【不懂撒嬌的女人】唔怕鬧最怕你唔睇　編審：網民意見係一種鞭撻

01：香港01　關：關樹明（監製） 　朱：朱鏡祺　劉：劉小群

01：點解會創作《不懂撒嬌的女人》?

朱：開之前做好多research，原來香港女人，30歲以上的女人，三個係有一個嫁唔出，咁嫁唔到嗰啲會點呢？佢哋會發生咩事呢？其實故事就係呢到諗起，跟住再睇到啲數字，原來香港男人娶內地女人係佔三至四成，即係有得揀嘅話，每10個男人係有3至4個娶內地女人，亦即係話內地女人係開始搶晒我哋啲男人喇，但仲有台灣女仔喎，近年港男娶台灣女仔每年都係咁升，係以倍數咁升，數字唔大，但升幅好大，即係如果以結婚嚟計，香港女仔輸俾國內嘅好犀利，而台灣女仔亦急起直追，故仔就由呢到做切入………

01：《不懂撒嬌的女人》同以前的劇集，製作上有什麼不同?

關：拍之前有好多圍讀，排戲，演員會喺過程中同我哋多咗信任，係編劇、導演一齊傾，演員就會知道幕後原來想我哋咁樣演，對白講出嚟喺邊個層次，節奏係點，經過排練之後，現場正式拍嗰陣就一定更理想，台前幕後係好有心去做同一件事，而我哋劇入面有啲角色，演員係要casting去爭取個角色。而幕後美術都會傾場戲嘅色tone、場景嘅光源點嚟都會一齊研究。

朱：我哋編劇都參與過一次講演員化妝嘅會議，導演、梳頭、化妝嘅部門喺晒到，大家討論邊一隻化妝品啱4K，我哋討論得好仔細，每一隻我哋都做sample，宣萱啱咩色？ 唐詩詠又邊隻襯呢？我哋都一齊研究，我哋用咗好多前期時間去做，希望每一個參與台前幕後都明件事，可以俾劇本嘅，我哋都盡量畀，以前攝影師未必睇劇本，但我哋一定俾，我哋設計故事初期，導演已經參與，到之後排戲我哋編劇甚至其他部門都會去睇，我哋咁做係想台前幕後都覺得自己係同一個方向做一件事，希望做啲新嘅嘢畀觀眾睇。

關：或者補充少少，以往嘅製作方式，成本效應係好高嘅，我哋今次其實試下另一種，我覺得兩種唔同，好難作比較。

（以往無綫劇集製作模式，題材例如開不開續集，拍爭產定宮廷？全部由極高層決定，之後監製、編審接order創作故事，導演參與創作是極少數，導演在劇本架拿劇本自己揣摩怎樣拍攝，編劇亦不會參與製作，而事前排戲更加沒可能，去到拍攝當日現場，導演和演員先至第一次一齊睇劇本，然後即刻拍攝。)

01：網民見到TVB就話膠劇唔睇？點面對呢？

朱：我個人嚟睇，我哋要面對現實，網民就算寫得幾衰或者幾離譜，我哋都要睇，唔係網民踩我哋，我哋就唔理佢，當然亦要篩選，但睇完，我哋要問心，有無誠意去做好人哋話我哋不足嘅地方呢？我哋係要與時並進㗎，電視台競爭係大咗好多，事實上同緊好多嘢比較，可能係美劇、韓劇呀或者其他，佢哋世界唔同啦，製作數字啦，我哋係香港電視台，我覺得我出個心，去認真做香港嘅電視劇，想睇下香港人反應點？網民有咩意見我都想知，因為都係一種鞭撻嚟嘅。我好相信有誠意，佢哋係睇到。

01：網民好怕見到「煮個麵你食！」或者主角講自己心聲出嚟，呢套有冇？

劉：其實我哋都好驚呢樣嘢，除非必要，否則都唔會有….

朱：以我睇返呢套劇啦，唔會出現多過兩次囉，唔係話呢種方式唔好，但我覺得唔係好需要呢樣嘢囉。同埋戲劇戲味應該由演員帶動出嚟，有時心聲唔講出嚟，係仲好睇。「煮過麵你食！」呢套一定冇呢句。

01：我只得1個鐘時間，點解我唔睇美劇、日劇、韓劇，而要睇《不懂撒嬌的女人》?

關：我覺得香港人，某程度上都好想睇講廣東話嘅劇集，我哋共鳴感一定唔同，我冇辦法扭轉佢哋攞嚟比較，但做咗自己本份先，如果我哋做得好，佢哋係會返嚟，問題係我哋係咪做到佢哋想睇嘅劇集呢？

朱：我覺得香港人想睇自己嘅故仔，就好似《城寨英雄》，觀眾想睇武打同本土味，《一屋老友記》因為有啲親切嘅演員，《親親我好媽》就講怪獸家長，呢幾套受歡迎，就睇到香港人係想睇講廣東話、香港發生嘅故事。