【爛鬼Cult噏】《猛鬼佛跳牆》港式恐怖夠貼地　堅揪過《凶榜》？

阿頭睇到我上星期講嘅《烈火青春》條數後，發現真係唔多掂，佢就話不如你寫返恐怖嘢啦，大家都係想睇呢啲。咁我話好啦，但我好強調真係唔係幾好呢味嘢，我本身係一個文青嚟，我比較喜歡睇法國文藝片，仲係邊飲咖啡邊睇嗰隻。然後佢完全冇理我，仲話同事之前寫《凶榜》反應好好，又有人留言話1988年上映嘅《猛鬼佛跳牆》恐怖過《凶榜》，叫我睇下事實係點。咁我明喇，即係無論點我都係今個星期寫《猛鬼佛跳牆》啦，希望大家鍾意睇就推廣下啦，等盤數好啲，我唔想成日聽到我阿頭咿咿哦哦，話我寫埋哂啲嘢冇人睇。

【爛鬼Cult噏】何啟南拍《猛鬼佛跳牆》堅瀨嘢：搵人陪先敢去廁所

【凶榜】最嚇人港產鬼片　角色死狀恐怖　七孔流血狗骨啃死樣樣齊

講返套戲先，于仁泰執導嘅《猛鬼佛跳牆》係由董驃、狄波拉、李麗珍、何啟南同梁小龍主演，故事主要講述董驃升職後獲老細安排住喺九肚山嘅別墅，佢哋一家人搬咗入去之後就成日聽到啲怪聲，包括竟然有人半夜三更唱戲，之後飾演單眼道士嘅梁小龍就經常出現叫佢哋快啲搬，原來係因為間屋曾經死過人，而且係一個京劇大老倌以為老婆紅杏出牆而殺死哂全家，之後隻鬼就上咗董驃身，想殺咗佢哋一家搵替死鬼，好彩梁小龍及時再出場，而何啟南亦搵到梁小龍個師父嘅骨灰做秘密武器，所以最後一班人都收伏到隻鬼。

就咁睇個故事唔會覺得好恐怖，因為都係一個好尋常嘅鬼故，但係于仁泰喺處理電影氣氛上落咗好多心機。最特別嘅係，呢套戲一開始係有大量笑位，去到中段就慢慢收緊，放隻鬼出嚟製造既驚又喜嘅畫面畀大家睇，最後就一口氣將出現董驃鬼上身想殺哂全家嘅場口，等觀眾嘅心情似足坐過山車。當然啦，電影裡面啲鬼嘅造型比起今時今日嘅鬼粗糙得多，與其話佢哋係鬼，不如話佢哋似喪屍仲啱，不過都幾有效果嘅。

至於成套戲最恐怖嘅一幕？我覺得係董驃叔最初被鬼上身嘅一幕係最令人毛骨悚然。董驃叔喺天台雜物房前擺咗個相機陣諗住影鬼，點知冇料到乜都影唔到，落返樓瞓覺嘅佢就無啦啦喺半夜3點幾時醒咗，眼神極度空洞之餘仲開始Set頭化妝，之後佢仲落咗去地牢度搵大老倌嘅戲服著。好快觀眾就睇到佢為自己畫嘅京劇大花臉，然後佢就笑得異常恐怖，甚至可以話有少少變態、發神經Feel。當佢開始騷身手時，戲曲配樂就同時響起，加埋少少Echo嘅中樂，唔知點解有少少邪氣。

呢一幕之所以恐怖，完全係因為陌生感，當電影之前差唔多一個鐘，大家都係聽到驃叔講廣東話，同埋個樣好慈父Feel，但呢一幕佢突然係講京腔國語，個樣仲畫到好似係另一個人咁，觀眾就會覺得隻鬼真係好猛料，令到驃叔變成咗一個陌生人。如果驃叔俾鬼上咗身之後，依然係講廣東話，即使佢係唱粵劇，都唔會有呢種效果，就好似我哋香港人、廣東人咁，對來自北方嘅內地人，點都有一種距離，視佢哋係另一種人嘅感覺。至於《凶榜》定《猛鬼佛跳牆》比較恐怖？我覺得真係兩樣嘢嚟，《凶榜》最犀利嘅係你對未知嘅恐怖感，《猛鬼佛跳牆》就係對異類嘅恐怖感，但《猛》就貼地啲，因為香港地九成人都搬過屋，香港地日日都死人，真係唔知幾時咁唔好彩搬咗入一間凶宅。