【專訪．有片】太極聯乘交響樂團　60樂手列陣：嗰種壓迫力好激

紅色的跑車像是帶着神秘/Oh My Crystal 始終她最好/留住我吧！留住我好嗎？
見到以上歌詞，相信大家腦海自動有聲有畫面。雷有輝台風十足帶領全場氣氛，Joey Tang與HiFi德精湛的結他Solo，Gary Tong用Synthesizer做出各種弦樂聲效豐富編曲，盛旦華與Ricky Chu穩住節拍撐起樂隊的骨幹，「六神合體」在台上衝鋒陷陣。
這就是殿堂級樂隊——太極。
攝影：陳順禎

太極樂隊成軍33年，無論是「七子」或是「六子」時期一樣有火，不斷尋求突破，他們於4月13、14舉行《太極交響狂熱演唱會》，成為香港首隊crossover交響樂團於紅館開騷的樂隊。

【專訪．有片】太極爆做監製辛酸：有歌手一隻歌錄足50 Take呀！

【專訪．有片】做樂手被叫「撈嘢Band」？ 太極：唔係咁容易㗎！

大家可能疑惑，以往都有其他單位嘗試過「樂隊Crossover管弦樂團」，何解稱太極是「首隊」樂隊以60人的樂手陣容作演出。Joey Tang在此向大家解釋：「今次唔係Orchestra，係Symphony！」Hi Fi德補充：「聽聞係60人以上先可以叫Symphony！」

可能部份讀者聽到「管弦樂」或「交響樂」，單純地聯想到：「哦！咪就係有個指揮企中間，有大、中、小提琴，加埋一啲喇叭、長笛咁囉！」其實處處留心皆學問，單單是這次演唱會的陣容都可以令你「長知識」。

太極與交響樂團聯手開騷，可謂一圓兒時夢想，Joey Tang表示：「我哋細個聽嘅歌，無論Pop又好，Rock又好，點解人哋有真Strings(弦樂器)嘅？點解我哋從來冇做過呢？外國Band例如：Metallica、Yngwie Malmsteen、Eagles都有做過，今次到我哋有呢個榮幸做到。」

太極六子出名鬼馬，訪問期間都要互笠高帽先過癮，今次俾人「入」嘅就係Gary Tong，Joey Tang話：「其實今次個idea Gary Tong一早諗咗啦！大家平時唔覺之嘛，因為我哋Gary哥啲聲靚，一個人可以模仿成隊Symphony咁靚！」其餘四人忍俊不禁，Gary Tong沒好氣地說：「都唔知點答呀！哈哈！」

太極各人都是獨當一面的樂手，加上夾足咁多年默契十足，所有作品都可以手到拿來「一埋位就開波」，但這次要與交響樂團合作，改編歌曲會否很高難度？Joey Tang則表示：「我又唔覺得話好難。」他解釋：「因為我哋幾個都係做開製作，編曲有關，其實一話有管弦樂，每日個腦入面都飆緊啲編曲嘅畫面出嚟！」

Hi Fi德表示：「我哋太極本身嘅編曲如果你留心啲去聽，Gary哥鋪排咗好多Strings喺個底到。今次個Concert有一半嘅歌曲係將本身有嘅Strings搬番出嚟，另外一半我哋會再rearrange，會整啲聽覺上更加刺激嘅嘢俾大家！」

Joey Tang續說：「其實早兩日發夢喺到諗，《樂與悲》個前奏有一段真嘅敲擊會係點呢！真嘅聽上嚟係會感人啲嘅，個浸嘢(音場)係厚好多倍！係唔知點樣寫番出嚟之嘛，好彩我哋有Gary哥！」

一提到有真Strings、真「吹口」、真敲擊伴奏，太極各人都非常雀躍，除了因為一圓兒時夢，他們非常期待在台上感受身後那股迫力。Hi Fi德興奮說：「唔止係感人，係『感到自己』！好多年前喺文化中心做包以正嘅show彈Blues，身後有十幾個Brass(銅管樂)，嗰種迫力係好刺激㗎！」

太極各人一講「音樂經」就非常興奮，單從表情就能感受到他對音樂的熱愛，相信太極也是不少音樂人羨慕的對象，能夠將興趣轉化為職業也是不少人夢寐以求的事。太極能夠輕鬆地將作品重新編曲，全憑多年來累積的經驗，他們背後的辛酸你又知幾多？以及作為樂手如何看待「撈嘢Band」的稱呼？

想知太極一路走來的經歷，記得睇埋其他集數喇！