【爛鬼Cult噏】楚原仆X片《辭郎洲》爛到癲　最大鑊係衰邊樣？

上星期我阿頭去咗度蜜月，而去之前又冇講定想我寫邊齣戲，所以我就偷雞冇寫到觀後感。結果，佢旅行完返到嚟就拉咗我入會議室，其實佢未叫我嗰時都已經有哂心理準備畀佢抦架喇，點知佢又冇咩鬧偷懶呢樣嘢，只係想話個欄目會由「Cult噏」改做「爛鬼Cult噏」，因為原來網友開嘅facebook專頁撞咗名。咁佢好順口就問我呢個星期想寫咩戲，但我真係冇咩諗頭，嗰下淨係諗起楚原喺金像獎台上話自己連拍幾套「仆X戲」，所以我就隨口噏話不如寫呢啲。大家都知啦，之前寫過嘅《山狗》、《打蛇》都係好黃好暴力，所以我就諗住佢會Ban我Idea再畀啲戲名我。點知，佢話好，因為「爛鬼Cult噏」個「爛」字係指緊爛片。

多得網友好關心楚原講緊嘅「仆X戲」到底係講邊幾套，亦感謝同事寫過唔少相關報道，我好快就Check到楚原嘅「仆X片」之最係1976年上映、收得7.2萬嘅潮州話戲曲電影《辭郎洲》。其實我因為上一份工嘅關係而有楚原叔嘅電話，我諗咗幾日應唔應該打電話去問清楚佢，因為都預咗佢唔會講咩㗎喇，但係諗諗下我唔問又唔知可以點寫，所以最後都係膽粗粗打畀佢。首先我就恭喜佢拎咗「終身成就獎」，然後就同佢講好多網友都想知佢講緊邊幾套片，我問最乜乜嘅係唔係《辭郎洲》時，佢就咁講：「好多套都好仆X，呢套就其中之一。」到問佢點睇自己呢套作品時，佢就開始封口喇：「其實自從金像獎之後都好多人打嚟，但我冇準備講任何嘢，以前嘅事都係無可奉告。」然後就匆匆收咗線。樂觀啲睇都算有收穫吖，起碼楚原叔肯認《辭郎洲》好仆X，但其實我仲有好多問題未問，因為我睇咗套戲先打畀佢嘅。而喺講呢套戲之前，我想同大家講一樣嘢，就係你睇得哂我當你贏。

咁其實《辭郎洲》個故事真係好簡單嘅，就係南宋末年，女主角陳璧娘（蕭南英飾）同一班人說服男主角張達（丁敏反串）出兵勤王打蒙古人，之後張達卻喺厓門被敵人圍困仲搞到身陷囹圄，到陳璧娘帶兵夜闖蒙古人陣營時，卻發現夫君已經以身殉國，最後仲為咗掩護一班百姓撤退而陣亡。我喺睇戲呢個半鐘裡面，除咗心裡面冒起咗幾條有關劇情嘅問題外，問得最多嘅就係套戲幾時先肯完。最大嘅原因，就係我唔睇字幕嘅話，係完全一句對白都聽唔明。可能你會話，你睇日本片、韓國片都唔識聽啦，你咪又係照睇。唔同㗎，真係唔同㗎，你要記住呢度戲係戲曲做底，佢比起好多電影節奏慢好多，淨係第一幕陳璧娘勸老公出兵勤王，都用咗差唔多成四個字，畀現代電影馴化到冇咗耐性嘅觀眾，睇到呢個張達扭扭擰擰咁耐真係會火都嚟。

呢套《辭郎洲》比起楚原其他片，好似《流星蝴蝶劍》同《三少爺的劍》咁，真係爭好遠，我喺《辭郎洲》完全感受唔到嗰種楚原作品應有嘅詭秘美麗。啊，其實都唔係完全係咁嘅，有兩下打仗場面都好有楚原Feel，但真係得嗰一陣仔，完全係到喉唔到肺。咁最後一幕都好奇情嘅，就係元朝將領張弘範攻打辭郎洲時，就下令士兵向陳璧娘放箭，射到陳璧娘趴咗喺樹上面，到張弘範想行近陳璧娘睇清楚佢係咪已經死咗，中咗幾支箭嘅陳璧娘就突然彈起，嚇到班元兵即刻腳軟坐低，古怪到我搲爆個頭都唔明呢下係做乜。

以上呢啲嘢都未足以解釋到點解呢套戲咁唔收得，好多時觀眾唔入戲院都唔知中咗伏，但呢套戲真係成個Package都好趕客，我唔係講緊依家喎，係講緊70年代。其實香港一直都唔係潮語電影嘅主要市場，當時最主要睇潮片嘅人多數都係星馬泰嘅人，而香港當時主流都係粵語片同國語片，無啦啦整套潮語片真係要好有興趣先會入場睇。咁其實香港都有好多潮州人吖，點解個票房都係咁上下？我諗最大原因係嗰時年輕一代嘅潮州人已經唔係好識潮州話，更何況識聽潮州戲曲。《辭郎洲》呢套戲，除咗係楚原最後一套潮片，亦都係香港最後一套潮片。不過用計數機計一計，票房有7.1萬，嗰陣啲戲飛就2至5蚊左右，都應該有成兩萬人入場睇架喎，好過依家唔少戲。