【開心速遞】林凱恩單親家庭長大入行為家人：想令媽咪無咁辛苦

《開心速遞》fans對Bonnie這個角色應該有點印象，今晚（周四）在《開心速遞》也有出現，是主角的同學仔之一，這個清秀的女孩子是2015年港姐友誼小姐林凱恩Iris，未必有人留意到她是港姐出身，因同期冠軍是十優女生麥明詩，亞軍是有錢女龐卓欣，季軍郭嘉文被傳是李澤楷女友，各有娛樂性新聞包裝，林凱恩沒人留意是正常，或許有人覺得她選港姐是為了發明星夢，但林凱恩參選主要原因是為了媽媽：「媽咪以前都靚女㗎，佢都想去選港姐，都有人話佢似戚美珍。我而家就係好似幫佢完成咗選港姐嘅感覺。」

林凱恩選美的理由有點像電影《打死不離三父女》，電影中父親未能成為世界摔跤冠軍，最後由女兒完成，林凱恩則代母選港姐，她說：「媽咪以前喺真光（學校）校花嚟㗎，因為佢畢咗業之後就要出嚟做嘢幫屋企，就冇去選（港姐）。」那些年，參選港姐是很多女孩的終極夢想，是一個身份肯定，但很多人為生活而被迫放棄，而林媽媽踏出社會後，就開始過着與大家一樣的生活，工作結婚生仔。直到林凱恩讀中學的時候，林媽媽與林爸爸分開了，林媽媽就開始獨力的照顧林凱恩和凱恩的哥哥。

「喺單親家庭長大，其實或多或少都有啲影響。所以我希望自己可以更加努力，令媽咪無咁辛苦，令佢因為我而自豪係最大夢想。選港姐唔係我由細到大嘅夢想，亦都冇諗過我會去選，當時沒想過做藝人。哈哈，其實遞表嗰時我同媽咪都有糾結過選唔選好。」如果是無綫劇，故事應該女兒最後選到港姐冠軍，之後名成利就，但現實是林凱恩只得到友誼小姐，星途要由低做起。

不過林媽媽對女兒十分欣賞，她的每一個演出都不想錯過，林凱恩說：「媽咪電話都有MyTVSuper，咁佢就可以成日睇。同埋將有我嘅新聞記低，然後放落電話度。屋企人會睇完我嘅演出之後，就會俾意見我，有時仲會緊張過我。呢個係好開心嘅，因為有一種凝聚家庭嘅感覺，同埋有一種為屋企人增光嘅感覺。有時嫲嫲喺電視見到我，都會講『係阿恩吖，係阿恩吖』，個感覺係sweet㗎。」