【每逢大事講故事】奧巴馬又長又譖 最後由主角淪為恐怖片大茄
有研究指，睇恐怖片可以減壓，因為觀眾會將大部分注意力投入劇情，暫時忘記日常生活中的煩惱；緊張過後精神和身體上會有較長時間放鬆，有助釋放壓力。
香港即將舉行特首選舉，香港人日日睇到幾位候選人的新聞，或多或少都有些少壓力，想放鬆下不妨試試睇恐怖片。飛雲有套正嘢推介，恐怖得嚟又老少咸宜，最重要唔使俾錢買飛入場睇，追住《香港01》就可以。
這套戲就是《舊年大選搞乜鬼之共和黨電鋸殺人奧巴馬奪命狂呼死神來了》。
上星期美國總統奧巴馬的告別演說，加上為副總統拜登泡製的自由勳章驚喜，一幕幕溫馨感人的場景，猶如TBB劇集大結局大家一齊BBQ跳起YEAH，簡直想高歌一曲「齊歡唱~」。
不過，今個月20日，特朗普將正式成為美國總統，追開美國大選這台戲的觀眾，可能已經發現，美國人選出特朗普為下任總統，以及選出由共和黨控制的參眾兩院一刻，這套劇早已變調，溫馨場面只是暴風雨前的平靜，溫馨小品已變成驚悚片，呀……呀……媽呀!!!!!!!!!!!!!!!!!!!!
故事回到2014年，當時美國總統奧巴馬領導嘅政府同共和黨勢成水火，好多奧巴馬想推嘅政策，由共和黨控制嘅眾議院都唱反調。奧巴馬喺新一年同內閣政府首次開會，嬲嬲哋就表明立場，話自己係唔會咁輕易讓步。
「我哋唔係得正正喺度，乜都唔使做，等立法去為美國人提供所需嘅幫助…...我會指示各部門，利用所有可行方法去協助中產階層。」
佢仲話：「我有一支筆，有一個電話。」（I've got a pen and I've got a phone.）講明會用支筆嘅力量去繞過唔合作嘅國會，暗示可以行政指令通過法案，處理經濟問題。
唔知點解，飛雲腦內突然間充斥住奧巴馬化身PPAP大叔嘅畫面，一邊扭動副波地一邊唱「♪ ♩ ♫ ♬I have a pen. I have a phone. 呀！行政指令！♪ ♩ ♫ ♬」
奧巴馬好多時都得個講字，但一講到行政指令，佢就坐而起行，當正自己係大明星咁起勢簽名。佢8年間佢簽咗260條行政指令，雖然與其他總統相比其實差唔多，但唔少法案都係極具爭議性，包括醫改、槍管、移民政策等等。
呢個方法咁好使，就好似古代皇上御賜俾包青天嗰把尚方寶劍咁，直頭要攞嚟遇神殺神，遇妖斬妖啦！不過臨別在即嘅奧巴馬，近日卻寄語特朗普，勸佢唔好好似佢咁用咁多行政指令，仲承認：「透過立法程序會好啲，因為難啲推翻。」嘩！由奧巴馬講出呢番說話，真係特別有說服力囉。
奧巴馬與共和黨人唔啱傾都唔係新聞，呢種關係維持咗8年，雙方早已積怨甚深。回顧2013年仲曾經攪到政府因為冇錢而停擺，當時由共和黨控制的眾議院通過法案，將奧巴馬醫療改革計劃延遲一年，慳番啲錢就用嚟做政府運作資金，即係如果共和黨通過預算案，就要推遲醫改。
當時民主黨梗係唔肯過佢，唔鍾意醫改一回事（因為民主黨其實都有人唔鍾意醫改），玩威脅就點都唔得。議案去到民主黨控制嘅參議院被否決，兩黨最被都企硬唔接受對方的要求，所以預算案批唔到，聯邦政府機構冇錢運作，停擺十幾日。後嚟雙方有共識調高債務上限，件事先平息咗。
《紐約時報》專欄作家、諾貝爾經濟學獎得主克魯曼都忍唔住話佢哋小學雞：「世界末日可能就係咁，唔係發生大爆炸，而係純粹鬧交！」
奧巴馬喺任內簽咗200幾個行政指令，當中唔少都係為咗繞過國會而強推的政策。人走茶涼，可以預期奧巴馬離任後，特朗普同共和黨當然唔會俾呢啲具爭議性嘅政策留低，仲唔快手將佢哋連根拔起咩？
各位，過去8年就當發咗場夢啦。
以奧巴馬醫保為例，共和黨人落奧巴馬面真係不遺餘力。當初奧巴馬以行政指令通過醫保法案，好多共和黨人已經唔妥。而家奧巴馬還未正式離任，由共和黨控制的參議院及眾議院已相繼通過預算法案，為國會兩院提供架構，撤銷奧巴馬在2010年推出、引以自豪的醫保制度。
▲「冇嘢可以留低！」（Giphy）
奧巴馬遺留嘅政策，可以撤銷都應該會俾共和黨撤銷，他亦自然由主角，慢慢淪為配角，甚至是劇中必然會死的角色。相反共和黨和特朗普則由被嘲笑、被無視的大茄，一步步登上劇本的核心，退位後嘅奧巴馬只能脆弱無力地抵抗狂魔肆虐。
搞成咁，奧巴馬都有責任。有睇開美國恐怖片，都會知道這類型的影片有幾條黃金定律，其中之一就係，如果個角色懶醒，以為自己好勁，就必然死先。喺美國政壇呢套恐怖片中，奧巴馬因為懶醒已經可以死千千萬萬次。
US News記者卡羅利（James R. Carroll）曾分享一段共和黨元老級人馬、時任參議院少數派領袖麥康奈爾（Mitch McConnell）與奧巴馬幾年前嘅故事。話說數年前卡羅利訪問麥康奈爾，途中奧巴馬打電話俾麥康奈爾，麥康奈爾俾卡羅利留喺辦公室，條件係佢唔可以將對話內容寫出嚟。通電話由一句＂Hello"開始，然後"Goodbye"作結；麥康奈爾在數分鐘對話期間一直面無表情，聲調無變化，而且冇叫過一句「總統先生」，成個氣氛卡羅利形容簡直凍到去咗北極咁。
【專頁‧新聞講故事】國際大事一看就懂！中東美俄東亞 趣味養份兼備
做總統做到奧巴馬咁都幾樣衰，明明總統嘅職責就係團結兩黨，但偏偏佢就攪到兩黨不和，政府又停擺，自己嘅政策仲要被推翻。最慘係唔得人尊重嘛，一句「總統先生」都唔叫。原來政界早有傳，過去8年兩黨之爭搞到政府做唔到嘢，主要係因為兩黨欠缺溝通。
麥康奈爾堅稱自己對事唔對人，你信唔信呀？開會鬧到面紅耳赤，唔通平時可以同你老友鬼鬼？
堅稱自己唔嬲、但講過話唔可以俾奧巴馬連任嘅麥康奈爾話：「好多人問我奧巴馬總統真實係點嘅人，我都講同一樣嘢，佢真人同喺公眾場合一樣，就係班上面會努力，俾大家知道佢係最聰明嗰個學生咁，佢經常居高臨下咁同人講嘢，同白宮的同事或者對全國講話都一樣。」
佢又話：「奧巴馬總統通常喺嚴肅討論政策時，開始都係解釋點解其他人係錯，他曲解你嘅意思之後，就會好熱心咁嘗試拆解人哋嘅論證，驚死你唔知佢幾醒。」
他形容，同總統對話長到怕，相信麥康奈爾嘅感覺直頭好似悟空對住唐憎咁，佢仲話「對付總統，（前眾議院議長）博納出名放低個電話然後同其他人傾嘢；我就唔會喇，我頂多去睇咗一局棒球比賽之嘛。」
▲「係喇係喇至醒係你喇！」（Giphy）
奧巴馬自覺樣衰，喺告別演說中，叫群眾坐低，當時群情洶湧冇人理佢，佢就話：「可見我真係跛腳鴨，冇人跟指令。」引起現場人士大笑；但笑完之後，佢仍然晌演說中提及自己嘅「豐功偉績」，包括擊殺拉登、與古巴復交等等。
剛過去嘅大選中，佢又怪民主黨人唔夠貼地，先會令希拉里輸咗。「民主黨人通常被視為自由派精英、嘆咖啡、政治正確，但離地......我哋要走入社區，去食炸魚薯條、去退伍軍人嘅聚會、同農夫傾計。」佢認為自己就係咁成為總統。
咪先咪先，總統先生，炸魚都有平貴之分嘅，你食嗰啲炸魚係咪貼地嘅炸魚先？
老老實實，總統先生似乎仲未明，係佢過去8年嘅玩法，令民主黨失去咗唔少分數。2008年金融海嘯，的確係佢嘅政策令美國避過更嚴重的經濟崩塌，但佢任內未能檢控引發次按危機同埋金融海嘯嘅大行高層，國內貧富懸殊問題仍然嚴重，就算創造新職位，大部份都是臨時工同埋兼職。
總統先生仲要成日吹噓自己幾叻叻，咁先係趕客囉，搞到希拉里抱恨未能成為首位女總統之餘，民主黨又失咗兩院控制權。
懶叻嘅總統先生仲要怪自己嘅團隊冇做好份工：「我哋嘅政策好正呀，點解你哋唔做好啲去推廣佢？」怪人唔做嘢，唔講係自己政策太理想化，你話，係咪抵死？
做領袖最忌懶醒又唔認錯，仲要推啲責任俾人A字膊，我建議總統先生即刻睇《香港01》嘅職場新聞。
介紹番：
▲W創作社《小人國4》職場卸膊操（Youtube）
恐怖片嘅黃金定律之二，就係猶豫不決嘅人，會死快啲。殺人狂魔晌門外，你仲諗緊要唔要著鞋走佬？咁就整定會死啦！
有人批評奧巴馬喺重要時間未能行駛領美國嘅領導角色，亦有人話佢嘅失敗源於佢嘗試干預一啲其實唔係好關美國事嘅外政……簡單嚟講，就重要嘢唔做，到做嘅時候就一時一樣。
共和黨參議院議員格雷厄姆（Lindsey Graham）就話奧巴馬嘗試審慎，結果變得猶豫不決，諗得太多結果變成弱點。佢以烏克蘭同敍利亞問題為例，話奧巴馬政府唔夠薑制裁普京，明明全世界得美國可以領頭對付普京。
格雷厄姆美國隊長上身嘅想法，認為美國係大佬，係世界警察，全世界等美國拯救，呢種說法各位自行定奪，不過可以肯定嘅係，奧巴馬喺敍利亞問題上的確係彈弓手，一時話出兵，一時又話唔出喇，懶晒係和平使者小白鴿。
美國媒體對於奧巴馬嘅猶豫不決，無咩嘢做到，惟有取笑吓佢。以下呢段短片就係美國媒體眼中的奧巴馬總統 ↓
其實2011年敍利亞爆發內戰，奧巴馬當時已經係美國總統，當初佢話巴沙爾政權必然、也必要倒台，又話過如果巴沙爾對平民用化學武器就係過咗底線喇。Sorry囉，人哋巴沙爾已經用咗化武啦，但奧巴馬好似盲咗睇唔到，咩都冇做，亦冇對反對派提供任何協助，任由普京做大佬晌敍利亞問題上話晒事，結果巴沙爾仍然相安無事，生活愉快。
無可否認奧巴馬係一個理想遠大嘅總統，佢想像嘅公平、和平嘅世界，可以話唔單止美國人，亦係全球人嘅希望。可惜現實係殘酷嘅，做得總統就好似有一大堆殺人狂、喪屍、怪獸追住，奧巴馬keep住好天真好pure咁，可能只適合演《愛回家》。
▲欣宜名曲：「在世間不聲不語有一種愛，柔韌到叫鐵石種出花開~」（Giphy）