灣仔永華麵家8月底結業　鄧兆尊懷念20年情：爸爸帶我去嘅

灣仔老店「永華麵家」日前宣佈8月底結業，令不少顧客大嘆可惜。這間老店開業逾半個世紀，麵條由傳統手法竹昇打製，其鮮蝦雲吞麵和炸醬麵自2016年起，連續3年被評為「米芝蓮車胎人美食」的超值推介，除此之外，這裡亦有不少名人明星名流幫襯過，好似鄧兆尊、郭富城、黃秋生等都是座上客。

鄧兆尊接受《香港01》訪問時，表示自己已經光顧了「永華麵家」二十幾年，同老闆娘、老闆娘的女兒都好熟，大家似親人一般：「因為我爸爸帶我去嘅嘛，我哋都好鍾意食。（鍾意食咩呢？）雲吞麵、桑寄蓮子蛋茶、古法蝦子柚皮呢啲啦。（女朋友呢？）佢哋都係食甜品多，菜心呢啲。」兆尊坦言老闆娘好好人，成日都會送東西給他們吃，而自己一個月起碼去兩次：「同咩人都去，得閒就去㗎啦。」

現在好多老牌店鋪都逐一執笠，兆尊亦覺得少了好多選擇，也許「永華麵家」對他來說已經不止是一間店鋪，早已是他生活中的一部分，相信當中都有不少他和爸爸新馬師曾的回憶，面對店鋪的結業，兆尊應該都會覺得有些遺憾，不過他坦言：「都無話遺憾嘅，其實老闆娘辛苦咗好耐㗎啦，以前日日開鋪好早㗎，好似係9點零鐘開，開到夜晚兩點鐘先閂，咁近排先至早收咗，十二點零鐘就收㗎啦，好辛苦嘅。」或者真是如兆尊所講，兩家人好像世交一般，他站在老闆娘的立場，設身處地去想，就算有所不捨，但對於老闆娘來講，又未必是一件壞事。