【Clockenflap】外國樂迷都識Supper Moment　幾時開世界巡唱先？

一年一度的Clockenflap音樂節再度在港舉行，由2008年至今已經到第十屆，今天作為結幕日，當然要有不同的重量級嘉賓。在主舞台方面，今日除了有宇宙人、POND、Massive Attack等來自不同地方的樂隊外，更有本地薑Supper Moment在黃金時段晚上7點15分唱到8點。台前不單被本地樂迷逼爆，連外國樂迷及圈中音樂人也在台下一齊跳一齊叫。

Supper Moment上台打頭陣便唱出今年的冠軍派台歌《靈感床》，緊接還有《飛》、《機械人》及《一樣不一樣》等。而今次Supper Moment更特意為樂迷帶來新歌，不要誤會，我不是在說《大丈夫》，而是在今次音樂會當中才首度獻唱的《不要死在崇拜裡》，令樂迷相當滿足。事隔6年再踏Clockenflap舞台，Supper Moment識做唱出首本名曲，《無盡》及《世界變了樣》點會走得甩。

唔少外國樂迷同圈中音樂人都好撐場！

音樂節的氛圍讓人不自覺「開盡Turbo」，Sunny一出場已經進入狀態在台上又跑又跳，更唔錫身「插水」跳入觀眾席，樂迷亦蜂擁而上抬起Sunny，頓時炒熱全場氣氛。返回台上Sunny又舞動印有Supper Moment標誌的旗幟，相當有氣勢。

整節演出盡無冷場，唱《無盡》時，Sunny拿起結他響起一個和弦，台下樂迷自動波跟住大合唱，不用任何伴奏下樂迷唱足近半首，氣氛相當好；到末段毋須Sunny帶領都舉起「招牌手勢」，台上台下融為一體。最後Supper Moment以《說再見了吧》為演出劃上完美句號，樂迷不捨大嗌Encore，留守在台下。

Supper Moment在後台接受訪問時表示，今次演出是史無前例地將整個自己的整作團隊搬到舞台，而且以參與外國音樂節的心態演出：「雖然今次係香港嘅音樂節，但係我哋嘅心態係當玩緊外國festival，好開心見到外國嘅觀眾都好投入。當我講到『我嘗試緊去講英文，希望外國嘅觀眾都嘗試去學廣東話，加深大家嘅了解』，有個外國觀眾好大力點頭，呢個畫面真係好感動，因為音樂就係咁，大家都Respect！」Sunny補充話：「我哋落番台嗰陣搞手Justin同我哋講『We Made History』，雖然好簡單一句，但係好有力，真係非常開心！」

Supper Moment出盡力演出！(黃浩晉攝)