【農夫貼地團．有片】重遊188同你講玩 老闆最鍾意首「芒亨歌」
農夫貼地團嚟到第二集，上集講食，今集就同大家講玩。農夫二人最愛的玩意叫打機，仲要係搵平機打。好似當年會流連灣仔的街機舖「機城」，2蚊一鋪「拳王」可以玩大半日。又因為經常買Game，買到同188的機舖老闆高佬做埋朋友。所以農夫就親自帶路，同大家回憶下個人打機史。
攝影︰黃國立
打機就是生活一部分
拍攝當日可以用夜訪188來形容，因為已近9點，高佬話呢個鐘數較少人，先傾到偈。幾位認識了有10年，由買實體碟到後來Online過數WhatsApp個Code，見都唔使見。同高佬傾得埋，因為佢為人老實。C君說︰「佢好有良心，會講你知邊隻Game熱炒中，勸你遲啲先買唔好食炒價。」陸永說︰「因為佢係唔會見識得你就唔用炒價賣俾你。」
農夫跟高佬混熟時，有經歷過《Final Fantasy》的熱玩期，C君覺得呢隻Game好抵玩，花你幾百元就玩足大半年，除番勻都慳唔少。除了屋企打，兩位又會去機舖搵平機打。C君說︰「以前有間叫『機城』的舖頭，2蚊就玩到鋪《拳王》，技術好的話可以玩到好耐。」
網民自製「芒亨歌」《獵人之歌》MV
相關文章
【農夫貼地團．有片】試過一日食一餐︰寧願慳啲使都唔想父母擔心
【農夫貼地團．有片】樂迷效法歌詞辭職追夢 陸永︰唔使照做嘛！
「芒亨」救婚姻
打機可以好純粹地是一個玩意，但兩個機迷加一個Game佬，走埋一齊竟然悟出一套關乎感情世界和親子交流的理論。陸永說︰「之前我哋個化妝師，老公有打芒亨（Monster Hunter），好怪個老婆唔陪佢打，於是我哋嘗試誘導佢，結果個老婆真係上癮，佢老公知道後不知幾開心，簡直係『芒亨救婚姻』。」當時的「芒亨熱」更加係旋風式入侵C君的生活，甚至創作了一首簡稱「芒亨歌」的《獵人之歌》。高佬說︰「我少聽佢哋，唯獨最記得係首芒亨歌！」可惜叫老闆獻唱兩句又唔制。
其實兩位近年都少咗買Game，高佬都明白，尤其做了爸爸的陸永，一定忙好多，但佢又大膽預言，在不久將來，陸永一定會返來再幫襯！高佬說︰「遲一點吧，遲一點你就要改為陪小朋友打機，轉玩一些兒童遊戲如︰《孖寶兄弟》，到時又就會由這裏重新開始。」相信這是一個成長循環，到時陸永兩個女大個，可能會自己去搵高佬買Game都似。