合農夫，可能大家都會諗起「玲玲出嚟又睇掌喇！」呢啲入屋又搞笑嘅作品，但一直有留意開農夫的樂迷都會知道，嘻嘻哈哈只係表面嗰浸，底蘊裏仲有好多認真、貼地嘅作品，好似《粒粒皆辛苦》、《問題兒童》、《偉大航道》等等，聽完包你眼濕濕笑唔出。

歌曲道出打工仔人浮於事，為跑數，為上車，為追趕不同目標而錯過人生重要事情的遺憾，不論任何年紀、身份、職業同樣都會有共鳴，呢個就係農夫嘅魅力。

邊首農夫嘅歌最打動到你？

近一、兩年農夫以幕前演出為主，作品都好似跌咗Watt，冇咗之前嗰種「入心入肺」，變到有啲距離。不過農夫即將開演唱會，仲出新歌《返工咁辛苦為咩》，一睇個歌名相信好多人都會有共鳴，或者問過自己「返工咁辛苦為咩？」，有一種「六師弟返嚟喇」嘅感覺。

不過網民嘅反應就唔太受落，好多負評：「聽咗你哋八年，個人覺得最差嗰幾首之一，變edm可能會好啲」、「見到首歌名想搵吓啲共鳴感，點知好失望，好差」、「我覺得不行囉，有D失望」、「俾d音樂嚟得唔得」等等。

雖然有網民覺得不行，但可能久唔久收工去飲下嘢網民會覺得OK。《返工咁辛苦為咩》歌詞描寫講打工仔收工落夜場，不求享受但求買醉，為片刻逃避平日生活各方面咄咄進逼嘅壓力。有網民嫌太嘈，但其實音樂底將夜場環境「如實反映」，因為一入門口你只會聽到「砰砰砰」嘅低音不斷轟向你耳仔，唔會聽得出間Club播咩歌，就好似《返》曲入面震耳欲聾嘅鼓聲一樣。

再者，有網民指歌曲冇共鳴，只可以講句「少年你太年輕」。《返》曲中每句歌詞都可以話係「指定對白」，有陪過朋友落酒吧嘅讀者一定聽過。

覺得冇共鳴嘅網民可以睇以下文字想像下：

阿明每日OT冇補水，一星期返足七日都只係得萬二蚊一個月，落到嚟第一句就同你呻：「返工咁辛苦為咩！」

坐喺側邊，住上水嘅阿強每朝8點要到中環返工，佢同阿明一齊吐苦水：「日日返到隻狗咁，仲早過啲雞起身！」

平時唔飲得嘅阿偉兩杯到肚之後，開始自言自語：「供樓又係你嘅，水電煤又係你嘅，個單位又細，管理費又貴，仲要交稅！」

個個都放負，你都冇晒計，唯有大嗌：「飲就飲勝啦！將受過嘅氣一次過Er出嚟！」

其實所謂嘅貼地題材唔係下下都要同你講人生、講追夢、講社會大事，《返工咁辛苦為咩》都好貼地。可能有人覺得個音樂底一味轟，陸永C君又一輪嘴唔知講緊乜，但好多打工仔每晚落去飲酒，就係為咗呢逃避現實，為咗可以唔諗生活嘅嘢唔想醒。個個都飲到嘔，個個都真係想飲到嘔咩？有出路、有目標、有方向就唔使晚晚落去飲啦。

講到尾，聽歌從來都好主觀，始於人人口味唔同，不過一味話唔好聽嘅樂迷係因為接受唔到農夫轉曲風，定係太寫實令到你不想面對呢？