【爛鬼Cult噏】《逆緣》夏文汐17歲拍《烈火青春》：只係尺度大膽
《逆緣》夏文汐黎諾懿一段忘年戀成為城中話題，夏姐姐含淚為愛郎拔掉氧氣畢更加係睇到想喊。但其實夏姐姐製造話題一吞向係能手。好似在1982年上映、譚家明執導嘅《烈火青春》講述一班年青人的性同愛情觀念，喺迷失中尋找人生意義，但最後卻將生命燃燒殆盡，當中以夏文汐同湯鎮業喺電車上勁踩界嘅纏綿場面最為注目，更有指上映時因為呢一幕太激，引起教育界不滿，逼使電影停映，要重新剪輯該一幕先可以再上畫。其中一個講法就係夏文汐同湯鎮業喺畫面、劇情上唔止纏綿咁簡單，係直頭喺公眾場面做愛。咁實情係點呢？真係要請Pat姐夏文汐為大家解答喇，身處洛杉磯嘅佢接受《香港01》電話訪問時就咁答嘅：「呢一幕我哋係冇Make Love嘅！」
【爛鬼噏Cult】夏文汐《烈火青春》電車情慾戲都關土地問題事？
咁其實《烈火青春》呢套戲都仲有好多江湖傳聞嘅，包括譚家明用咗成年都未拍完又超哂支，搞到老闆好不滿，因而叫唐基明幫拖快手埋咗個尾佢。而Pat姐就話拍咁耐都未拍完其實係湯鎮業嘅問題：「嗰時佢喺無綫拍緊《天龍八部》，要等佢拍哂先嚟到開工，就係因為咁先未拍完。同埋，我拍呢套戲時冇見過唐基明，一開始到最後都冇。」
講返起呢套戲係Pat姐嘅出道作，上映時得17歲嘅佢就話當時真係乜都唔識：「直頭係黃毛丫頭，我本身都好鍾意睇戲嘅，咁啱有編劇就睇到我拍嘅廣告，就覺得我同《烈火青春》嘅Kathy好似，所以就搵咗我Casting，我當初都唔信係真！最後我真係去到張叔平屋企Casting，佢、譚家明同關錦鵬三個就牛咁眼咁望住我，好似對眼有X光咁，又叫我化妝，又放部攝影機對住我，搞到我好驚，驚到震咗成個鐘。」
Pat姐繼續講：「點知佢哋真係揀中我，我都係抱住玩下嘅心態，但我知道原來套戲張國榮、湯鎮業份就好興奮，我本身好鍾意張國榮，而湯鎮業嗰時係TVB嘅一線小生。」咁其實同湯鎮業拍電車戲尷唔尷尬？我發現Pat姐嘅豪邁真係天生嘅，佢咁答：「真係冇，同埋關錦鵬好保護我，拎咗6條底褲出嚟畀我著。其實呢場戲只係尺度大膽咗少少，香港人比起好多地區都真係幾保守。」
講到《烈火青春》故事中間風格轉哂，最後仲好痴線添，問Pat姐會唔會都覺得有少少九唔搭八？佢就咁睇嘅：「我都覺得有少少奇怪，所以話劇本真係好緊要，千祈唔好虎頭蛇尾，我都唔係好明點解咁突然要叫我死，特登整個Bad Ending出嚟，應該係我同湯鎮業去到我哋想去嘅地方嘛，所以有少少遺憾咁囉，我鍾意Happy Ending多啲。」