前亞姐陳綺明拍劇叫人幫手讀對白被指擺款感委屈：話我好寸同好囂

前亞姐陳綺明（Betty）今日（28/8）現身大埔亞視總台出席「第35屆亞洲小姐競選全球大賽暨香港區」啟動禮。Betty受訪時表示：「其實今日能夠參與呢個盛事，係令到我諗起以前選美時嘅回憶，當中同咁多唔同嘅佳麗相處，點都會有啲人係會夾啲，亦會有啲人就咁傾得埋。有時喺一大班佳麗企埋影相嘅時候，試過都被人用手批踭，但我個人就比較正面，就唔會諗對方係咪有心，我會同自己講要做好自己先，唔好批評人哋。」

此外，Betty亦透露因個性太過率直，曾因此得罪別人：「我記得完咗選美比賽之後，我就加入咗亞視做節目，之後有套戲搵我拍，因為我個人聽嘢係比睇文字會入腦啲，於是就叫隔離位朋友幫手讀出嚟俾我聽。但後尾我聽到背後有人話我好寸同埋好囂。其實我唔係佢哋咁諗，當時自己年紀比較細，唔識點處理，聽到係有啲唔開心，同埋好委屈。明明我係想做好啲，做快啲，點知出到嚟就有呢個誤會。」