【愛．蒲吧】90後Fresh Grad上位做總監 派米、禁毒提升酒吧形象
Bar Pacific 開業17年來，由一間600多平方呎的地下舖搖身一變，成為準備上市的連鎖酒吧集團。但是，隨着年月變遷，集團主席謝熒倩（Eva）承認80後及90後的消費力正逐漸主導市場，為求食正下一波增長動力，Eva更特意將前年才大學畢業的兼職員工陳枳曈（Gloria）升遷為市場總監，大搞「形象工程」，迎接酒吧業的變天。
一切由零開始
23歲就坐上市場總監位置，多少大學畢業生恨也恨不來。Gloria憶述與Bar Pacific的淵源，一切從中學畢業開始說起。「當時等大學放榜，咪搵咗份沖珍珠奶茶嘅工。不過屋企人唔太鍾意，結果幫我搵咗份寫字樓文員，呢個就係我同Bar Pacific的起點。」
Gloria隨後升讀理工大學酒店及旅遊業管理課程，更特意挑選舊東家作為研究對象，結果獲得Eva鼎力幫助。「Eva響我present當日去咗聽，俾返意見同解釋部分細節。我個人係絕對認同佢的理念，所以當我去完芬蘭實習之後，就二話不說加入咗Bar Pacific，由零開始。」
所謂「由零開始」可不是說笑的，皆因在Gloria加入之前，Bar Pacific是從來沒有市場推廣部的。「我好想改變呢一行的形象！有時我哋做耐咗，已經唔清楚年青一代點諗，有機會響度，點都要聽下佢哋意見，試走另一條路。」
新仔雙拳難敵四掌
Gloria到今日仍記得，老闆在她入職第一日便早已預告，認為酒吧業要變天只是遲早的事。「依家啲客叫支Whisky都會問你係日本定蘇格蘭。呢一代人飲酒唔係求醉求開心咁簡單，而係你飲乜、去邊到飲已經代表左你嘅生活品味同態度。」
因此，即使上任後只屬「一人部門」，Gloria仍得肩負起整頓及統一集團形象的重任，而首要面對的難關，就是說服散佈於各大分區的勢力板塊。不過，Bar Pacific一貫以來奉行分區自主政策，各種關於分店營運的策略幾乎全由分區經理決定。而且，這些分區經理大多由紅褲子出身，自開業以來陸續參與東征西討多年，平均經驗至少達到7年或以上，對新來的Gloria而言，說服工作難度不輕。
「我的計劃是將酒店個套帶入酒吧，希望將服務質素盡量統一。其實呢個諗法可融性係好大，絕對唔係截然兩套野。」Gloria解釋。「譬如個客由開門到入嚟行幾多步之內，就要同到佢打招呼，呢一啲細節係酒店業好普遍，但幾間分店始終覺得兩者形式唔同，好難直接比較。」
「不過其實佢哋係好好，大家有個句講個句，得就得，唔得就唔得，直來直往反而令工作更順暢。」她稱。
還原基本步
正所謂山不轉路轉，Gloria眼見執行細節短期內難有大改善，遂改從形象工程着手。上任接近一年半，近期剛好為集團奪得禁毒基金撥款支持，是全港第一間獲得此撥款的夜店。或許你會覺得形象工程不過是表面功夫，可小妮子卻有另一番見解。
「如果要令地區居民對你改觀，其實有好多形象工程都要繼續做，譬如話派米、禁毒。現在已經不再是in-house 閉門搞活動的年代，你要諗盡方法去同地區的人拉上關係，咁樣做先有辦法做得耐，企得住。」Gloria認真回答，「好多改變都係由細微處開始發生，譬如近年多咗女士放工入嚟消遣。好多嘢都係還原基本步——個場夠乾淨、安心的話，自然就多女士入嚟聚，女士多就自然男士都會多。到大家都習慣以後，到時去酒吧就會同食糖水無分別，而唔會再多少覺得你唔正經。」