【回歸20載】青年受CY「鼓勵」逃出去　老人回流嘆還是覺得香港好

回想九七當年，本港湧現移民潮，盧興祥趕在中國五星紅旗在港高掛之前提早退休，舉家逃往加拿大，後來難抵當地生活苦悶，輾轉回流返港教英文，做導遊、領隊、義工。
面對近年又傳來一陣移民聲音，不少青年欲出走他鄉，盧興祥這個過來人語重深長說：「未去過以為好理想、好憧憬，但去過之後，你會發現第二度未必好過香港。」

1997年前夕，政府曾統計每年平均有5萬人移民外地，67歲的盧興祥是其中一員。他自60年代在港任職消防員，從沒想過要移民，直至1989那年六四那夕，他對中共政權信心盡失，於是趕於1996年提早退休，賣樓套現，舉家遷往加拿大，避開那面五星旗。

難抵加國苦悶　寧中港兩邊走

主權移交那天，他人在加國，已鮮有留意香港事。回想那段加國歲月，他每天到公園散步、練氣功、看電視新聞，「我識有朋友悶到喺街邊畀6蚊加幣，搵人同佢傾偈」。難抵生活苦悶，他與太太再移居美國，經營餐廳過日辰，卻又遇地震、黑幫搗亂、流氓打劫，「做咗十年，一路『倒錢落海』」。

退休金蝕得七七八八，他2000年隻身回老家打拼，無錢無樓，唯有到深圳平租單位居住，每天花個多小時來港，做過英語老師、本地導遊、帶團領隊、消防顧問。

沙士趁生活費平　回港定居

兩地穿梭的生活直至2003年沙士爆發，本港酒店大跌價，他索性來港住酒店，「住足一個月都係3,000幾蚊，好鬼抵！」後來他儲錢，付了80萬元首期置業，與太太現居北角，預期72歲就供完樓。現時他做義工，打草地滾球、羽毛球、網球、乒乓球，又到海洋公園做導賞員。

兜了一圈，還是回來了，對比20年前，他指以前「大家好聽話，無咁民主，但社會穩定」，如今社會相對動盪，年輕一輩尤其躁動，聽到不少人高呼要移民，他這個過來人卻不以為然。

要去台灣，台灣都好亂吖。未去過以為好理想、好憧憬，但去過之後，你會發現第二度未必好過香港。成日話香港無自由、無人權，但去到外國，人哋警察突然衝入屋就搜，無事講聲sorry就走人。

廿年移民人數現跌勢

參考保安局估計移民外地數字，廿年來大致呈現跌勢，由1997年的30,900人，逐漸滑落至去年的7,600人，當中以遷往美國的佔近四成，其次是澳洲和加拿大。

38歲的Howard一家四口，今月正式移民英國，主因是為了一對兒子。在港經營攝影公司，家庭月入7萬元，他們一家屬比上不足、比下有餘，2009年趁金融海嘯，用200餘萬元買下500呎青衣單位，之後兩度添丁，「車仔、屋仔、老婆仔、BB仔，我全部都有，但睇遠啲，前景好灰暗，甚至見唔到前景」。

難忍港式「教育列車」

港式教育氛圍，成為他們一家的主要壓力來源。他們極力捍衞兒子有個愉快童年，沒報學前班，選了一間愉快學習幼稚園，但大仔即將升讀小一時，周邊家長們一口氣報十幾間小學，一間200個學位的小學接到5000人申請，夫妻二人無信心抵擋本地升學壓力，卻負擔不起國際學校每年十數萬學費。

他以自己為例，自小深愛攝影，但教學氛圍是「攝影搵唔到食」，於是他大學時選讀機械工程，但畢業後從未做過工程，他不想兒子重蹈覆轍。「香港嘅教育好似一架火車，所有人上車，跟住路軌行，外國教育就似私家車。火車係快、安全、穩陣，但得一個終點，揸私家車就可以自己諗，行山路、平路、泥路都得，上山下海亦得，唔同性格嘅人可以發揮專長。」

「CY（梁振英）政府鼓勵我走」

除了教育困境，他亦不滿政府近年的處事方法，「CY（梁振英）政府鼓勵我走」，自2014年雨傘運動，政府處理差強人意，後來鉛水事件，無人要負責，「當年梁錦松偷步買車慳幾萬蚊，都要辭職，𠵱家陳茂波又劏房又屯地，就搬出老婆個親戚，但原來係佢個仔，咁就過骨」，他難忍不合理的事不斷發生。

去年他花了300萬元辦投資移民，放棄了香港生意，到英國從新開始，有太多取捨，但放在小朋友面前，其他都可以略去，「我知道自己係放棄咗一個好地方，但我係去咗一個更好嘅地方」。他們一家現居布里斯托爾（Bristol），他打算最少待6歲及4歲兒子完成學業，方考慮回流與否。

回歸廿年，我仲好鍾意香港，因為有好多朋友喺度，但回歸就唔關我事嘞，因為我唔鍾意呢個政府，一個唔幫市民嘅政府