娛樂圈中唯一「佛系男神」？　馬國明中哂所有條件

最近香港又突然興返起「佛系」呢樣嘢，仲喺網上多咗好多改圖，例如「佛系hehe」、「佛系溝女法」、「佛系打工仔」同「佛系港人發達大法」等等，睇完各張改圖加埋嘅描述真係會心微笑。不過，其實咩係「佛系」呢？其實「佛系」係講緊一種放下、唔執著、看破紅塵嘅生活態度，而呢個Term最早係出現喺日本嘅一本雜誌度，話有啲男仔將自己興趣放第一位，對生活、感情都有自己嘅節奏，一啲唔想費神嘅事佢哋永遠唔會花心機。

咁到底娛樂圈裡面有冇藝人係屬於「佛系」呢？有嘅，但唔多，而最係呢個系嘅人就一定係馬國明。唔好以為係齋吹冇原因，其實有好多事例都可以證明到佢係呢類人，就好似之前佢喺台慶頒獎禮咁，雖然好多人睇好佢拎到視帝，但係最後佢淨係拎到「最愛歡迎電視男角色」呢個獎，有啲人就覺得係關佢唔玩埋堆，唔高層擦鞋事。即使係咁，佢都睇得好淡好開，好似冇咩所謂咁，當時佢係咁同傳媒講嘅：「人人心水都唔同，今年拎唔到咪下年囉。」好多拎唔到獎嘅人講呢啲說話係講得好唔由衷，硬係總有少少唔甘心，但從佢嘅表情、語氣度係睇得出佢呢句嘢完全冇任何酸味，嗰種從容自在仲令到大家好認同、支持佢呢種緣份到就自然有，唔好強求嘅諗法。

雖然大家都知「佛系」嘅男仔大多數喺感情都係做被動嘅一個，但依度都要講多幾句馬明喺愛情觀上係點樣「佛」法。個個都知馬明除咗生得高大個樣睇得仲好搵得，密密拍劇接廣告嘅佢可以話係圈中數一數二嘅筍盤，自然好多女士想埋身，獨霸唐僧肉。入行咁多年，佢都有唔少緋聞，但幾乎每一次都係傳佢被女方倒追，自己就一直都唔出手咁。雖然馬明曾經否認過現任（緋聞）女友黃心穎主動追求他，更指自己每一次都係自己主動約女方出街，但好多人依然因為佢嫌麻煩、怕怕醜醜嘅性格，改唔到呢種諗法，覺得係一早視對方係偶像嘅心穎BB不斷出擊融化到呢座冰山。

喺打扮方面，馬明亦都好有「佛系」嗰種草草不工。馬明嘅好拍檔楊怡就喺好耐好耐之前公開咁嘲笑過佢，話佢喺衣著品味方面真係爭少少：「馬明咩都有，有樓、有演技，只係冇Taste。」而其實好多觀眾、讀者都曾經喺唔同渠道見過馬明平時嘅打扮，成日都雞翼袖加鬆身褲，十足一個佬，而佢又真係完全唔Care大家點睇佢著成點，佢自己覺得舒服就得。所以，喺呢度都好多謝心穎BB肯幫馬明揀衫襯衫，畀大家喺依家睇到一個除咗靚仔仲好有型嘅馬明。

不過，馬明接受《香港01》訪問時否認自己屬於「佛系」：「我要搵錢養屋企架，唔敢睇淡一切。（不過你其他方面又真係好中。）其實做咗要搵錢之外，我處事真係好跟興趣而行，我鍾意踢波就去踢波，鍾意演戲就演戲，其他嘢唔會太上心，係搵錢呢方面唔可以咁，一家大細都要食飯。（自己真係『不溝女』？）咁我之後都要結婚嘅，只係呢方面冇呢個膽亂嚟。」但其實日本都發明咗「社畜系佛系男」呢個Term，話有啲佛系男係淨係諗點樣打工搵錢。

至於心穎BB就覺得「佛系」呢個字詞放喺馬明身上硬係爭啲：「佢所有嘢都好畀心機，好勤力、好努力，只係佢唔強求，我諗呢種係知足，唔會Aggressive唔代表冇要求，兩樣嘢嚟。（覺得佢依家呢種性格剛剛好？）佢的確係感染到我，某程度上我以前係比較將好多嘢睇得好重，依家就學識到睇輕啲。」咦，唔通心穎想做「佛系」女神？

睇圖膜拜呢位「佛系男神」：