【點五步】「校長」廖啟智助學生入戲：幻想在金像獎行紅地氈

電影《點五步》重現80年代土生土長首支華人棒球隊「沙燕」成立與成功的故事，以運動包裝這顆青春膠囊，吞下肚是苦卻有百般滋味，在云云年青演員中，儼如煉藥師的前輩廖啟智，接受香港01訪問談及與這群新人相處，一字記之曰「讚」，順耳說話猶如洪爐之火：「在金像獎行紅地氈是什麼心情？」，一群初生之犢立即情緒澎湃，煉出你我眼中一股熱血。

正面鼓勵年輕演員　保持溝通

「人都係鍾意讚多過彈」，智叔與年輕演員相處之道在於互相照顧：「佢睇住我、我睇住佢，佢哋肯定有少少心理障礙及壓力，相反我睇住佢都有壓力，因為無論動作、身手都比我敏捷得多，體力比我好很多，精力旺盛，領悟力都比較強，我唯一優勝的是經驗」。當經驗不能派上用場，智叔希望可以邊拍邊學，既然坐埋同一條船，溝通都盡量正面：「讚吓『好勁呀你，好大隻呀你』、『嘩！得喎，睇得喎』，新人需要大家俾啲鼓勵，以前俾人鼓勵得多，我都願意鼓勵下人。」

鼓勵說話不止以上幾句，拍到煞科戲，朝6晚6未停過，再鋒利的刀都有生銹時候，拍到尾大家都鈍了，智叔用幾句說話又帶他們重新入戲：「一年之後套戲上映，你哋會有咩心情？如果能夠入到金像獎，又有咩心情？慢慢大家就蘊釀更多，如果在金像獎行紅地氈又咩心情？情緒越來越高漲，好自然個情感就唻，等待成果一刻，究竟要懷住咩情緒去等待？滿足？定係虧欠？享受過程？覺得有遺憾？佢地嘅情緒就會好澎湃。」智叔認為拍戲最好有自然感情流露，各樣情緒在以上情況宣洩出來，效果相當滿意。

為人師表的使命感

智叔與「本土」兩字幾乎成對等，今次拍《點五步》理應為支持100%香港製造的低成本製作，但原來背後是另一個「使命」：「政府有一筆錢讓大專生去申請，首部劇情片計劃，浸會大學成功獲得這筆資金，本身在浸大番工，順理成章他們覺得我都應該要支持一下，咁咪支持囉！」

導演陳志發是浸大電影電視系學生，非智叔的入室弟子都獲鼎力相助，連其他講師都有客串演出，頗有同氣連枝之感：「有一場戲大家做校長坐喺度食蛋撻，教還教，當你落場去做就知辛苦，一路食一路講係好困難，我地幾位拍完呢套戲都感覺到，原來一個專業演出，相對地唔係咁容易，睇戲嗰陣時就識批評人，到你做你就知！」

台上一分鐘　台下曬到燶

正所謂「台上一分鐘，台下十年功」，《點五步》中只有現役港隊成員胡子彤及幾名有打捧球經驗的演員，其他人都要由基本功學起，雖然智叔用不着苦練10年才上場，但學習過程都吃足苦頭，他憶述棒球總會的人第一次帶他到室內場打波的經驗：「有部機會彈波出來，第一下就中，他說：『正喎，你哋好掂喎』，跟住好多下都唔中，佢就話：『唔係幾掂喎』，原來都難。」

由室內走到室外，逢星期一，三，五早上烈日當空下練波，智叔逆來順受：「可以晒黑啲」，到曲終人散，有否迷上這項運動？「其實棒球服裝真係幾吸引，等於著左軍服咁，白色好帥氣，自從拍完戲，對棒球都有啲喜愛，起碼喜愛上套制服。」

廢青自救法：打機都要認真

「廢青」沒有分年代，不論戲中的80年代或是21世紀出生的Band 3學生，都被標籤為失敗者，如何拯救這班被邊緣化的年青人？引用智叔於戲中一句對白：「校長無話過要你哋贏，但有叫你哋唔好放棄」，做人最緊要有目標：「打機都係一個目標，視乎你點樣去運用，永不言敗，永不放棄，對自己有要求，要培養自己的自信心，態度好重要，玩都玩得認真，你必然會成功。」

當然，單打獨鬥難成大事，幾枝竹一扎斷折難，智叔以打機比喻人生，身邊人不論善惡，都是成長的推動力：「一定有人騷擾你，一啲係善意騷擾，一啲係惡意騷擾，你可以將這些支持或障礙揉合，然後再跨前一步。」

那天坐在某中學班房做訪問，坐在智叔面前聽君一席話，確有聽校長訓示之感，問他對兒子是否抱同一期望，他笑謂：「我都想佢係咁，年青人總有佢自己嘅性格，逼唔到，要等佢慢慢自己去經歷過就會感受到，希望佢聽到我呢個訪問啦。」