【任噏影評．29+1】欣宜Chok聲好難頂　娜姐收起性感好失望

入場睇《29+1》，本住支持港產片嘅心態，兼且舞台劇又大受好評，杜汶澤又拍晒片力讚好睇，咁就緊係唔好執輸睇咗先喇。點知睇完真係好失望，好耐都無試過一路睇戲要一路望錶，睇到一半心諗仲有成50分鐘咁大獲，點捱呀？內文有劇透，仲想親身入戲院嘅唔好睇落去。

回顧返呢套戲嘅預告片，欣宜同BabyJohn 蔡瀚億嘅一句說話：「不如我地做愛囉。」無疑係震撼咗唔少觀眾，所以都搞到我好期待欣宜出場。點知佢一出場我真係好震撼，佢嗰把Chok高幾度又要懶樂天嘅聲音真係嚇死人，佢把聲其實本來都已經好響，加埋呢種講嘢tone配合埋戲院嘅音響，基本上佢一開聲我就要揞住對耳隔一隔聲，如果唔係我真係驚佢內功深厚震聾我。至於佢演成點？除咗把聲，將所有表情動作都放大，戲中佢飾演嘅角色黃天樂係一位好樂天嘅女人，所以周不時都會笑，有一幕係佢要教BabyJohn點樣令自己開返心啲，真係Chok個笑樣出嚟，嗰一下我真係知道乜嘢叫做皮笑肉不笑。相反隔籬BabyJohn就自然好多，BabyJohn係欣宜青梅竹馬嘅好朋友，呢位仁兄自從《拆彈專家》之後，演技開始被人睇到，呢套戲佢都算做得唔錯喇，好自然，拍落欣宜度好大對比。戲中佢要摸欣宜胸，仲有機會同欣宜做愛添。其實喺《拆彈專家》佢已經要被人炸到粉身碎骨，今次仲要有如此情節，都真係幾同情佢。睇嚟欣宜嘅演技仲好有進步空間，反而佢下一套戲《西謊極落之太爆太子太空艙》就比較似做返自己，不妨期待吓。

講完欣宜，講返另一個女主角周秀娜，佢做得不過不失喇，不過今次呢套戲娜姐完全收起性感，當然令到一班男觀眾失望。戲中佢係做一名事業女性，即將30歲喇，正正踏入中女的年紀。失戀、工作壓力、家人離世、業主迫遷等等的煩惱一次過嚟晒，不過其實呢啲問題都未必係30歲先會出現，所以我都唔明點解要叫29+1，好似夾硬將女性標籤一踏入中女年紀就會有好多問題咁。戲中娜姐嘅爸爸因為意外入醫院，最終係救唔返嘅，咁當然會有啲回憶返佢同老竇嘅片段喇。可惜回憶時間太長，呢個感動位感動唔到我。而且其實成部戲都有啲位定鏡時間又係太長，搞到部戲有太多悶場嘅時間。而套戲最尾講娜姐輕輕將間屋幅牆推開，之後就無喇喇好似用咗隨意門咁去咗巴黎，我仲以為呢套係一套寫實戲，點解會咁舞台劇收尾？會唔會太過滑稽？好記得欣宜戲中有句對白係：「你有無試過覺得自己咩都無呀？」我睇完成套戲真係好深刻咁領會咗呢個對白，因為睇完之後我真係覺得自己乜都無接收到。