【爛鬼Cult噏】夏文汐《烈火青春》電車情慾戲都關土地問題事？
早兩日我阿頭話我上星期寫嘅《辭郎洲》冇咩人睇，好想同我瘋狂探討點解，我心諗有咩好討論吖，答案心知肚明啦，所以我就話呢個星期寫套多人睇過嘅，希望條數好啲。之前睇夏文汐（Pat姐）主演《唐朝豪放女》睇得好開心，連帶我寫都寫得好開心，所以今次都想寫埋佢嘅出道作《烈火青春》，阿頭話好呀，又係Ban都唔Ban，我諗佢都真係放棄咗我。
【爛鬼Cult噏】楚原仆X片《辭郎洲》爛到癲 最大鑊係衰邊樣？
講返套戲先，1982年上映、譚家明執導嘅《烈火青春》係由張國榮、葉童、夏文汐同湯鎮業主演，故事就講述呢四個後生仔成日都無所事事，諗到做乜就做乜，好青春好不顧後果，張國榮、葉童呢一對相識咗一晚就做愛，而夏文汐同湯鎮業都好愛得率性。有一日，夏文汐嘅日本人前男友就做赤軍逃兵嚟咗香港，點知赤軍方面就派出殺手滅口，最後流血收場。
相信十個觀眾裡面，有九個都會話夏文汐同湯鎮業喺電車上纏綿嘅場面係成齣戲最搶眼嘅一場。咁我都覺嘅，但單睇呢一場往往都唔夠加埋前因後果咁有趣。戲中，湯鎮業有一晚就趁阿媽同阿妹出街睇戲，所以就叫咗夏文汐上自己屋企，又塞錢畀細佬等佢唔好留喺屋企。點知，每次都係臨埋牙就畀人阻住，先有街坊上門問借錢，之後有細佬整蠱佢就嗌咗勁多杯雞蛋鮮奶外賣，最後阿爸仲帶咗班豬朋狗友上嚟開兩枱麻雀，令呢對㷫熻熻嘅小情侶局住走，最後就出現咗電車激戰呢一幕。估唔到土地問題唔係依家今時今日先有，喺80年代都已經存在，我諗呢個場面都係依家好多後生仔嘅寫照，所以成件事真係幾有前瞻性。
作為觀眾一定係會想知夏文汐、湯鎮業最後可唔可以成功滿足到情慾，甚至會覺得呢個問題或者係推動成齣戲故事發展嘅重要因素，但導演譚家明冇咁易畀大家捉到路，甚至可以話佢借《烈火青春》呢個戲名，同埋一班後生嘅靚仔靚女，去耍一班觀眾。喺電車激戰呢一幕完咗之後，夏文汐嘅日本赤軍前男友就正式出場，而佢嘅出現就令到成套戲變咗調，由青春羅曼史變成恐怖驚慄片，成個Genre唔同埋。或者你會覺得電影開始冇耐時，有兩下夏文汐攤喺前男友身上嘅Flashback，交代咗佢有個日本前男友，而且個氣氛古古怪怪唔知想點咁，畀咗啲懸疑Feel大家，但導演唔係以為咁樣整幾格畫面就當舖咗伏線嘛？我都係覺得自己畀人呃咗囉。
咁當然啦，《烈火青春》嘅畫面係好靚嘅，有啲仲靚到可以Cap圖做桌面Wallpaper添，好似夏文汐企喺湯鎮業的士頂上叉腰除裙騷底褲呢幕，拍到夏文汐好似文藝復興啲女神雕像咁完美。不過，拍得幾靚都好，個結局係極度痴線呢樣嘢係唔係改變到。當日本赤軍女殺手知道夏文汐前男友匿喺張國榮架船度後，就單槍匹馬揸住架快艇去殺呢個逃兵，撞正唔知頭唔知路嘅湯鎮業游出海接逃兵上岸玩，佢就好順手咁一刀斬開湯鎮業嘅喉嚨，主角之一嘅湯鎮業就係咁樣無啦啦死咗。逼逃兵切腹後，女殺手又兩刀斬死咗激動撲向垂死前男友嘅夏文汐。之後，張國榮同葉童就拎起武士刀同女殺手短兵相接，最後葉童就拎起魚槍射死個女殺手，完全係令人心諗一句做乜鬼。我好明白導演係想借呢樣嘢係講人生無常，青春好難留得住，好似烈火咁話熄就熄，但明明呢班人好多機會逃走架喎，唔使衝埋去送死啩？
雖然我上面講到咁，但唔代表我覺得套戲唔好睇喎，我覺得套戲好鬼好睇，但前提係斬開前半部同後半部，當佢哋係兩套戲咁睇，同埋睇嗰時唔好太用腦，集中望張國榮、夏文汐嘅靚仔靚女樣。咁當然啦，我講嘅嘢未必係絕對嘅，我都好尊重其他人嘅睇法，最尊重嘅就一定係有份參與呢套戲嘅台前幕後，唔知女主角之一嘅夏文汐點睇自己呢套出道作？又有咩內幕嘢可以講？還請大家睇埋另一篇文。
【爛鬼噏Cult】夏文汐覺《烈火青春》結局九唔搭八：唔明點解要死