【奪命証人．專訪】謝君豪入戲要實在 去半島行樓梯國王「上身」
《奪命証人》已在香港演藝學院歌劇院公演了，連開17場。在邵偉敏設計、大約樓高三四層的佈景裏，燈效透射出金黃色的光，這就是法庭，觀眾於台下親眼目擊一宗發生在一九九零年代中期的謀殺案聆訊，坐在被告欄上的，是謝君豪飾演的馮利樂，某天他突然成為一名富家女子遭殺害的嫌疑犯，所有證供都對他不利，無計可施下只好向秦沛叔飾演的資深大律師羅偉發求救，沒想過馮利樂的太太、劉嘉玲飾演的沈麗娜竟然「手指拗出」，協助控方在庭上指證丈夫。觀乎整套演出，謝君豪大部份時間都散發一種被動而怯懦的神緒，說到關鍵處，總是欲語還休，似有隱衷，不時來回踱步，肢體動作欠自信，略見寒背，毫無威勢。
看着看着，好些觀眾眉頭一皺：今次謝君豪怎麼了，為何他演得那麼「普通」？實情是故事的結局……「唔好呀，梗係唔好劇透啦！」謝君豪在首演（28/7）完場後受訪時，這樣再三叮囑。《雄霸天下》（Becket）亨利二世（King Henry II）的瘋癲、《南海十三郎》江譽鏐的狂傲、《杜老誌》鄒世昌的不羈，都無法在馮利樂身上找到，所以這是謝君豪從演30年來最不似主角的一次，或者說，是他與觀眾對於「他是主角」的想像和期望距離最遠一次，因為他天生主角命。一九八九年，謝君豪在香港演藝學院畢業後，旋即加入香港話劇團，面試時已信心爆棚「坐定粒六」：「因為第二屆（畢業生）只得我一個人去考，其他同學去考中英劇團、電視台或當幕後。」入團半年，即一九九零年二月，謝獲導演鍾景輝（King Sir）相中，在尚阿努依（Jean Anouilh）原著的翻譯劇《雄霸天下》裏首度擔正男主角 ── 瘋瘋癲癲的英國國王亨利二世。「King Sir觀人真係一流！」多年後謝君豪對此仍讚嘆不已。
隨後參演《南海十三郎》（1993）才是命運轉捩點，江譽鏐才情洋溢不可多得，卻因時局轉變、家道中落，變成淪落街頭的瘋乞兒，鬱鬱而終；舞台上，他的狂，他的癲，將其演藝事業推上巔峰，更憑電影版奪得第34屆台灣金馬獎影帝，「謝君豪」的名字獲得更多曝光，亦更多觀眾認識。往後25年，他與師兄黃秋生（第一屆）和師弟潘燦良（第四屆），是少數能夠一直同時跨界參演劇集、電影和舞台劇的香港藝人，他們仨是公認的好戲之人，秋生和阿燦都曾在昔日的專訪中談到如何入戲，然謝君豪好似沒說幾句，我索性以此打開話題，說到某處，他卻拋出一句：「呢個比較複雜㗎喎！」不要緊，我有的是時間，亦深信他的擁躉都有興趣聽多一點，畢竟今時今日資訊氾濫如斯，仍願意花數百元如朝聖般那樣入場看兩三個小時舞台劇的人，而且有意了解演員如何尋找角色，膚淺有限。
專訪攝影及短片拍攝：梁碧玲
場地提供：Dada Bar+Lounge@The Luxe Manor
訪問時間有限，不容許暖場熱身寒暄一番，劈頭便問：「其實你需要幾多時間入戲？」坐在雅致沙發上的謝君豪來不及反應，稍頓，反問：「你意思係搵到嗰個角色嘅感覺啫，下嘛？」我點頭，他繼續：「我點樣搵到呢個角色（需要）嘅感覺，可長可短㗎喎，最短咪即刻囉，但有時候都要慢慢搵，耐的話，可能要一至兩個星期，有啲『唔好彩』嘅，甚至要三四個星期。」年少無知，人生經驗淺，舞台上亦然，所以遇到「唔好彩」的機會率極高，30年前於演藝學院畢業，加入香港話劇團不過半年時間，謝君豪便「走運」了。
關鍵人物是鍾景輝，他將翻譯劇《雄霸天下》裏英國國王亨利二世這個瘋瘋癲癲的主角，交由一位初出茅廬的劇場界新鮮人演繹。謝君豪生於平民家庭，父親是廚師，母親是車衣女工，小時候，謝門一家五口住在彩虹邨，無論出身、地位、經歷，跟歷史上居於城堡裏的安茹帝國（Angevin Empire）統治者， 兩者相差十萬八千里，這個挑戰也實在太難了。「嗰陣時剛剛入行，King Sir搵我做呢個角色，我真係O咗嘴，即係要點呢？我唔知㗎嘛，嗰陣時又冇網，即係搵資料都冇咁容易。」當主角機會難逢，不容有失，謝君豪深明不容易也得做，於是在僅有的人生經驗中，依照「最正路」的常見方法，拿捏角色應有氣質。
「首先你要噒（鑽研、細讀）吓個劇本先啦，要了解吓（角色）嗰樣嘢，亦都要去圖書館搵啲書，同埋搵啲舊片嚟睇，即係希望盡量令自己靠近嗰樣嘢囉。」然而能否說服觀眾，關鍵還看那種貴氣，令演出時更恰如其分，「我哋呢啲草根階層，剛剛畢業，富貴嘢真係比較少接觸，但貴氣呢樣嘢係要自己培養。」為免着龍袍唔似太子，謝君豪決定出「超必」 ── 行樓梯，地點：半島酒店！
去半島喝咖啡 邊行樓梯邊幻想
在那個還未遭受財大氣粗的強國同胞「入侵」、凡事講求舉止談吐優雅的美好時代，半島酒店的大堂茶座（The Lobby），堪稱最近「凡間」的高級蒲點，其氣派世界知名，環視四周，十之有九都是達官貴胄，謝君豪選擇在此讓內櫳呈現出來的建築風格將自己緊緊包圍，吸取「養份」：「冇咩錢，都要嚟飲吓咖啡！」這是1928年落成、糅合新古典主義和簡約古典主義的一級歷史建築，柱狀多、注重裝飾，而柱頭位置、屋簷以至天花都有很多雕刻裝飾，包括知名的Gargoyles（滴水嘴獸），靜靜的坐，呷一口咖啡，演技的「能量值」急升，但謝君豪還嫌未夠，悄悄離座，於那條通往一樓The Verandah（露台餐廳）的兩條對稱樓梯上，來回踱步，「我喺度行上行落，等自己感覺吓呢個咁高尚嘅環境，『下面』啲人全部都係啲蟻民嚟嘅，睇吓自己有冇咁嘅體會，想初步了解一下。」
因為自己有幫襯，所以就算這樣子走來走去，也沒有人溫馨提示他要停下來，「嗰陣時剛出道，就係試過用呢啲方法去體會，除咗半島，我都有去Grand Hyatt（灣仔君悅酒店）嘅Coffee Shop飲咖啡。」言即，年輕時賺錢有限，然而只要是為了建立事業，花多些少也值得，但不會即時有這種感覺。
《雄霸天下》公演後15年，謝君豪已憑《南海十三郎》揚名，躋身一線藝人行列，聲價十倍，於是乎「入戲」的方式再也不是喝杯咖啡那麼簡單，而是當一個短期租客，讓自己融入別人家中。2005年，上海的製作公司開拍內地劇集版《長恨歌》（2006年首播），由關錦鵬監製，劇本改編自王安憶的同名小說，女主角王琦瑤（中年）是張可頤，謝君豪則飾演男主角程士砥，他對王琦瑤的愛意極深，雖三番四次遭對方拒絕，仍不離不棄。程士砥是個上海人，然謝君豪參演前未曾踏足這個大城市，「嗰次係我第一次去上海，事前唔知上海有咩地方，咁我除咗睇書、睇相之外，點都要喺拍之前親身去呢個地方一次。」
演《長恨歌》飛上海短住 見證老一輩多時髦
於是謝君豪在開鏡前大約一個月，跟劇組開出特別要求：「我要租個單位，去嗰度住。」他明言不是要甚麼豪宅洋房，愈地道愈平凡便好，走入尋常百姓家，與鄰居、看更閒談，令自己更似一個上海人，之後又着劇組安排與當地的代表性人物，或者文化專家見面，「總之感受一下嗰種生活係點樣，好有用！」上海人素有穿睡衣落街的習慣，他說自己沒有「入鄉隨俗」，皆因跟故事發生的時代不同；王安憶的《長恨歌》，時空鎖定在上世紀40年代，「當時我最希望了解嘅，係當地人嘅談吐，究竟以前30、40年代嘅十里洋場（原指繁榮之地，放在上海，就是指租界區，即現時的南京路一帶）以前係點樣，佢哋嘅生活形態又係點樣？嗰陣時嘅人，而家（拍劇時）啲人都已經60幾70歲，佢哋仲保留住啲咩特色，咩特質，係畀我見到、畀我感受到？」品味這回事，並不容易察覺，他曾遇見一位老伯，印象深刻。
「嗰個阿伯，七八十歲喇，平日都着西裝，或者冇西裝都會着件恤衫，好骨子，梳到個頭好整齊，好講究，好乾淨，原來以前佢係打棒球，（後生）嗰陣時好時髦㗎！同埋個個人都識跳一兩Part舞，佢哋就係有一種『鍾意玩』嘅態度。」我的天，「時髦」跟「摩登」一樣，兩個辭彙既是形容詞，同樣亦是一種量度有否格調和涵養的標準，生於平庸世代的一輩大概不會明白，因為那是內在的，不是多穿兩件華倫天奴、保羅史密夫、聖羅蘭就會從無變有，我想起潘迪華，更具體是，在王家衛電影世界裏出現的潘迪華。「係，即係我要感受嘅嗰樣嘢係好仔細，如果你唔去當地體驗嘅話，永遠冇辦法從書本上面知道，所以呢個係其中一個方法，會令到自己更加投入角色，但唔係話，你做咗就一定可以立即投入到，係要累積、沉澱，當你累積到一定程度嘅時候，就會用到出嚟。」
游大東其他文章：
月巴氏嘆港產片海報不再精彩 激讚《凶榜》：見嗰兩隻字已覺恐怖
【深宮計．專訪】學徒變酒廊歌王 李龍基：唱一個月可買一層樓！
【Plan B】陳啟泰10年後再拍劇 脫眼鏡演黑幫：呢個仲似我真人！
場景可使人入戲，但能否在演繹上更進一步，還看排練過程，以及舞台上的對手。今次參演《奪命証人》，改編自英國偵探推理小說大師Agatha Christie的原著《Witness for the Prosecution》，毛俊輝身兼翻譯和導演，除了謝君豪，還有《杜老誌》（2015）的舊拍檔劉嘉玲，以及從未試過演出舞台劇的秦沛，用市場學角度，演藝界「三大巨頭」聚首已令人有渴望入場的衝動。訪問時，劇組還未開始圍讀對戲，謝君豪坦言仍未細想如何醞釀情緒，「現階段我唔會Set太多嘢畀自己，因為排戲嘅時候仲有好多空間，唔可以就咁Set咗電腦程式，入面仲有好多同演員同導演嘅互動。」所以話題很順理成章去到他對劉嘉玲和秦沛兩位主要對手，一位是金像影后，一位是老戲骨。
秦沛好戲「偷」不走 讚劉嘉玲沒舞台腔
先說Paul哥吧，從影70年，謝君豪終於有資格講呢句：「細細個就睇佢做戲大」。「我覺得佢每一個角色，都表現得好有力，即係可以做好多唔同類角色嘅一種表現力，有表現力嘅力先得㗎，你做唔同角色都有唔同嘅表現力，你先可以做到嗰種唔同，所以Paul哥係好有表現力，同埋每一個角色，啲感情都係好真，呢個真係好犀利。」戲，他演得好，經驗厚，而且人生閱歷豐富，太多太多值得學習，但謝君豪坦言，能偷到多少，還看自己的悟性有多高。「唔使諗，你想偷咩？係偷唔到，你睇呀，你就會有嘢攞到。」
至於嘉玲姐，這是第二次跟她合演舞台劇了，謝君豪說彼此已有默契，互相信任，能撞出火花，這能夠讓他極速走進角色世界。「我哋係有種，覺得大家可以撞到啲嘢出嚟嘅信任。」她，演技一流，但拍戲屬於可以修改至最好，跟舞台劇場場「直播」場場「新鮮」沒得NG，謝君豪因此更看到這位劇后的優點（她憑《杜》奪第24屆香港舞台劇獎最佳女主角），「我覺得佢有樣嘢好可貴嘅係，佢冇打『舞台腔』！有時可能習慣咗咁樣講對白，咬字故意太清晰，變咗太生硬喇，但佢嘉玲佢冇，好真摯好清新，有時太多係唔好㗎，實牙實齒，太過字正腔圓，而家唔興。」惟謝君豪強調，他並不是指可以𦧲，而是講對白時要生活化。
演《奪命証人》力求細膩 反覆鑽研角色心理
如果有看過謝君豪昔日演出，再看過他在《奪命証人》飾演的嫌疑犯馮利樂，兩者比較後，大概也知道分別所在；對他而言，馮利樂這個角色的心理反應，是今次令他最感過癮的地方，跟平時演出法庭戲，分別太大。「我而家最有興趣嘅就係，想知道我係一個被告，既然我係一個被人話我係殺人兇手嘅一個人，我點樣面對周圍嘅人，包括我嘅律師（秦沛），我嘅老婆，點樣面對公眾？如果你俾人認定你就係兇手，全世界都覺得你係兇手，話你殺人，你點樣同律師講嘢？係一種咩嘅狀態？呢啲係好細微嘅，唔係大開大合，因為我哋平時睇戲做戲，睇到好多法庭（劇情），大把咁樣講：『法官大人我冤枉㗎！』，呢種反應，係咪可以更加細膩啲呢？！」
他說的，是一種自我思考的狀態，「究竟我同呢個律師講嘅，係一個咩嘢細微嘅變化？有幾微妙？你係想佢幫你呀？你呃佢呀？你想保護自己呀，抑或你想搵個人同你傾訴？因為當完全冇人信你嘅時候，唯一會聽你講嘢嘅就係律師。」話語至此，終於明白，為何他對我說：「呢個比較複雜㗎喎！」因為要一個認真懂得演戲的人談演戲，好比書寫學術論文，怎說也說不完。