【有片】張敬軒商場騷爆Seed飆高音 拍住管弦樂團霸氣似足開紅館
張敬軒今日到沙田新城市廣場出席《Music in Town》閉幕活動，大唱4首與香港城市室樂團合作改編的代表作，令在場樂迷與市民大飽耳福。早前軒仔與管弦樂團綵排重新編曲版《酷愛》的片段在網上大獲好評，樂迷們見軒仔「回歸」都紛紛話：「皇上返嚟喇！」到今日正式演出現場觀眾反應非常熱烈，整個商場氣氛高漲。
軒仔今次將4首大家耳熟能詳的代表作重新編，包括：《酷愛》、《騷靈情歌》、《櫻花樹下》及《青春常駐》。台上有超過30名樂手與軒仔合作，將流行樂與管弦樂完美融合，歌曲層次變得更豐富，讓人耳目一新，彷彿重新認識張敬軒的作品一樣。軒仔在商場開騷猶如置身「巨型四面台」，台風自如不在話下，而且發揮超水準，例如在《酷愛》副歌中飆高音，在《櫻花樹下》尾段拉長音近20秒等等，整個演出目不暇給。
軒仔在台上向樂迷打招呼：「我自己都有一段時間冇唱歌俾大家聽，所以今日都好期待！原來呢到都有山頂㗎，山頂嘅朋友大家好！」軒仔唱得又親民令觀眾非常受落，歡呼聲連連。
冇去現場嘅朋友唔緊要，依家有得逐首足本重溫喇！
軒仔今日表現超水準，聽到Live嘅樂迷真係大飽耳福！(陳順禎攝)
軒仔接受訪問時，表示自己非常享受今次演出，被問到為流行曲加入管弦樂重新改編的難度，軒仔表示：「難度在於好多時我哋同Band、流行樂隊去夾係佢哋跟我，但係同管弦樂夾佢哋係跟指揮，所以你見我啱啱喺台上行嚟行去其實都係要瞄一瞄指揮，嗰個同步係好難。」
雖然有難度，但軒仔都樂在其中：「流行曲最好玩嘅地方就係呢到，其實唔單止同管弦樂夾平時都係，可能喺觀眾嘅角度我哋係主角，但其實喺台上面唔係，係大家嘅配合；呢樣嘢好講求音樂人之間心同心嘅交流，嗰樣嘢好深㗎，但係你好容易感受到我哋係咪synchronize緊。」軒仔又表示樂手來自世界各地，正正感受到音樂大同。
另外，4首歌曲當中軒仔最喜歡的是《酷愛》：「今次加入弦樂令首歌再慘啲，唔同原本R&B嘅味道，同埋依家個版本動態大啲。」
對於今次演出，軒仔表示發現商場原來都好好聲：「我發現其實最好聲嘅表演場地係商場，因為周遭都係玻璃，所謂嘅會『彈聲』如果冇人就會彈聲，但係今日好多觀眾，佢哋都變咗diffuser，我喺台上面聽係好好聲！我今日上到台發揮都好輕鬆，仲輕鬆過排練嗰日，感覺到原來我仲可以去！」
軒仔又提到陸續會推出新歌，正籌備新碟，而新碟的主題是向以往聽過的音樂作致敬，軒仔表示：「今次新碟係向我聽過嘅音樂致敬，呢隻碟係會幾90年代。其實我本身都唔敢膽粗粗去做，係見到衛蘭《I Don’t Care》呢隻歌，同埋JW、林奕匡佢哋都開始玩番啲90年代嘅嘢，所以我就搵番一班90年代嘅大師嚟幫我手，因為90年代對我哋嚟講係一個Golden Age嚟！不過寫歌方面用咗好多較新嘅音樂人，變咗呢隻碟係一個兩代音樂人嘅Crossover！」