農夫「樂壇末日論」笑中帶淚：而家無人知道本周冠軍歌係乜

昨晚《農夫等錢洗世界巡迴演唱會》正式結幕，整場騷在一片掌聲當中渡過。一如農夫的風格，你說它是一個演唱會，它卻不失棟篤笑的特色，你說它是一個棟篤笑？它又確確實實是一個演唱會。全場不乏感動位，唱到《重新找到你》及「成長三部曲」時，台下觀眾也眼濕濕，最尾唱到《456Wing》及《舉高隻手》時，卻連陸永也禁不著眼泛淚光。但要數到全晚令人笑到咳的，一定要講到農夫於台上大爆的「樂壇末日論」。

農夫二人在台上提到，曾經有記者朋友問起他們：「到底你們覺得農夫是站在樂壇什麼位置？」此問一出，可說是震驚了他們二人，C君道：「呢個問題就好似而家世界末日，你問我係站喺地球咩位置一樣。」不過當然有粉絲大叫：「你哋係第一位！係樂壇嘅頂峰！」此言一出，不禁令二人自嘲：「如果在座有啲朋友想加入樂壇，而我哋係第一嘅榜樣，佢哋即刻唔嚟啦！坤哥仲做唔做好呀以後？咁樣係第一？」農夫二人立刻與在場觀眾做一個小測試，以測試出樂壇到底還是否存在，他們問台下觀眾：「有冇知道今個星期嘅冠軍歌係咩？」台下先是一片安靜，然後再次笑起來，二人續道：「我哋做咗六場，都係得一個觀眾答到！佢仲要係即刻上網搵先知道！即係無人聽過呢個星期嘅冠軍歌，甚至年尾嘅冠軍歌你都未必聽過啦！所以而家呢個樂壇嘅趨勢就係，你有聽過冠軍歌，係等於你有見過UFO！」

農夫笑說樂迷大致分三類：「一種係極極極少數真係有見過UFO，第二係以為自己見過UFO，而第三就係好似我哋咁，扮見過UFO。」他們更開坤哥玩笑：「即係當坤哥問我哋『有冇聽我新歌呀？』我哋會答『好呀！好正呀啲arrangement我覺得，好用心！個歌名都好呀！《孝義》…呀唔係，係《孝順》呀嘛！差唔多啦！』」

二人更以樂壇年尾頒獎禮打比喻：「而家聽過冠軍歌，的確就好似見過UFO，所以可能嚟未來幾年，最適合做樂壇頒獎禮主持嘅會係夏韶聲同埋雲海。同埋會相當有娛樂性。」C君更即場飾演夏爺作示範：「大家好我係Danny Summer，今年嘅冠軍歌，係真係有人聽過…嗱唔係我講㗎！係有五個「陳仔」(外星人)聽過。而呢五個「陳仔」，都係有份寫呢隻歌㗎。」C君更笑說：「佢仲成日話唔係佢講喎，明明全部嘢都係佢講。」

而陸永立刻雲海上身接著說：「要講返呢隻歌呢，就要講返2017年6月23號，下晝3點33分，確實係有一班歌手去過電台做訪問㗎！錄低晒㗎！而最吊詭嘅係，啲人當冇聽過咋！」

不過除了夏爺與雲海，他們更惡搞玄學家蘇民峰：「大家如果遇到啲遊魂野曲唔洗咁驚㗎喎！原來都有解決方法嘅！大家可以喺屋企嘅五鬼位嗰度放部CD機，咁就可以收咗啲遊魂野曲啦喎！」

陸永又惡搞另一位玄學家龍哥：「其實龍哥平時唔會好似上電視咁乾坤一開，佢平時口頭禪都係比較低調。」陸永又立刻換上龍哥身份說：「你喺度經過見到有個壇…個樂壇，裡面會有五男四女，你睇唔到佢，唔代表佢唔存在㗎，嗰啲歌手嚟㗎…大家行開行埋，有緣份咪幫吓佢囉。」

講吓講吓，他們又把話題帶回自己身上：「講返一開頭個問題，到底我哋企係樂壇嘅咩位置。我哋都收過一個評語，其實一直都有人咁講，佢哋話農夫嗰啲Rap唔係Rap嚟，只係講嘢有節奏同押韻。我對呢個評語好深刻，其實有一個年代，連金庸先生寫嘅武俠小說，都比人話武俠小說唔係文學嚟嘅；好多漫畫家都比人話漫畫唔係藝術；新詩都曾經比人話，新詩唔係詩嚟。每個年代都有佢嘅準則，而時代都行得好快，可能有一日，通街都係自動車無人駕駛，反而有個人揸住架棍波車走出嚟話『呢啲先係車嚟嘛』；可能有一日，電子貨幣全球通行，又有人揸住張十蚊紙走出嚟講『呢啲先係錢嚟嘛！』；而家成日預言話AI會取代人類，如果有一日真係發生咗，一定又有啲血肉之驅走出嚟話『呢啲先係人類嚟』；又可能有一日，或者在座其中嘅一位會攞住農夫嘅CD出嚟講『呢啲先係Rap嚟㗎嘛！』」隨即引起全場歡呼。

接受後台訪問時，農夫表示相當喜歡旺角麥花臣這種規模的演唱會，即使將來有機會再開紅館也不一定會考慮：「其實對上一次，七年前開紅館，我哋覺得紅館係比一啲好巨星嘅人去做，我哋就適合做呢類同觀眾接近啲嘅場地。始終紅館太大，我哋又鐘意同樂迷有互動，所以都係呢類場地先做到。」問到曲風方面，由《456Wing》這類開開心心的歌，再到《重新找到你》的成長題材，樂迷好像跟著農夫一起長大，而「成長三部曲」亦令樂迷非常受落，到底農夫會否繼續寫以「成長」為題的歌曲？他們坦言：「絕對冇啦，成長我哋都做咗四五部曲啦，再做都可能生活化小小嘅題目。如果要再寫成長嘅時候，可能要過多十年，我哋都覺得自己真係成長咗先會諗，到時可能係追悼農夫。」