【不懂撒嬌的女人】香港係A Cup之城？　孫慧雪：乜嘢size都靚

無綫劇《不懂撒嬌的女人》，有久違了的宣萱及林文龍，飾演一對鬥氣冤家，甚至是彼此下屬也要壁壘分明，偏偏宣萱堂妹兼助手唐詩詠，卻跟敵對陣營的黎諾懿相戀，但這對情侶卻似乎冇好結果，在首集唐詩詠已經遇上北方佳麗的挑機，在身材比拼上先輸一仗。

劇情講到唐詩詠到內衣店揀選內衣，而店員兼好友的孫慧雪，已預先為她留下了一件熱帶樹林圖案的內衣，更笑說香港是「A Cup之城，而好友就是港女代表」，不過她之後呻自己入錯貨，訂了不少A Cup及B Cup的內衣，但內地客買親也是C、D、E Cup。睇到這裡估計絲打們肯定不同意，覺得劇情講到港女一定是A Cup，難免有點以偏概全，而且在男女關係上，亦不一定只是由身材出發，顯得編劇眼光相當膚淺。

最令姊妹忿忿不平的劇情，相信是講到阿雪讚內地女仔，「中國地大物博，有成廿幾個省，四川就辣，蘇州就滑，大把嘢揀，香港得19區，仲要區區都係妳呢啲「黑面呀」、「細胸呀」，輸晒啦。」但若然睇返該劇背景，原來是打算賣給內地愛奇藝，只是最後未能成功，為何港女變晒黑面A Cup之流，明白晒。

不過在劇中介入黎諾懿及唐詩詠之間的小三，偏偏是身材驕人的上海姑娘白雲，不但搶走了唐詩詠揀中的內衣，更嘲笑說：「32A這麼小，能穿嗎？」其後更說要買來送給11歲，剛發育的小妹，弄得唐詩詠哭笑不得。此時白雲跟黎諾懿用免提講電話，讓唐詩詠知悉對方竟然是小三，雖然悉破了男友出軌，但唐詩詠仍繼續啞忍，更跟堂姊宣萱表示自己已經32歲，不想放棄4年的感情，一臉委屈，看得一班絲打又激氣，又感同身受。

阿雪接受《香港01》訪問，對於女仔會否緊張自己身材，她表示：「女仔圍埋都會拍吓對方個胸，但唔會好緊張size，始終都要襯返身形，無論乜嘢size都有佢靚嘅一面。(劇中講到港女輸給內地女仔？)香港女仔夠獨立自主，好多女仔都勤力，肯捱肯博，同個男朋友供樓咁，香港女仔都有值得欣賞嘅地方，仲有一樣嘢，好多朋友都講，香港女仔嫁咗之後，係溫柔過未嫁嘅。」不過阿雪強調男友或老公有小三，就一定不能姑息，「唔應該忍囉，一路忍嘅話，底線會一路低，人哋就會踩妳嘅底線㗎啦，可能會錯一世，所以快啲完結咗去，長痛不如短痛，一定會有個更好嘅。」