【爛鬼Cult噏】何啟南拍《猛鬼佛跳牆》堅瀨嘢：搵人陪先敢去廁所

一路以來都好多人爭拗邊套港產鬼片係最恐怖嘅鬼片，有唔少人覺得係余允抗執導嘅《凶榜》又或者佢嘅《凶貓》，亦都有好多人覺得係于仁泰嘅《猛鬼佛跳牆》。我自己就覺得《凶榜》略勝《凶貓》一籌，而《猛鬼佛跳牆》就同《凶榜》同Level，真係可以話係不相伯仲。有份演《猛鬼佛跳牆》嘅「無綫反派王」何啟南亦覺得兩套戲都好恐怖，而且兩種恐怖都唔同，唔使太刻意比較。

【凶榜】最嚇人港產鬼片 角色死狀恐怖 七孔流血狗骨啃死樣樣齊

【爛鬼Cult噏】《猛鬼佛跳牆》港式恐怖夠貼地　堅揪過《凶榜》？

講到何啟南同董驃、李麗珍等人喺《猛鬼佛跳牆》裡面都有唔少撞鬼場面，咁我就多口問會唔會拍攝有啲古怪嘢發生，因為好多人都話拍鬼片係特別邪，點知啟南哥真係話當時有料到：「其實做李麗珍細妹個小妹妹（陳卓欣）喺開工時久唔久都話見到嘢，成Crew人都知佢有陰陽眼，有次妹妹唔使埋位，喺別墅出面睇住我哋開工，我見到妹妹成日往上望，又笑又揮手咁，我問佢同邊個揮手，佢就話同上面啲姐姐，但我望上去，一個人都冇。」

啟南哥續說：「我唔識死，我再問妹妹，啲姐姐係長頭髮定短頭髮，佢話啲姐姐長頭髮紮住辮，到我問佢哋著咩衫時，佢就答我係藍色衫，我就喺度諗係唔係以前汪明荃拍劇著嗰啲學生裝，之後我就唔敢再問落去。因為開工嗰度都好偏僻下，所以冇人嘅地方我就當佢係廁所，但知道佢見到有嘢後，我都唔敢周圍去，要搵有燈照住嘅地方或者搵人陪先敢方便。」

當我以為就咁就完時，啟南哥就醒起仲有一單再恐怖啲：「嗰下劇組係拍緊大家發現間屋唔可以再住人，一定要走，拍嗰時就幾個演員衝上架車度，但係個妹妹就死都唔肯上車，話我唔入呀、我唔入呀，架車好多人、好多姐姐喺度。咁佢係佢契爺帶嚟拍戲嘅，佢契爺見到咁就入埋嚟拎條布喺車廂Fing幾下，話啲姐姐走哂喇，個妹妹之後就冇扭計。（你唔驚？）現場有幾十人都唔驚嘅，如果得我一個，我一定會走。」

問到會唔會覺得依家嘅恐怖片冇以前咁恐怖，啟南哥都覺覺哋：「我個人覺得依家好靠電腦特技，變相令到個拍攝手法、故事舖排冇以前咁驚，以前睇恐怖片，好似希治閣嗰啲咁，都係冇CG，但係都好驚，可能觀眾要求嘅嘢唔同咗，所以就咁多CG，但其實最緊要都係個劇本。」至於點解呢套係佢唯一一套演出過嘅港產鬼片，係唔係見過鬼就怕黑，佢就笑住話唔係：「唔係我唔拍，係冇人搵我啫。」