「搖滾大俠」話你知香港Band壇冇斷層：一直有好多樂隊好爭氣！

黃貫中、Joey Tang、夏韶聲、單立文及恭碩良，五位Band壇重量級人物將於下月合體開騷，猶如NBA全明星賽般，組一隊All Star Band為樂迷送上兩晚《搖滾大合奏》，一次過滿足樂迷五個願望。
攝影：黃國立

80年代的樂壇是不少人公認的輝煌歲月，今次《搖滾大合奏》勾起大家當年《勁Band Super Jam》的回憶。不過，夏韶聲則覺得並非「回到」80年代，因為香港一直有Band壇，他說：「其實Band香港不嬲都有，係一個好興奮嘅Scene(景象)嚟嘅！只不過可能歌星太犀利蓋過咗少少，其實我哋不嬲都喺到。」他更笑言：「我係無間道嚟嘅！雖然我一路好都個人，但我一路都有夾band；所以我唔覺得Band唔存在，因為冇band就冇歌手嘅，只不過可能係報道上少提及啫。」

Joey Tang都話：「照我所知，其實依家觀眾想睇啲更Band嘅嘢，想喺現場感受一個好熱血，氣氛好熾熱嘅show。同埋，有時反而係觀眾令到我哋樂隊感受番，萬人空巷個個舉晒手玩嘅感人畫面！」

幾位大俠認識多年，在不同場合都有合作過，能夠組成一隊Band演出，各人都大感興奮話，夏韶聲說：「Joey幫我和過音，Jun幫我打過鼓，當時佢14歲咋！嗰次係我第一次伊館演唱會，就係佢咁細嘅細路幫我打成場！大家成長咗仲可以企埋一齊，仲可以玩緊自己鍾意嘅音樂，真係好開心！」

五位大俠都獨當一面，那屆時演出會是怎樣一個形式？恭碩良說：「我要clarify一下先，我身邊都好多朋友問『咁咪有5隊band囉？』唔係嘅，係我哋5個人組成一隊band！」他續說：「今次好正！台上面會有兩套鼓，到時我同Danny Summer兩個耍下花槍！Rundown方面就有待公佈，因為今次太多好聽嘅歌，要諗點樣去set個rundown，不過一定要玩啲cover，一啲陪住我哋成長嘅英文歌。」

夏韶聲笑言：「單立文曾經入過我隊Band(Visa Band)，佢都有一段時間冇彈，大家都好努力搵番以前嘅技術出嚟。我以前係打鼓嘅，呢次俾個機會我又可以打番下鼓，今次靠佢(恭碩良)帶番起我！哈哈！」Joey Tang亦話：「可能有一part係五支結他一齊呢？你唔知㗎嘛！」

早前《搖滾大俠奏》海報一出，引上網上很大迴響，有「搖滾大嬸判」、「搖滾大細怒」等等改圖出現，夏韶聲大方說：「證明今次個show impact夠大，所以先有人改圖去搞笑，我哋係歡迎嘅。」

不過些網民覺得，香港Band壇有斷層，仍然需要一眾前輩帶領，但他們並不認同，更重申：「香港樂隊一直都冇少過！」恭碩良更認為今次開騷Timing啱啱好：「近呢幾年有好多Band都好爭氣，好勤力，周圍去宣傳香港嘅樂隊。咁多年嚟我都有去聽啲underground show，甚至有香港indie band去到日本Summer Sonic玩。其實大家一直做緊嘢，不過冇人知啫嘛！」

Joey Tang亦都話：「好似我哋玩咗三十幾年，我哋大家都應該將樂隊嘅生命last forever！可能中間會有停頓，因為你唔會有不停創作嘅靈感。咁就當休息一下，到你有興趣做音樂嘅時候，再咪做音樂囉，繼續一浪接一浪帶更多歌曲俾大家。」

場地：
HMV Kafé

Blues Rock Guitar