陳凱琳正式宣布封肚唔再生：有3個小朋友我哋覺Ok

陳凱琳（Grace）今日（23/8）現身九龍灣出席家具品牌活動。提到上星期一家人遠赴泰國布吉旅行兼為老公鄭嘉穎慶祝55歲生日，Grace接受《香港01》訪問時表示：「今次我哋去咗嗰度玩咗5日4夜，而今次係我哋第一次一家五口一齊去旅行，呢五日四夜亦都係一個好好嘅體驗，攞咗今次嘅體驗之後，下次再去旅行嘅時候，應該可以再玩耐少少。（有咩驚喜俾老公？）有呀，今次就係所有嘢都為佢安排晒，又唔使出錢，佢淨係出個人就得，見佢都玩得好開心。（聽你講話老公恨生女，會唔會生個B女送俾佢？）我都係講吓咋，而家有3個小朋友我哋覺Ok。（而家宣布封肚？）係，我而家要着啲好緊身嘅裙，證明我冇懷孕嘅，哈哈！」