【長期站立】當保安16年腿外彎不計工傷　自費睇醫生、年假當病假

香港物業管理及保安業總工會與零售、商業及成衣業總工會於今年3月至5月訪問268名服務業工友，近6成受訪者每天站立逾8小時，當中近6成受腳痛困擾，3成多更患有靜脈曲張、筋膜炎的下肢疾病。她說：「如果一路都係咁樣，就算係後生過我哋，以後都係同我哋一樣。」
她是美雲，今年62歲，當了保安16個年頭，膝頭軟骨磨蝕，走路時傾斜在一邊。她還記得清楚，某個當值的晚上，膝頭痛得動彈不得要送院治理。醫生屢勸她轉工、做手術，指她下肢勞損嚴重，無法再應付長期站立、走動的工作。然而，這些年來她為了生活，仍選擇「死頂」，每天吞下止痛藥開工。
攝影：顏寧

巡樓每層計時、「挨」牆借力休息有損形象

做保安以前，她原本在電子廠工作，每天巡查線路板製作，站立比坐下的時間多。16年前，電子廠北移，她快到50歲時才丟飯碗。她和丈夫還要生活，日間要帶父母覆診，美雲於是在私人樓、公共屋邨當起夜班保安私。起初，她雙腿還未有痛症，只覺疲累：「巡樓係辛苦，但係未腳痛，只係覺得好攰。」

現在，她於商場工作。每天工作的8小時裡，除了巡查停車場、水房、電錶房，還需要巡樓4次，連同天台一共5層，「之」字型穿梭兩旁的後樓梯，每趟爬上爬落200多級樓梯；中途有多個「打鐘位」，每個「打鐘位」之間不可多於4分鐘，或少於2分鐘，美雲捱著腳痛完成一天四場的時間競賽：「限定你嘅時間，腳痛時行樓梯，淨係急急腳、急急腳咁囉，冇時間畀你點樣去休息。」

她說，有些新人還未習慣，「企個零鐘已經攰到不得了。」即便如此，他們也不敢靠在牆上借力休息：「有時返日頭想挨下，主任行過都鬧。佢哋覺得唔好睇啊嘛，有損佢哋嘅形象。」除了主任，無處不在、無法辨識的「神秘顧客」同樣監視著他們，不知何時就被偷拍：「有啲同事畀人扣咗分，就要照肺。」

8小時工作只有30分鐘吃飯休息

相比日間保安，美雲相對地幸運，夜班保安同時負責記錄工作和巡邏，值班開始和完結時，她有機會坐下10分鐘工作：「報更、做過啲咩要落簿，嗰時就喺度坐10分鐘。」這8小時裡，她只有半小時的吃飯時間和「落簿」的10分鐘才能坐下，全程不是站立，就是巡邏。

撐不住時，你們可以到休息室坐下休息嗎？「我想話畀你聽，我哋嘅休息室就係廁所。」美雲工作的地方連儲物櫃也從缺，個人物品只能鎖在電錶房裡，更遑論休息室。想坐下休息，四周沒有椅子，只好借去洗手間之名坐在廁板上休息。

曾花四分一薪金做物理治療 

美雲長期站立和巡邏，磨蝕了膝頭軟骨。入行初時，膝頭只是偶爾疼痛：「嗰時痛唔覺得係乜嘢，係覺得行路嘅時候 ，有時咁啱行正嗰個位（疼痛處），痛到眼淚都標埋，但唔係成日係咁。」到私家專科醫生看診，那時已勸喻美雲要減少站立，多休息。為了生活，美雲沒有暫停工作。有時膝頭發炎腫痛，需要做物理治療；她當時每月領取4000多元的薪水，動輒花上四分一的薪金診症治療：「點做落去啊？做落去連飯都冇得開。」

醫療開支沉重，為何不到公立醫院看病？「私家普通科話一定要睇咗係咪骨有事， 一定要轉咗去專科睇咗先，然後先同你轉去政府。」 每當美雲請醫生寫信，總會回應：「睇下點先啦、下次先啦。」看了10多次私家醫生，她才得到轉介信：「我真係冇錢睇，成日都求人哋寫信轉介我去政府。你求唔到都係要睇佢，睇咗十幾次先至肯同我寫信。」

自費買氣墊鞋、年假當病假

工作長期站立，久而久之磨蝕膝頭軟骨。要自掏銀包看醫生之餘，更要自費買鞋、年假當病假。公司只提供制服，沒有合適的鞋，她花上500多元購買一對承托力較好的皮鞋。有時膝頭發炎腫痛，她就穿著護膝上班。痛得厲害，她唯有申請年假當作病假：「兩日病假我哋冇錢，要四日先有。醫生成日話，唔可以咁樣寫（病假紙）俾你㗎，今次寫兩日畀你，你再嚟睇再寫畀你。成本大咗好多，特登要睇兩次醫生，幾百蚊一次。我倒不如攞大假去頂，大假有錢。」一年總有三、四次因腳痛申請年假，「11日大假，一半攞咗嚟當病假用。」 

目前，涉及下肢勞損的職業病只有膝瘍一項，（即受外來壓力或摩擦，造成粘液囊炎或皮下蜂窩織炎）。若因患上職業病須要放假休息，員工會獲工傷病假錢賠償。而因長期站立而導致下肢勞損則不包括在內，因此美雲的情況，沒有任何醫療賠償或工傷病假錢。

腳痛不能跳舞、行山　每天吃止痛藥上班　

因為痛症，她沒有再跳喜愛的健康舞，再沒能一睹山上的風景，失去的更是與一班朋友的聯繫：「人哋個個禮拜去行山，跳舞嗰班又冇咗，話冇影響（社交）就假嘅。始終隻腳差，好多嘢限制咗做唔到。」

不再行山、跳舞，美雲卻依然一直「死頂」返工，依靠藥物止住每天的痛楚：「一日最少一粒止痛藥、兩粒胃藥，發炎就食多六至八粒。睇親醫生好似買米咁，拎個大嘅環保袋去載藥。」她堅持下班後游泳，鍛煉雙腿肌肉，減慢惡化。某夜當值落樓梯時，膝頭突然痛得腳軟，跪在地上。那次送院治理後，她又繼續如常上班。

做手術要休息半年：都要開飯，冇可能唔做嘢。

然而，任美雲意志再堅強，身體也漸漸承受不了。近3、4年，膝痛的情況變得嚴重，走路傾斜在一邊，雙腿開始有向外彎的趨勢：「唔可以再咁樣行咁樣企，你隻腳負荷唔到㗎喇。」醫生建議美雲立刻排期做手術，置換人工關節。但是，美雲卻一直拒絕，因為手術後需休息半年多，期間不能上班；領最低工資、「手停口停」，她擔心無法維持生活：「又冇辦法放咁多病假，等我退休先至去做啦。我而家都要開飯㗎嘛，我冇可能唔做嘢，唯有死頂 。兩公婆咁大年紀搵唔到啲咩錢，後生有自己家庭負擔根本幫唔到你啲咩。兩個一齊做嘢，至少可以維持到屋企開支。諗住做得就做啦。 」

美雲說，早前已有行家同樣因膝頭痛要做手術，有些同行定期注射透明質酸：「其實大家都去到同一個地步。今日係我要做手術，聽日就第二個。」

然而，美雲的故事不是特例，根據香港物業管理及保安業總工會與零售、商業及成衣業總工會的調查顯示，56.2%的受訪者表示，他們的工作場所沒有適當設備，支援員工長期站立工作和休息（如可調校高度的工作椅、腳墊、合適鞋履、休息室。）

對於因長期站立而下肢勞損的工作者，醫生也難救，唯有正視勞工權益保障欠妥的問題。最近，勞工處就長期站立問題草擬新指引，向各工會及關注人士諮詢意見。新指引的內容能有效處理工友長期站立的問題嗎？後文再續。

【長期站立】勞工處擬新指引不立法 程展緯：至少政府保安要有凳

【長期站立】為工友爭凳唔靠僱主良心發現 程展緯：你放工就係客