黃心穎收到馬國明生日禮物好開心　大讚男友：佢愈來愈知我諗乜

黃心穎剛剛度過29歲生日，生日正日有男朋友馬國明同佢慶祝，問到馬明送咩禮物，心穎就甜笑話係秘密，咁唔知份禮物係伊人開到聲話要定馬明咁醒水識揀禮物呢? 心穎笑言一半一半啦。馬明出名天然呆，望落木獨嘅佢唔似猜得透女孩子心事，唔知有無曾經因為不解温柔激親女朋友呢？心穎:「佢係一個好簡單嘅人，我地相處耐咗了解深咗，佢愈來愈知我點諗。」

就嚟情人節，心穎就話果日應該要開工，未收通告所以安排唔到節目，而且佢仲遇到一個難題:「佢（馬國明）生日係正情人節之前，所以都幾麻煩。」其實咁樣仲好啦，生日情人節一齊過，仲可以慳返份禮物添!

之後緊接就係新年，心穎話都會去對方屋企拜年，而家長亦都已經見咗，仲係兩家人同檯同心穎慶祝生日，佢話都好casual無話好緊張，馬明屋企人咁錫心穎，睇嚟心入面都已經默認呢個準新抱。