十大中文金曲記者會缺一線歌手 香港樂壇發生乜事？
來到年尾又是樂壇頒獎禮季節，各大平台都陸續籌備這項盛事，雖然外界會認為頒獎禮是唱片公司與傳媒機構之間的「畀面派對」，但某程度上也反映了該傳媒機構的號召力。
今日香港電台舉行《第40屆十大中文金曲》記者會，雖然同樣是李志剛做主持，但台上陣容卻不如以往鼎盛。先不要說四大天王輝煌的年代，甚至去年「十大中文金曲」記者會都有許廷鏗、坤哥、林奕匡、連詩雅、Gin Lee、JW、C AllStar、Supper Moment、Dear Jane；但今年只得AGA、鍾舒漫及ToNick擔大旗，其餘都是一眾新人。論人數，上年台上大合照足足企滿5行，就連攝影師都要叫「大家企得親密啲」；反觀今年連唱片公司老闆都上台，也只排了兩行，隨時連十優歌手都頒唔齊。
這景象是否正正反映了人們所說的「香港樂壇青黃不接」？
今年的樂壇新人大家認識幾多個？(陳順禎攝)
容祖兒早前出席活動都講過唔爭獎：「我今年一首歌都冇，就算我去都係純粹支持下，唔係要爭第一，係戥朋友攞獎開心！」陳奕迅早前擔任內地歌唱節目導師，現正舉行世界巡迴演唱會。張敬軒則休養生息，準備重新投入工作。當今樂壇的天王天后不是「無心戀戰」，就是不在港，而後起之秀又未獲大眾認同，聽眾們又一邊說「香港沒樂壇」，到底所謂的樂壇正處於甚麼狀態？
有份競逐「全年最佳進步獎」的歌手(陳順禎攝)
今日記者會的主持李志剛(Alex)接受《香港01》訪問時表示，今次記者會集中於「最有前途新人獎」及「全年最佳進步獎」，所以出席的歌手不是大家熟悉的面孔。被問到對現時樂壇青黃不接有何看法？Alex表示：「有少少㗎，其實歌手們都要主動啲，部份知名度高嘅歌手可能忙住要搵錢，但係責任都唔可以淨係落喺一方面嘅。」
容祖兒早前講過不會參加頒獎禮爭獎，Alex對此會否感到失望？他說：「其實Joey講『讓位』都無可厚非，佢之前十幾年都好努力有付出嘅，不過希望佢會用不同形式繼續支持樂壇，例如好似譚校長咁會做頒獎嘉賓。」
有人認為Joey天后位置後繼無人，那Alex認為哪女歌手有潛質做下一位天后？他提到：「我幾鍾意衛蘭，佢無論唱功、外型都非常好，不過要成為天后有時都係時勢做英雄。其實之前謝安琪都可以叫做『威脅』到Joey嘅，不過阿Kay要生B，所以就有一個斷層。」
當年港台捧紅「四大天王」，那現時會否再捧「四大天王2.0」？Alex也希望會有：「我都好想有『四大天王2.0』，但係又驚會好似當年咁有一個壟斷嘅情況。」那Alex認為誰是新四大天王、天后？他回應指：「男歌手我覺得係陳柏宇、周柏豪，黑馬有林奕匡；而女歌手方面就係衛蘭、JW同AGA。」但，數極都係數到３位.......灰!