農夫旺角派傳單宣傳演唱會　急才用舊歌評新港姐「玄」到盡頭

「舉高隻手~　洗乜怕醜~」，一向古靈精怪嘅農夫今日下午在「夏日熱辣辣」的天氣底下到旺角派傳單，原來就是為了宣傳他們11月在麥花臣舉行的《農夫等錢洗世界巡迴演唱會》。看他們有板有眼的嘗試派傳單工作，有時候真的沒人接，也有時候途人把他們認出，繼而引起圍觀的人群，農夫表示：「唔好講到我哋真係好辛苦，人哋真係搵食企成日就叫做辛苦啦。其實派傳單呢件事係『好鬼地(貼地)』嘅，以前啲Hip Hop Show好多都係咁，我哋做返街頭嘢都幾好呀。我諗其他歌手都唔會做啦，人哋有隧道口廣告牌，我哋就企喺隧道口自己做廣告牌。」

提起演唱會，農夫對上一次在香港舉行「演唱會」已是2010年紅館的《Down To Earth演唱會》，其後的演出也是以「演嘢會」、「棟篤唱」的名義進行。事隔七年再有機會打正旗號開演唱會，問到他們會否跟最近Hip Hop風潮流行起來有關，他倆表示：「從來呢啲風都唔關我哋事嘅，Hip Hop風吹得勁又唔會話有咩帶挈我哋。我哋自己做(歌)嘅時候，就直頭冇呢啲風，不過又唔見得特別差，我哋只係做緊自己嘅嘢。就算我而家同你講Hip Hop，你都未必會諗起我哋。公道咁講，我哋可以叫做Rap嘅組合啦，如果要講Hip Hop，我哋其實係愛好者啦。」而他們亦表示為了今次演唱會，已密鑼緊鼓準備推出兩首新歌。深信大家最關心今次的演唱會又會否有棟篤笑的部份？農夫似乎早有準備：「觀眾係咁架啦！你同佢哋講話成場講嘢嘅，佢哋就話不如唱啲歌啦！你話我成場騷都唱歌嘅，佢哋又會問，不如講吓嘢啦。所以兩樣嘢都會有，我哋唔係王菲同Eason，我哋都做唔到兩個鐘齋唱歌，大家放心。」

最近香港小姐冠軍出爐，新任港姐雷莊𠒇在TVB還未接拍節目，話題性已十足，外界對這位「港姐」似乎也有不同的評價。對於農夫這兩位TVB愛將，如果在演唱會中要選擇一首自己的歌去「唱」這位新任港姐，他們又會想起哪首歌？陸永斬釘截鐵表示：「我哋有首歌大家未必好熟悉，叫《答案有三個》！你問我今屆港姐係點，我就會話答案有三個！」而C君在旁亦立即接話：「就係有冠亞季軍啦！」農夫果然是老江湖，回答這類型問題總是特別「玄」，到底《答案有三個》是什麼意思，陸永表示：「呢樣要靠大家自己去諗吓啦！」似乎《答案有三個》這首歌曲隱藏了不少玄機。

跟大家回顧一下《答案有三個》的歌詞，首句已彈出「為什麼都有十萬個 答案又點止一個 / 無話答錯 唔答錯」，單憑這句似乎為Juliette發聲，力撐她的勇敢發言，亦無對與錯之分。

不過事情又怎會這樣簡單，去到歌曲後段，歌詞也表示「我想知呢首歌有乜野意思 firstly 擺明無意思 / 兩個lazy 嘅 mc 答案得一個 夾硬一加二 / 呃多d歌詞 咁你都唔知?」農夫寫詞時似乎也不禁自嘲這歌曲沒什麼內涵，難道他們以這首歌形容新任港姐，是意指她就像這首歌一樣？

不過可能我們也想得太多，或許農夫言簡意潔，只是想表達今屆港姐冠軍就像歌名一樣，《答案有三個》，三甲當中任何一位也有足夠的代表性。到底答案是什麼只有農夫他們知道，反正一切也只是憑空想像，最後還是戴一戴頭盔說句：「以上內容純屬個人意見，與農夫及本台立場無關。」