碩果僅存竹昇麵店　老闆堅持每日人手打麵：做開靚麵　返唔到轉頭

50年竹昇麵老店「永華麵家」日前宣布結業，另一間以人手打麵著名的「坤記竹昇麵」，成為了本港碩果僅存的竹昇麵店。
坤記竹昇麵老闆李世粮大嘆可惜，認為要經營成本高的麵店困難重重，又要面對業主加租，又擔心沒人傳承。他稱縱然辛苦，一定會「堅持日日做麵，默默耕耘」。

「坤記竹昇麵」在2010年開業，不足2年，便連續5年入圍米芝蓮必比登推介之列，而背後的靈魂人物，正正是老闆李世粮。李世粮是廣州人，早於爺爺那一代，已與竹昇麵結緣。「傳統家族生意，我爺爺當年喺澳門做麵，不過之後隔咗一代，我爸爸同叔叔無做，就留低咗本手寫本嘅秘笈畀我」。一不做，二不休。決心承繼爺爺生意的李世粮，就這樣開展了這段他形容為「返唔到轉頭」的路。

訪問甫開始，老闆娘送上一碗雲吞竹昇麵，麵條呈淡褐色，並無平日食廣東麵嗅到的濃濃鹼水味。這個正正是李世粮的自豪。「鹼水係要有，但食落去唔應該有，現時嘅平價麵全部都好有鹼水味，但我哋做嘅就無」。「我麵房嘅麵無添加劑，用竹昇製麵，麵會爽口啲，有分別㗎，如果唔係，以前都唔使咁做啦」。坤記的麵，每天在店內透明小工房製作。由打蛋、撈粉、搓麵、坐在長竹竹上䟴麵，再用特製的打麵機壓麵，再用刀器切麵。每根麵的製作，顧客都看得一清二楚。李世粮坦言，這樣製麵，不單辛苦，成本也十分高昂。「每一個麵都比別入嘅成本貴一倍，希望密食當三番，客人欣賞，我先站得住」。

生意難做，李世粮主動提及日前宣布結業的竹昇麵老字號「永華麵家」。「可惜，好可惜，係一間香港雲吞麵界數一數二嘅老牌子」。他稱雖然不知永華麵家結業的原因，但近年來，要經營一間「有堅持」的食店，的確一點也不簡單。「全世界都知，我哋替業主打工，賺多少少，業主又加租」，加上製麵辛苦，吸引不到年輕人入行，「下一代願唔願意做呢行呢？唔願意又可以點呢？無人接班，都無辦法㗎」。

竹昇麵店買少見少，李世粮也不敢肯定可做到多久，但在有生之年，他一定會握緊一個信念。「依家竹昇麵喺內地、本港都均納入為文化遺產，我自己喺呢方面都算貢獻咗自己一分力量」，「唯有繼續堅持自己做，默默耕耘啦」。