金融海嘯後轉行　LEGO大師獲太太力撐　「寧願你賺唔多但開心」

創業難，平衡家庭與事業更難。
矢志成為大中華區唯一一位LEGO認證大師（LCP）的洪子健（Andy），於2012年一擲過千萬元買入工廠單位，打造「屬於我嘅樂高基地」，更憑一個個巨型LEGO展覽打響名堂。辛苦多年，Andy現在終於可鬆一口氣，做到名利雙收。單是中港兩地及商場的生意訂單，已排到2018年。
證券經紀出身的Andy，年薪曾經過百萬元，其後「瞓身」LEGO事業，過程殊不簡單，背後全賴太太Iki全力支持，她直言︰「你響股票到賺幾多錢都好，壓力咁大都係無意思。我寧願你賺得唔多但做人係開心！」

賢內助走出廚房殺上工作坊

千辛萬苦成為LEGO認證大師，Andy近年密密「接Job」，承包一個又一個商場及博物館展覽，狂砌巨型LEGO雕塑作展覽，得意之作理應不少。

但訪問期間，身負大師之名的Andy卻極力推薦一系列由LEGO製作的馬賽克作品，「全部都係我太太設計。」但見Andy咀角微微上翹，盡是得意之情，「有時我只係有個意念，佢就可以好快畫出嚟，我覺得佢先係藝術家！」

夫妻檔拍住上，背後有段故。原來，近年LEGO界興起用積木砌馬賽克畫，好似2015年時代廣場邀請各方LEGO好手雲集獻技，希望為聖誕檔期的重頭戲「樂高®星球大戰展覽」揮毫贈慶，Andy作為LEGO官方「大師」，不但要全天候監場，更要現場開班教授LEGO製的馬賽克作品，但對於分身乏術、較擅長空間設計及立體創作的他而言，這不啻是個頭疼的問題。

就在此時，Andy想起太太任職家庭主婦前畢竟也是個平面設計師，一理通照計百理明，於是費盡唇舌冧掂老婆，拜託早已金盤洗手的Iki重操故技。「我由細到大都無玩過LEGO嘅，所以佢啲立體創作我真係愛莫能助，只係間中幫佢覆電郵，或者翻譯。佢叫我試下砌（馬賽克），我本身就唔識！不過試試下，又幾得意！咁都幾好呀，唔好浪費咗我啲設計天份嘛，哈哈！」洪太說起來難掩得意之情。

太太人手為作品後期加工

相比起LEGO雕塑的立體呈現方式，LEGO馬賽克更重視平面設計的初衷。皆因早於古希臘時期，古人便懂得以鑲嵌及拼貼技術將石材砌成畫作，強調在平面佈局中製造立體質感，並以豐富的色彩聞名於世。

雖然Andy創辦的樂遵創意公司擁有LEGO的專屬軟件，可以將不同的設計圖「馬賽克化」，但出來的圖樣畢竟只是一個大概，箇中細節，譬如每一點的配色（pantone）仍需人手逐點調教。「個步驟簡直係攞命，譬如個天要好靚，要有漸變色，啲波浪嘅光影折射要有變化，要減低違和感……基本上佢係每一點都要去調過。現時放在朗豪坊Lego Store外面的維港馬賽克畫，就是佢（Iki​）用個半月時間、每日埋首大半日磨出嚟嘅作品。」Andy稱。