【社區小小事】裝修一肚氣　判頭搞網頁做中間人　幫你同師傅拗數

都市人生活忙碌，因此不同的服務配對平台應運而生，按照顧客指定要求和條件，為他們找尋合適的服務提供者，省時又方便。近年連裝修服務都可以「配對」，由平台擔任客人與裝修師傅之間的溝通橋樑，避免了不少不必要的糾紛，至今亦有不少成功案例。不過平台愈出愈多，他們是如何在眾多對手之中突圍而出？
攝影：梁鵬威

於去年成立的「裝修兄弟」，其營運總監Ming指，他們的網絡內現時已有超過300位裝修師傅，主要是裝修全科：「叫得裝修兄弟，師傅就係我哋嘅好拍擋，我哋會喺多方面支援裝修師傅，補充師傅不足，跟進成個工程。」他表示，公司設有「項目管理團隊」，除為客戶解答裝修疑難，亦為師傅提供報價，並會管理及監察工程進度，相比其他只做轉介的平台，他們更注重跟進工作。

「我哋主要會根據地區、客人預算、裝修風格、工期同裝修師傅嘅繁忙程度去判斷，施工前都會傾得好仔細先開工。」Ming指，所有加盟的師傅都要經過面試，期間會有專人到師傅現有的裝修單位進行工藝檢視，一旦師傅和客人出現爭拗，他們會盡力調解，「試過有一次客人投訴裝修師傅剷舊油漆時唔夠徹底，我哋聽完雙方理據，派咗裝修專員到場視察，好快發現遺留喺牆上嘅係好結實喺『水油』，一般做法都會保留。我哋向客人講返結果，個客最後都理解。」

Ming解釋，顧客可以選擇簡單報價，例如只提供樓盤位置和大小，即可迅速獲得估算的所需費用。客人亦可以找來師傅上門度尺，然後再安排報價。當雙方達成共識，可以完成交易，客人向師傅直接付款，平台則會向師傅抽取一定百分比的佣金。但假如客人和師傅私底下再調整價格，令佣金金額變少，平台負責人又可怎樣做？「靠個信字咋，不過除咗配對，我哋仲有mon（監察）住成個過程，所以斷估客人都會依賴我哋，唔會呃嘅。」

他們認為，不少裝修爭拗其實都源於溝通不足，因此管理工程項目時會清晰紀錄每項細節，時刻監測工程進度，為不擅溝通的裝修師傅向客人解釋和調解，至現時為止，每月查詢的個案已達數百個，期望未來幫助更多客人和師傅完成工程。

另一裝修平台「好師傅」則於約5年前成立、3年前開始全力運作。創辦人Woody指，最初見到身邊朋友陸續結婚買樓，但大部分人都是「成世人先裝修一次」，對裝修毫不了解，同時容易與師傅產生磨擦，本著「哪裏有痛點，哪裏就有商機」的理念，創立了香港首個裝修服務平台。「某啲公司只係著重開單，但開單只係開始，點樣畀個好嘅裝修體驗先係最重要。」Woody指，平台上每位師傅都經過嚴格篩選，未來亦希望為裝修不同流程和工序制定標準，以確保工程質素。

除了著重裝修工程，近年Woody他們亦想出不同方法「出奇制勝」，包括為客戶提供裝修物料品牌折扣，甚至是「折上折」，亦與金融機構合作，為客人提供裝修貸款，紓緩香港人上樓後被榨乾的財政壓力。Woody指，平台成立以來已完成1100單全屋裝修設計，現時每月裝修額亦已有1500萬以上。他認為相比gogovan、uber等，裝修服務的時間較長，因此經營裝修配對平台難度亦較高，但未來他們仍計劃，希望能衝出香港，嘗試在其他地方發展業務。