【專訪．有片】做樂手被叫「撈嘢Band」？　太極：唔係咁容易㗎！

太極樂隊成軍33年，將於4月舉行《太極交響狂熱演唱會》，是香港首隊與交響樂團(Symphony)合體開紅館的樂隊，能夠應付陣容如此龐大的演出，全憑多年來於幕前、幕後累積的經驗。
攝影：陳順禎
場地：通利琴行

太極樂隊各人都是獨當一面的音樂人，除了以樂隊身份在台上演出，在大大小小演唱會都見到他們的身影；唱片封套上「監製」及「編曲」一欄，亦經常見到他們的名字。由幕前轉到幕後當樂手，待遇自然有所不同，有人會稱之為「撈嘢Band」，要為歌手彈奏「魚蛋歌」。這些稱呼可能來自外界的不了解，但對音樂人的確有欠尊重。

Joey Tang認真地說：「魚蛋歌幾難作呀！你估咁容易『撈嘢』？」

「撈嘢Band」與「魚蛋歌」

可能不少人有錯覺，認為歌手、樂手的技術是「天生」，每次表演是「食生菜」般容易；但你有否想過要成為一個樂手，背後需要付出多少心血、時間去練習，才能自如地應付不同曲風，並且穩妥地做好每次演出。而流行曲是否一定如「魚蛋」般廉價，沒有欣賞的價值？

Joey Tang正經地說：「你講到『撈嘢Band』，咁咩叫魚蛋歌吖？你可能會覺得Cheap啦，但魚蛋歌幾難作呀！Hit到嘅歌先叫魚蛋歌喎！Deep Purple《Soldier Of Fortune》嗰隻就係魚蛋歌喇，你覺得佢好難聽咩？唔係呀！你估咁容易『撈嘢』？要經過好多年訓練先做到。」他續說：「當年鼓王Donald Ashley都有『撈嘢』㗎，佢94年喺張學友演唱會打《分手總要在雨天》，我哋台下睇到幾讚嘆！」

所謂的「撈嘢」，放諸到國際級樂手亦比比皆是，但他們不會被界定成甚麼甚麼，樂手就是樂手。Joey Tang說：「外國有個樂手叫Steve Lukather，但係佢佢玩ToTo、Larry Carlton都係撈嘢㗎、Steve Vai都彈《Hotel California》啦！」

「咁收錢就叫『撈嘢』㗎啦！『撈嘢』只不過係一個形容詞，係我哋平時一班樂手、前輩傾開偈會笑嘅一句說話。」

心態決定境界

夾Band、玩音樂當然希望自由自在地演奏自己的作品，而擔任職業樂手則大多時間為他人伴奏，像是在「服務」他人，所以部份不太喜歡當樂手，但只能說「心態決定境界」。

Hi-Fi德對此說：「我唔明佢哋點解佢哋會覺得負面囉！你唔玩人哋啲歌點會學到多啲嘢呢？我覺得係睇窄咗囉！」他續說：「Musician應該係鍾意玩就玩，冇界限，冇所謂。我哋係鍾意玩音樂之嘛，唔好咁斤斤計較。」

Gary Tong亦表示，雖然一部份人對樂手這個身份感到抗拒，但亦不少人樂在其中：「係一小撮人有咁嘅睇法啫，我簽過一啲樂隊去做歌星演唱會嘅session，佢哋又唔會話呢樣嘢係『撈嘢』。佢哋真係好開心，自己本身又有夾一隊好另類嘅樂隊，呢啲咪就係享受音樂囉！」

「撈嘢」唔係一定「撈嘢」

正如太極所說，同樣在玩音樂，何用拘泥於身份，只要樂在其中，每一次演出都是學習的機會；亦正因一路吸收經驗，才能順利地完成這次演唱會的編曲，即使加入管弦樂團一樣游刃有如。

Gary Tong說：「由90年代開始一直都有做編曲，對於太極同自己都好有幫助。例如幫張國榮編過《大熱》，一樣要研究弦樂嘅鋪排，一啲都冇浪費，唔會覺得係彈緊人哋啲歌，我哋都係編緊自己鍾意嘅嘢。」身旁的盛旦華卻笑說：「我唔敢彈你啲歌呀！哈哈！」似乎Gary Tong的編曲難度很高，要駕馭都需要咁上下功力。

主音雷有輝亦表示，幸好以往擔任和音時有與管弦樂團合作的經驗，他說：「好彩有做過唔同歌手嘅演唱會，如果第一次同管弦樂團合作真係會幾壓力，同就咁一隊Band去玩係好唔同。」

聽過太極的分享，相信大家對樂手這個職業有多一層認識，要成功當然也吃過苦，想知道他們過往的辛酸和趣事，記得要留意另外兩集專訪！」