【降魔的】黃智雯最深刻的靈異故事　去到南非都「撞鬼」？

《降魔的》播映已經差不多1個星期，網民更加罕有地讚套劇「高質」。例如用的士司機做鬼怪劇題材就已經很新鮮。坊間相傳，除了的士司機這個職業容易「撞鬼」之外，其實空姐也屬高危一族。劇中飾演醫生及「魔」的黃智雯，在當上演員之前也當了空姐2年，原來都差啲撞鬼。

黃智雯說：「呢個故事我講起都毛管棟。我以前做空姐，去到南非約翰內斯堡，嗰度係好荒蕪嘅地方。我哋住嘅酒店係好大間，好似度假屋咁㗎。我哋幾個同事都係住隔籬房，即係連埋一齊咁。我哋成程都嘻嘻哈哈好開心咁。但係我仲記得回程機嘅時候，一個男同事就同我講：『其實喺酒店嗰度，我已經想同你講，但係我又唔想嚇親你。』咁我話咩事吖？」

「佢話：『我哋嗰晚食完飯，返到去酒店房嗰陣，我間房啲傢俬全部都撈亂晒⋯』佢話連啲電視機梳化都唔同晒位。但係我間房就咁啱係佢隔籬，所以我都慶辛佢當時冇同我講。如果唔係我一定瞓唔着覺。我諗呢個係我聽過最深刻嘅靈異故事。」