環球小姐2024｜大熱候選佳麗甄蕎唔怕被爆黑材料：身正不怕影子歪

香港區「環球小姐2024」（Miss Universe 2024）經過首輪海選面試後，成功選出16強佳麗，大會今日（2/9）於尖沙咀舉行記者會，並安排16位候選佳麗會晤傳媒。其中一位候選佳麗10號甄蕎（Yan Kiu）現年29歲，憑著仙氣外貌令人眼前一亮，成為大熱之一。

甄蕎接受《香港01》訪問時表示：「點解我會嚟參選，係因為就嚟踏入30歲，我好想挑戰自己，因為平時嘅我係好怕醜同埋講嘢唔叻嘅人嚟，希望透過呢個比賽令自己成長更加有進步。（怕唔怕被爆黑材料？）咁又唔怕，我就覺得身正不怕影子歪。而我之前做直播嘅時候，都曾經被網民攻擊，當時嘅我會好有反駁慾，但身邊嘅人會提醒我唔需要太在意佢哋每一句說話，令我明白到唔需要太過介意外界嘅聲音。（你有冇夜蒲？）我唔夜蒲，但細細個嘅時候都有落過Club，去過酒吧嘅，但我自己就唔鍾意飲酒嘅。（怕唔怕細個夜蒲照曝光？）哈哈，歡迎呀！我唔怕。」