環球小姐2024｜莊韻澄參選遇婚變被迫退選：無謂去騎劫個選美活動

莊韻澄（前名莊端兒）今日（2/9）現身尖沙咀為香港區「環球小姐2024」（Miss Universe 2024）記者招待會擔任司儀。莊韻澄接受《香港01》訪問時表示：「其實我點只做司儀咁簡單，我仲要係臨時拉夫照顧一眾候選佳麗，雖然辛苦，但都冇問題，因為佢哋都好易湊嘅。同埋其實我係好想選，但無奈咁啱嗰陣時又發生咗家事，變咗我無謂去騎劫個選美活動，所以我就退咗選。然後我就做咗湊女嘅工作同埋MC嘅工作。其實我未做過幕後嘅嘢，首次接觸又覺得幾好玩，因為可以學到唔同嘅嘢，令自己再識多啲嘢，成件事係好開心。」

對於早前宣布跟老公呂成忠關係決裂正式辦理離婚手續，呂成忠繼而在網台公開家中閉路電視影片力數她不是。莊韻澄感到無奈說：「其實見到啲片係有啲唔開心，如果佢真係識諗就唔會掟啲片出嚟，咁所以而家出手制止都冇用，而家都睇晒。（有冇考慮過出禁制令制止對方？）有考慮過，但唔想咁樣做。（大家有冇聯絡？）係有嘅，因為要俾佢知個仔最新嘅情況。而佢喺電話中嘅情緒態度都正常嘅。」