【社區人語】申風扇失敗、尼龍制服生熱痱 保安如何渡過漫漫長夏
訪問這天有驟雨，天文台還未發出酷熱天氣警告。誰知，一踏進沒有冷氣的單幢式大廈保安處，如進桑拿室，才發覺室內還可比室外酷熱——工作崗位沒有窗，沒有涼風，要巡邏的後樓梯更是密不透風。攝影師才工作一會就滿頭大汗，秋叔笑說：「哥哥仔你企多陣都標汗啊，哈哈！」
秋叔當了保安員28年，曾在公園工作暴曬當值、在工廠大廈停車場承受貨車引擎散發出的熱氣、在沒有冷氣的住宅大堂忍受悶熱，如此練成忍耐力。他說，農曆6、7月是一年中最熱的時節。但不論天氣如何酷熱，保安員也不能赤膊上班，一定要穿上整齊的公司制服。然而，這些制服多是尼龍物料，侷促且不散熱，長熱痱已是行內的共同體會。夏天工作的保安員又能如何應對？
攝影：歐嘉樂
只能執拾客人棄置的風扇
秋叔今年已經73歲，公園、停車場、商廈、商場、工廈、住宅通通做過。他說，用「的確涼」布料的保安制服是可遇不可求：「但係好貴，快乾、涼爽、通風好多。一般啲保安公司，多數都係棉質。Cheap啲嘅公司多數用尼龍，尼龍就好焗好熱。」 有的公司配備整套制服，包括上、下身；有的公司更會配備針織外套、雨衣、大褸，有的卻只有上身制服，下身要僱員自備。
秋叔自言年輕時多在大公司工作，曾享受過夏天有空調設備的工作環境。但是，根據《保安及護衞服務條例》，65歲後只能在單幢式大廈從事保安工作。秋叔當上了替工，四處工作，他說單幢式大廈的保安公司多是較為小型，而且制服多是尼龍製，工作大堂9成是沒有冷氣，配備卻通常只有一個熱水壺；他們別無選擇，有如「硬食豬頭骨」。他說，那裡空氣流通差，非常侷促。有風扇嗎？秋叔笑說，有些沒有，即使有也是殘舊不堪，「我仲行得快過佢」。
「嗰啲風扇都係啲行家巡樓，啲客唔要揼出嚟喺後樓梯。執唔到？就冇㗎啦，公司唔會買。」他說得輕鬆，早已看化。
巡樓悶熱難耐 帶備「開工三寶」抹身換衫
秋叔多返早更，7時開始當值，待住客的上班時間過去，約9時多就開始巡樓。他先乘電梯至最頂層，巡查天台設施，再沿著後樓梯逐層落樓巡查、簽簿回最低層。後樓梯的防火門長時間關著，整條通道密封，間中有幾層有氣窗能「唞唞氣」，樓梯間儼如另一世界。秋叔說，通常每天巡樓兩次，上下午各一次，下午更熱。
「咁你都要默默接受㗎，唔通你唔打呢份工咩？」說罷，他拿出「開工三寶」：一公升的水樽、毛巾和後備制服。
每次巡樓後，秋叔都會爭取時間，帶著毛巾和制服到廁所抹身換衫：「有時一巡完樓落嚟成件衫濕晒，真係好誇張，前後都濕晒。如果你唔抹身，好容易有瘡有熱痱。如果積住唔抹，一定會有，問題係多定少，因為散唔到，啲汗噏住。」更換乾爽的制服，他就要直至下班才能換衫，「（下午）巡一次樓再濕埋，無㗎啦，得兩件咋。（當晚）你即刻要洗啦。」
然而，能剩時間去廁所抹身的那天，已是幸運。畢竟他們只有一小時的午膳時間，再沒有其他休息時間，因此只能把握上廁所的10多分鐘來換衫。若碰巧有客人查詢，他就不能離開，「啲客問你，唔通你話我去換衫啊。唔得㗎嘛！應酬咗個客之後，已經過咗時間冇抹過身，咪噏住囉。」他說，大眾多以為保安遊手好閒，其實保安就如「大廈總管」，住客被困升降機、喉管爆裂、停電，事無大小都要處理，「我睇緊電視冇電啊、冇鹹水啊。電話都打爆你嘅。」
點擊看秋叔的工作日常：
公園工作暴曬 同事長滿熱痱：背脊好似地圖
秋叔說：「都唔係即刻生（熱痱），但係日子有功幾日唔抹，你都幾係嘢，一定有熱痱。」保安員長出熱痱原來是普遍的情況，秋叔還記得以前在公園工作時，有工友更長得渾身是熱痱：「一剝件嘢，嘩！乜你個背脊好似地圖咁樣！」
他說，在公園工作的保安，巡邏的地方全是露天，只能烈日下乾煎，或是趁著管工看不到時短暫躲在一處遮蔭。因為雨傘不是制服一部分，也不能拿來遮擋太陽，只有下雨才能使用，「當緊更落雨就得啦。如果唔係，你擔把遮做乜？會俾人問㗎。」他說，政府公園或屋邨與保安公司合約每次只會簽2、3年，所以也不用奢想會增設太陽傘：「邊個畀物資啊？買把風扇都係（回應）得得得啦。問題係公司肯唔肯畀呢啲錢，值唔值得揼咁多本？之後投到一個盤唔需要咁多遮，咁畀邊個用？」
整天下來只有午膳時間可以躲避陽光休息，1小時裡只會用10多分鐘吃飯，然後就會去公園的更衣室沖身、洗面。抹走汗水吹風扇，他說得回味：「係得嗰剎那享受吓，夠鐘啦又要面對。」他說，自己也不願在烈日下工作：「邊個話係自願㗎，日日都30幾度點捱？」
客人投訴保安塗藥膏：佢係咪有病？
行內人都用一款熱痱藥膏，感痕癢就會塗抹救命，就如夏天被蚊子叮過紅腫，很多人會塗藥膏止癢；然而，不是所有住客都能接受保安塗藥膏：「會避免唔好俾啲客人睇到，對住啲客實投訴你㗎。」
他說，曾經有同事塗了藥膏，當值期間被客人看到「一撻撻」：「啲客人見到，嘩！ 呢個（保安）做咩啊？有個客人就好奄尖，打上公司問，你個伙記喺座頭咁樣搽，你個同事咩事？係咪有病啊？」秋叔說，後來公司下達指示，著員工在客人看不見的地方才塗藥膏。他不好氣地說：「你睇下幾誇張，乜嘢人都有。」
爭取一把風扇：公司得個得字
秋叔同時是香港物業管理及保安職工總會理事，爭取過標準工時、延長保安工作年紀，歷程幾許艱辛，但爭取一把風扇同樣困難：「梗係問過啦，好熱啊想買把風扇啊，好多工友問過啦，得個得字，就唔買㗎啦。 所以就叫做『得得公司』。」
問過保安公司，他們總以「得得得」回應，再無下文。秋叔曾試過向大廈法團表達，希望在大堂增設風扇，「法團咩都係假，一講到銀紙就耍手擰頭，叫你公司買啊嘛。我哋曾經面懵懵都開過口，真係瘀爆。」
他說，工友曾經向公司表達過制服的問題，尼龍製的制服在夏天難散熱，冬天缺乏大褸，「但係講就即管講，根本做唔到。一句講晒，佢有件制服畀你都叫做僥倖，有啲有衫冇褲。工友都係默默承受，一句講曬你認為呢間公司唔happy咪唔好做囉。但係單幢大廈通常都係細小公司，通常都係咁。」
這群過了65歲仍要為口奔馳的保安員，選擇不多，工作地點的配備比不上大商場、商廈，向公司要求添置風扇「嘥gas」，秋叔道：「就算再追都係冇用，一樣係咁樣應。已經慣咗㗎啦。」
抹完身，秋叔點起一支煙向我們道別，又再回到工作崗位。