【專訪】Supper Moment最鍾意樂迷唔守規矩：最好係呢啲觀眾呀！

樂隊Supper Moment近年成績越來越好，除了成為頒獎禮常客，廣告工作亦接踵而來，早前與雪糕品牌合作Häagen-Dazs，推出「期間限定」新歌《完美》。《完美》曲風夠Chill，充滿夏日感覺，讓人一路聽一路搖擺身驅，彷彿行路都有Groove。

主音Sunny透露《完美》的創作靈感：「坦白講個Melody已經創作咗一段時間，本身melody冇歌詞，但係我哋都覺得一講夏日係要同一班朋友過，如果唔係一個人食雪糕好悶咁，或者一個遊船河都遊唔成㗎嘛！所以喺chorus都加咗句歌詞『My Life Complete with You』。」

Supper Moment樂隊名稱本身就與「食」有關，而近期亦有參與不同食品廣告，Supper Moment會否想過走入電視框，開節目《Supper食平啲》？

鼓手阿達笑言：「早知就改個名去旅行啦！哈哈！」主音Sunny補充說：「如果認真答你，就緊係唔會啦！哈哈！因為我哋呢隊band連音樂呢個本行都未做到自己滿意嘅時候，又邊夠膽去做其他嘢呢，所以做好咗自己嘅音樂先！」

那麼Supper Moment心目中的目標是甚麼？做到哪一步才算「滿意」？Sunny表示目標是世界巡演：「我哋嘅vision都係向住我哋嘅世界巡演去行，喺呢個時候去講好似好遙遠，但係慢慢發現，回望番我哋band房入面嘅地圖，有啲紅色釘住曾經去過嘅地方，最初淨係得粒釘喺香港。但係慢慢越來越多，雖然唔係好多，但係總算去過香港以外，甚至境外一啲地方，就好似今年去咗英國演出。好多意想不到嘅嘢係會發生，雖然我哋呢隊樂隊係第11年，但係我哋都相信keep住咁行，總會有一日行到一個我哋心目中嘅目的地！」

今年5月Supper Moment隨服裝品牌到英國開騷，為他們累積了外地演出的經驗，Sunny表示：「當時跟品牌做event，有2、3日時間，諗住喺嗰到book間live house細細地玩，個心態係當租個playroom俾自己去玩。不過反應比想像中熱烈好多，觀眾心情都好ready，咩歌都識唱，又冇咩規距呀！最好係呢啲觀眾呀！哈哈！」

到小型Live House演出讓Supper Moment找回最初出show的感覺，但同時Sunny亦慨嘆香港缺乏Live House：「唔係隊隊band，或者每一個音樂單位一開始就可以去一個大場地玩，你要去一個面對3萬人嘅場地玩嘅時候，你先要搞掂30人、或者3個人先，香港的確乏呢種細scale嘅場地。(對Live House被打壓有何感覺？)唔係純粹對於音樂產業嘅問題，如果俾一啲守舊嘅條例束縛住個地方嘅可能性係有啲可惜，同埋呢件事本身係應該好自然咁存在㗎嘛！希望大家個思維再進步嘅時候，可以有一日容許到，或者啲條例會有改動、改善。」

Supper Moment陸續推出新歌，音樂類型亦有所改變，加入EDM的元素，到底今次新碟的理念是甚麼？結他手阿雞表示：「今次係想做做一隻現場感豐富嘅大碟，就好似一個演出嘅Rundown咁，一場Live要有嘅起承轉合，不同情緒嘅歌有。唔止淨係玩EDM，有啲歌係好acoustic，acoustic到一o舊EDM都冇。」

阿雞又講到：「呢隻碟主要係應付參與音樂節去做，因為目前唔夠音樂節氛圍嘅歌，出show唔可以成日都玩《點滴》、《一樣不一樣》、《機械人》呢啲歌，需再多啲歌要同觀眾互動。」

加入EDM是否大勢所趨？會否害怕樂迷覺得加入EDM元素有「容易咗」、「唔真材實料」的感覺？就如部份樂迷不喜歡Linkin Park近年風格一樣。阿雞則認為：「認識音樂嘅樂迷聽完應該唔會覺得易咗，應該係覺得難咗，chord voicing係越嚟越難。而且點樣去操控EDM，去攞聲都係一種技術，有人覺得玩EDM易咗可能係因為現場表演時形式唔同，但唔代表易做。」

阿雞又補充：「EDM只係一個統稱，入面包含Synth、Tech、Dubstep等等唔同類型，一樣係咁博大精深，對我哋嚟講都係一個新嘅領域。做過EDM嘅人就會知道，你要攞一隻聲係要花幾個星期，甚至幾個月先攞到一隻自己滿意嘅聲，同玩樂器一樣需要技術。」

Supper Moment最新派台歌《靈感床》的MV作新嘗試，以插畫及動畫作主題，阿達表示：「近期放多咗心機喺MV度，由上年《一樣不一樣》開始，嘗試喺手頭上有嘅資金上面用得盡啲叻啲。以前嘅MV主要都係Band Shot、故事作主題。而《靈感床》就係第一次加入插畫同動畫，其實做之前已經知道個限制，但都想俾大家都會知道一個畫出嚟嘅MV，所花功夫係大過拍真人好多，全CG嘅MV成本可能高過一套低成本真人電影。」

Supper Moment近期一值籌備新碟錄音、編曲等工作，希望於年底完成錄音，並在今年底又下年初能夠推出，各位Supper Moment的樂迷記得密切留意，感受何謂「聽碟如睇Live」。