周國賢加場門票又係秒殺　歌迷狂鬧：10:03 通利話坐位已full

周國賢早前宣佈將於年尾12月12、13日假旺角麥花臣場館舉行《銀河鉄道之夜》演唱會，不過樂迷們都難逃「一票難求」的命運。事關日前門票公開發售時火速售罄，都今日開賣加場門票同樣被秒殺，令大批未能買飛的樂迷到周國賢facebook大吐苦水，有網民嬲爆：「其實同冇公開發售過冇分別！周仔宣傳唔使做，poster唔使影，連post都唔使出啦！」

演唱會爆到要加場當然開心，周國賢今早在facebook出post話：「12月14日的加場門票陣間10點鐘就開賣啦，我都唔執輸，自己都買返幾張先⋯」仲要加埋個笑喊emoji，本身打算與民同樂緩和一下氣氛，可惜抽錯水令網民更加嬲。

網民紛紛將在周國賢facebook「落口供」，列明時間地點幾點冇晒飛：

「我喺九龍灣megabox通利排第三都買唔到，問過職員佢話一人可以買十張」

「10:01 通利售票處話$680坐位已經冇哂。10:03 通利話坐位已full，職員話排第2嘅人都可能已經買唔到。」

「all sold out within 2 minutes.i was at Tom Lee at 9:55am. 10:00am they started working and even the girl "first in the line" couldn't get any tickets at all.」

黃牛黨肆虐，令一班真心支持，想用正途買飛嘅樂迷好大怨氣。

網民對未能「上車」非常氣憤，質疑到底有多少門票被內部認購，並矛頭直指黃牛黨怒斥：「黃牛死全家」並陸續貼出不同黃牛網的網頁截圖，亦有網民苦口婆心話：「請勿助長黃牛，唔好俾錢佢地找卡數。」

網民反應如此熱烈，周國賢睇嚟要出盡法寶化身好「關公」先得喇，未能買飛嘅樂迷除咗聲討黃牛外，也有有選擇幽自己一默，引用《目黑》的歌詞：「無奈我未得到被邀請。」