【逆流大叔】潘燦良增肥演草根大叔：出嚟感覺都幾深水埗阿伯！
來自舞台劇的潘燦良，當年因為HKTV的《來生不做香港人》及《選戰》，而廣被觀眾認識，隨後無論是客串劇集還是電影，多是演專業人士角色。
《逆流大叔》是潘燦良首部飾演基層角色的作品，難得除下西裝，索性去到盡，專登儲番條「士啤呔」演好這個自作多情的大叔。「到底係咪得有錢佬先可以擁有第二春？」
開拍一刻便放縱自己
潘燦良有「劇場王子」之稱，叫得王子當然平時非常注重儀表，今次要他演一個住公屋、安裝寬頻的大叔，有需要「妝扮」下。「其實今次張蚊（美術指導）幫我們設計造型，她完全捕捉到一個大叔的裝扮，試服裝當日，見到啲戲服我都嘩一聲，都幾深水埗阿伯感覺，特別喜歡那件橙色格仔裇衫，好有在屋邨經常見到大叔的狀態。」
服飾幫到你，但大叔身形就要靠自己，中年男士，肚腩是必須的，向來走Fit路線的，要逼自己忍手唔做運動，不忍口放縱去食。「自開拍起，我便容許自己這段時間任意去發福，容許自己身形有個發展空間去切合角色，給予自己一個不用Keep Fit的藉口。其實過程好正，好放縱，最後我的確是肥了6、7磅，到我看電影時見到我跟鎮宇都有個不錯的『支援』（肚腩）時，都幾滿意。」幸好拍攝時有不少扒龍舟場面，同時都消耗不少脂肪，令身形未至於肥得太過份。
潘燦良對角色有一份執著，就連留鬚與否都仔細考慮。「到底這執鬚是否切合到個角色，而又脫離到我演過的作品。原本想兩邊都留一點鬚根，令角色看起來粗獷一點，但後來覺得這樣會令角色過於粗豪，而淑儀這角色未至於有這種粗豪，是不修邊幅得來，帶點小男人那種，所以最後決定用這個造型。」
【逆流大叔】吳鎮宇3個理由搵胡定欣做女主角：「首先要唔驚我」
窮人就冇得追愛？
戲中的黃淑儀，打工仔一名，有頭家要養，婆媳關係惡劣，每日返到屋企就家無寧日，然後見到龍舟教練余香凝，一個青春少艾在面前，加上自我感覺魅力滿瀉，令自己無時無刻想入非非，想去觸踫這個婚外情禁地。
潘燦良︰「其實他沒有想過出軌，只突然有一下想問自己，可唔可以試下呢？如果這個角色是個有錢人，大可以同老婆一句︰『你唔好理我啦，我分一半身家俾你，你走啦？』但黃淑儀不可以，他有身家嗎？真係要拋妻棄子離開間公屋？他有甚麼條件去達成自己第二春才是真愛這個想法？所以當這種階層的人，面對同一感情問題時，劇情上會好好看。」
擋不住誘惑從來都是藉口
雖然面對這份後來的愛，是可存在幻想，但潘燦良都叮囑各位大叔，要量力而為，好自為之。「很多人都講人生有很多誘惑，自己控制不來。其實都是藉口，只是將責任放在別人身上。如果你不給予機會，問題是不會出現的。又如果你跟另一半是穩定，你又清楚知道自己最喜歡的是誰，是不會有機會讓人埋身。將引誘講成第三者賦予你的力量，令成件事合理化，只是你不負責任的講法。」角色的自作多情，都是自己給自己的煩惱，現實中潘燦良是個怕羞內歛的人，更重要是他身邊已找到位最愛。
【逆流大叔】陳詠燊感歎香港影星已中年 「想拍套戲講佢哋自己」