【任噏影評．神奇女俠】女英雄電影開先河 黑寡婦紅女巫幾時有？
作為今年第一部DC英雄電影，亦都係重頭戲《正義聯盟》的前哨戰，好多人都會抱住好大期望去睇《神奇女俠》。諗返起上年《蝙蝠俠對超人：正義曙光》上映，啲批評多到我都唔記得有咩位係被人讚過，不過神奇女俠呢個角色就俾人讚到飛起，又身材好又靚女，的確係值得俾人讚嘅，而且佢出鏡嘅畫面又唔多，身世又神秘，觀眾們想插都搵唔到位喇。呢位以色列女星姬嘉鐸（Gal Gadot）自此成為了DC重點計劃嘅人物，除咗今集之外，之後套《正義聯盟》都係重點登場。呢套電影票房喺今日已經有成2.2億美金，搞到導演都已經喺訪問中放風話會開拍第二集，不過就連劇本都未有。
喺戲外就威到盡，名利雙收，講返套戲入面嘅神奇女俠，呢套戲係講返佢點解會出現係地球。作為神之女的她一出世就喺一個隔絕世界的天堂島度長大，自小習武，被眾人灌輸戰神阿里斯就是戰爭之神，只要消滅佢就唔會有戰爭。喺一次機緣巧合之下被佢撞到男主角，跟住就跟住佢返另一邊打緊第一次世界大戰嘅世界，諗住消滅阿里斯就唔會再有戰爭。佢就係本着呢個天真嘅想法，喺途中都不停話要消滅呢個戰神，真係好煩膠，連個奸人服毒自殺以前都要問佢係咪俾阿里斯控制，可唔可以唔好咁天真呀？直到最後俾佢真係消滅咗阿里斯（其實大家都係神的兒女，點解可以咁輕易俾人收檔？），發現人類根本唔會因為咁而停低戰爭，先至開始醒覺。雖然係天真咗少少，不過今次DC好成功咁為女英雄開創咗個先河，要知道Marvel入面嘅黑寡婦同紅女巫都未可以自己開部電影，今次《神奇女俠》咁收得，Marvel嗰兩位又係咁索嘅女星，人氣都算高，跟住個步伐開個人戲都唔出奇，到時觀眾就真係大飽眼福喇。但係呢套戲都有啲斟酌位，就係唔知點解有好多特寫鏡頭，雖然Gal Gadot係索女，不過歲月不饒人，尤其係鬼妹仔好易老，已經32歲嘅佢一放近睇就見到有唔少眼紋，雖然唔會因為咁就影響佢嘅形象，但係都唔需要成日特寫佢呀？
套戲其實都係一般英雄片套路，講佢點成長，點樣遇到大佬，最後點樣消滅佢。不過正如上文提到終極大佬阿里斯被神奇女俠一個爆seed就玩完，真係弱雞咗少少，呀女俠除咗一開頭救唔到自己師傅同埋打完大佬之後心靈空虛咗一陣，其他時間基本上係個人表演時間。而且打鬥場面真係少得可憐，打終極大佬全程都係CG畫面咁滯，係得一開頭喺天堂島打團P先至叫有動作睇吓，呢度係有啲失望。同埋條愛情線，男主角只係同女俠經歷咗少少嘢就成功俘虜咗佢個心，好似硬加插條愛情線落去咁。尤其佢咁快就可以鍚Gal Gadot，簡直係粉碎咗唔少男觀眾嘅心，好彩去到電影最後佢係死咗，我諗唔少人都會覺得佢嘅死係應該。