【任噏影評．毒。誡】成套戲四不像　純粹靠影星賣座

入場睇《毒。誡》，好主要原來是被古天樂同劉青雲這兩個老拍檔吸引，仲加埋新晉影帝林家棟，呢個組合真係夠晒重份量。不過卡士重就重，反而個劇本就顯得有啲平凡。故事係講述前黑幫人物陳慎芝的真人真事，其實22年前已經有一部《慈雲山十三太保》係同樣題材，今次再拍一次而且搵嚟咁多大星，緊係希望票房收得。不過睇完出嚟真係有啲失望，好似全程都只係觀賞幾位男主角演出，劇情真係無高潮位，好悶！

話明《毒。誡》，最好睇緊係睇佢喺戒毒嘅時候點樣掙扎，睇青雲好痛苦嘅口面，不過戲中我諗只係得一兩分鐘，咁就交代咗佢已經戒咗毒，會唔會太兒戲呀？講起時間快，喺套戲一開頭嗰陣，啲時間不停咁交替穿插，一跳就跳幾年，有時又講返起十幾年前，啲年份不停咁彈出嚟，係咪要同觀眾玩記憶遊戲呀？睇到我好鬼混亂呀！

講返幾位主角呀，林家棟作為主角，都好令人期待喺《樹大招風》之後會再有經典演出。點知成套戲佢嘅戲份出奇地少，反而特別演出嘅張晉同古天樂仲多戲份過佢，咁點解要落佢做主角？就係因為拎咗影帝？唔講林家棟講張晉，作為出晒名嘅武打星，諗住套戲幾悶都有啲打鬥場面睇吓，點知全套戲俾佢出手嘅場面就得嗰一場，就係喺天台打差佬，一開頭嗰場爛仔交亂到都唔知做緊乜，不過睇佢最後做一個就死嘅病君，啲演技滲緊出嚟都爭返唔少分數。成套戲係以劉青雲做大主角，佢嘅演技當然係唔使質疑，喺廁所打針嗰幕直頭可以直逼佢好拍檔古天樂喺《門徒》入面吸毒嗰個衰樣。至於古仔，一開頭睇宣傳以為佢只算係客串吓，點知原來佢都有好多戲份，一貫招牌chok樣就唔多講，要做一個黑社會大佬對佢嚟緊亦都駕輕就熟，完全無空間可以再發揮只有喺樓梯同另一個黑幫大佬隻揪時露出嗰個驚慌樣就係全場嘅特出位。其他老戲骨好似吳孟達、譚耀文、歐錦棠係好戲，不過都無乜特別出色嘅戲份。

呢套戲睇頭一半都以為係江湖電影，講喺呢個龍蛇混雜嘅九龍城寨點樣生存，點樣靠賣毒維生，但係又唔太見到典型嘅江湖橋段，連劈友都係得俾人追殺嗰一兩幕，完全無死過人，只係最後古天樂俾車撞死了事。講起俾車撞死呢一幕，嗰場戲古仔幾個人喺一條隧道口上緊樓梯嗰陣俾人伏擊，講真，你見到自己班人手無寸鐵，人地就拎晒武器，你都會諗住走喇？點知古仔唔係掉頭走，而係好似趙雲上身咁衝入萬軍之中，咁緊係以為佢會葉問上身一打十，點知都係要搵路走，咁點解唔一開始就掉頭向另一邊隧道口走？明明後面就無人。講返套戲，江湖味不足唔緊要，套戲講戒毒，應該係勵志片。但正如上文講過，戒毒過程少之又少，之後講青雲拆解咗幾單江湖事，同埋喺戒毒所幫人戒毒就拎咗個傑青，但提都無提過佢點幫人戒毒，純粹係劇情話你知係就係，咁真係好勵志喎。那麼咁多大男人演出，唔通係講兄弟情？其實就算係講劉青雲、林家棟同張晉三兄弟嘅感情描述都唔多，只係最緊張晉有病就嚟死先有少少兄弟同心嘅感覺。仲有青雲同古仔兩個本來無交流嘅人，突然間就化敵為友肝膽相照，就係因為古仔一句話：「因為你唔再係江湖嘅人。」個關係變得咁大，點接受呀？江湖唔係，勵志唔係，兄弟又唔係，你唔會同我講《毒。誡》係一套愛情片吓嘛？睇完真係呼出一口涼氣，即使作為古天樂嘅死忠，我都真係好失望。