【香港渴睡．圖輯】千位地盤工休息室10呎 橋底才是他們的海之戀
天橋像一道彩虹劃過工廠群，就夾在有線大廈與荃灣海濱的中央，抬頭望着橋底有一種豪宅樓底的崇高，寬敞的空間下嗅到自由，還有海為午飯送來一點風。自從荃灣西海邊築起圍板，每天地盤工友11時半放飯，中午12時左右，定時定候進來發個好夢。一張長椅，就是一張床。有一個工友在長椅上側躺，右腳掛在椅背上，像擒着一個女人一般。
「有工人會為咗個休息的地方而揀地盤。有人鍾意呢度休息，所以鍾意喺度做地盤。」一位在橋底下休息的年輕工友說。吓？「係啊，我有個朋友，之前喺呢個地盤做嘢，走嘅時候佢話：『好少有咁涼爽嘅地方！』」大概，「海之戀」就是這種情感。
學生：９歲學生求助 ４成小學生唔夠瞓 醫生建議推遲上學時間１小時
渴睡症病人：被鬼壓＝渴睡症？病人一周被炒 醫生：補眠亦可控制病情
法國人看香港：【圖輯】居港法國女人街拍港人睡相：最初以為他們死了
「休息室？未聽過喎！」地盤內架步只有10呎
「海之戀，是哪間發展商？」他們答不出來。「啱就做，唔啱就唔做。」哪管他是長實還是新鴻基，他們從不依循承建商下達的時間表休息，「我們有自己的文化。」因此，他們更沒可能答出哪承建商提供的休息室最好。反正休息室，即是行內人說的「架步」，都只是十呎左右。「每個判頭都有一個房仔畀你坐，只係放件衫。喂，你係工人嚟㗎，仲想點？」一個當了30年地盤工的黃生說。入行只有4年的年輕工友阿威，甚至沒有認出「架步」就是自己的休息室。「休息室？咪玩啦！我做咁耐都冇見過。有啲地盤有個涼亭畀你囉，細細個都坐到八個人。」記者問：「會否覺得休息室不足？」黃生以一貫打工仔的語調：「冇辦法㗎，鬼叫你窮啊，你都要接受現實㗎啦！」
後悔來港的內地工
一個剛從內地申請來港做地盤工的李生：「我申請咗一年。」他以為香港工資好，福利好，還會有歐陸風情，「點知，原來都係咁。大陸地盤起碼有兩個鐘休息，呢度得一個鐘左右。」雖然這個橋底已經是他見過最好。「內地的橋底哪一處都是尿。」一小時放飯時間，他們倒飯入口，十分鐘至十五分鐘左右吃完，就趕快過來睡，畢竟這裏「床位」有限。黃生：「通常一個鐘食飯，遠就畀多半粒鐘你。荃灣呢區都好辛苦，地盤行過嚟工廠區食飯都十分鐘。」對他們而言，睡比吃重要。
總之瞓到嘅地方咪瞓囉！
要一撻低就瞓著，算是地盤工秘笈中高難度的武藝，經過長時間的修煉而成，小朋友切勿模仿。年輕工友阿威入行四年，「老一輩人一撻低就瞓著，我唔得，都係養吓神。入行慣咗喇，要瞓吓。」如果房子是花，他們就是草；出現與消失依附着花開花落；他們又像城市中的遊擊隊，四處奔走，躲躲藏藏。地盤是熔爐，可以的話他們寧睡在街上。記者理所當然地問：「哪一區最難揾位瞓？」他們卻口徑一致：「我唔會關心公共空間呢啲嘢，唉，總之瞓到嘅地方咪瞓囉！」
停車場？後巷？記者好像說中他的心事，阿威竟然興奮地和應：「係喇係喇！你有心揾就會揾到。」再肥大的老鼠，再小洞口也能穿進去。水窪、垃圾，點頂？「接受到。地盤夠污糟啦！我哋唔同你哋㗎，我哋喺嗰啲環境生長。側邊有污水，整唔到我污糟，我當係贏，我瞓嗰個位冇垃圾咪得囉！」記者問：「同老鼠一齊瞓喎！入行時過到自己嘅心理關口？」他們說記者身嬌肉貴，無法想像真漢子的能耐，「人哋覺得唔污糟，你吹佢唔漲，你唔可以將自己價值觀強加於人」，「我哋係真漢子喎！我哋做正當職業，靠自己雙手揾食，點會過唔到自己心理關口！」「我會驚老鼠？老鼠仲驚過我啦！唔會理佢囉！」
只要有陰涼處，就是好地方。他們可以睡在隧道的梯間，亦可以睡在一排鐵馬上，「夏天地下好熱，睡在鐵馬上較涼快」；即使他們鞋靴戰績斑斑，卻脫下來當成枕頭，席地而睡，「太貼地下會好頭痛㗎，真係好痛。」
不過，總有些人數十年來無法無視過路人的目光，黃生三十年來放飯後就只會坐，不會躺。「過唔到自己，屋企瞓先心安理得，唔鍾意啲人周圍望住。」
接受到。地盤夠污糟啦！我哋唔同你哋㗎，我哋喺嗰啲環境生長。側邊有污水，整唔到我污糟，我當係贏，我瞓嗰個位冇垃圾咪得囉！」
市區插針樓地盤、毫宅區最難揾位瞓
最難揾位瞓的是市區中的插針樓的地盤，地盤內空間小，九龍市市區人來人往，「唔通我喺彌敦道瞓咩！」又或是是豪宅區，如港島寶馬山道、大埔白石角，阿威：「係啲阿婆會白鴿眼，以為自己身光頸靚，睥吓你！」，黃生：「佢哋啲表情我呢世都學唔到，令人難受。但又唔敢出聲，覺得地盤工人係黑社會，會打人！」於是，他們會叫外賣，寧願在地盤內塵土當飯汁送進肚子。
「痴線嘅，我哋做地盤預咗啦！污糟唔使做啊？做地盤除咗污糟冇乜唔好，好過寫字樓啲人桶你一刀。」
用紙皮搭建的豪宅
好污糟喎地盤！「痴線嘅，我哋做地盤預咗啦！污糟唔使做啊！做地盤除咗污糟冇乜唔好，好過寫字樓啲人桶你一刀。」即使霧霾他們也能酣睡到日落。一個休息室，容不下一千個工人，「裏面要自己照顧自己，自己揾掟匿。」阿威說。地盤工人起房子的，內裏有紙皮、有磚、有桶、有竹棚，手到拿來為自己建豪宅。高空工作的就睡在竹棚上，在地上的，「舖塊紙皮就瞓得著。」「啲人仲可以自己整靚佢，搭啲板，搭高佢，釘板，釘間木屋咁，好叻㗎！」他們甚至說自己「起咗疊毫宅」，裏面有幾個廁所，幾個廳，「自己起，自己瞓返。」難受，唔甘心？「唔會。自己起嘅，只會知邊啲呃呎數，邊啲唔值呢個價。」
最後，記者問他們睡在橋底能否發一個好夢。阿威說沒有學歷又想賺錢，就要做地盤工。有些前輩放飯唔瞓就聚賭，心裏大抵有一個想發達的夢，後來清醒了，就乾脆眠一眠。語罷，他穿回上衣，「喂，唔講喇，開工先。」