【職場心靈】糾結將來　想砍掉重練？　一句話知你是否活在當下！

各位讀者大家好，係呢個無希望的年代，我想借呢個平台分享下自己經歷。
小弟今年30歲，本地非三大文科畢業，第一份工月入8K，在傳統媒體做。眾所周知，傳統媒體一早已經係夕陽行業，入到任何一間傳統媒體工作，你會體驗咩叫「世界末日前夕」的感覺。你會見到，早你10年入行的老前輩，就算識幾多嘢，收入都可能不如一個餐廳經理。係裏面，成日都有人Last Day，同事坐埋一齊就係傾 「打算做到幾時？年底？」係真心Sad的環境：冇高收入、冇前景、冇希望。
如是者，我自己都做咗一兩年，走嗰時人工先剛剛過10k，係社會眼中的廢青。

反正唔知做乜好，之後我做咗所有廢青都會做的：Working Holiday去澳洲。

所謂出國十年，老盡少年心。我出國一年，其實都有唔少體會。其中一個重要體會，就係領略到「事在人為」四個字的意思。

係澳洲做過幾份散工，到最後係賣雪糕，但係在頗高級的名牌雪糕店賣，由朝到晚整到無停手，永遠都有人排緊隊，後來我發現原來個老闆都好後生，之前試過幾次創業都無乜作為，最後做咗呢間雪糕店，結果生意大好，粗略估計係印銀紙咁好賺。一個30歲唔到的後生仔，已經賺到好多人十年都未必賺到的收入，同埋請到一大班員工。

第一次體驗到，賺唔賺到錢以外，一個人如果堅持做一件事，甚至幾件事，只要堅持，最終都好可能做到一點成績。 與其怨天怨地，不如認真思考如何做得更好，同埋努力將心裏訂立的目標做出來。

帶着呢份信念，我返來香港後做左幾份工，都係返去老本行，又轉過去Ad Agency，終於輾轉轉到一間外國媒體巨企，從Sales Assistant做起，日日幫班Sales大帝準備Powerpoint、Pitch Deck，買咖啡買飯訂餐廳填Reimbursement form。

曾經，有一排我都好迷茫，經歷事業失速期，升職無望，可能呢啲機會真係永遠輪唔到我，因為我學歷唔夠、英文唔夠好、冇外國背景、冇Connections，曾經以為自己好醒，但原來出到來點都唔夠其他人犀利等等。

心裏盤算着各種可能性：「可能我應該去考紀律部隊，人工又高又穩定」、「可能我可以去試下報國泰的Cadet Pilot Program，做機師又有得周圍飛人工又高」、「可能我應該移民去台灣，砍掉重練，展開新生活。」每日放工時間，只會花好長時間在糾結自己的將來，究竟我適唔適合做我𠵱家做緊的工作？我係咪永遠無機會？究竟我應該做乜？究竟我有咩叻？成日都睇好多資料，關於移民，關於其他行業，嘗試得到短暫的希望。

身邊的朋友，都係比較負面，對所有野都採取一種嫉妒或者憤世嫉俗態度，覺得所有野都唔公平。另外一些人，雖然牌面好好，係十分好的學習對象，則好似好不屑同你做朋友。

有大半年左右真係每日都陷入自我懷疑。

但唔知到邊一日，突然又再想起「事在人為」四個字。突然間，內心有把好有力的聲音話畀自己知：

你冇退路，你冇其他嘢好做，冇其他地方好去，你應該認真做好你𠵱家做緊的事，係要做到最好。

的確，大家都得24小時，點解有D人Achieve到咁多嘢？點解另外咁多人一事無成？係IQ？定係運氣？係自律啊！自律就係，每日大概2至6小時的工餘時間，你會點用？

知道自己英文蝕底，我立志要IELTS提升到8分，每日搭車聽英文Podcast，係認真聽個嘴跟着讀，個腦認真思考Podcast內容。知道學歷同Connections唔夠，報咗某三大的PT Master，學費認真貴，可謂孤注一擲，但個兩年真係用盡自己所有時間同精力，順利畢業而且識到好多好Ambitious志同道合的朋友。

時空流轉多幾年，終於坐正左做正式Sales，主要針對企業方案，一個一個Package賣畀企業，每日都「on the road」，奔波勞碌，Pitch唔停手。條數原本都好細，公司本身對我冇乜期望，只係咁巧合有人走又未搵到其他人做，所以有個位叫我頂上。但好快條數就慢慢Pick up，總算開始儲到自己的客源，而且唔係Hard sell，而係永遠多做一步幫人，而且對產品同市場行情俾所有人更加熟悉，將工作化為自己興趣，時刻有動力做嘢同回答客戶問題。

托賴亦有運氣眷顧，月收入總算突破10萬大關。當然，跑數工肯定唔會穩定，所以唯有更加努力。其實好多事情，確實係「事在人為」的範圍裏面，謀事在人成事在天，但首先你真係要認真為自己的前路思考同打算，敢想敢做拼命做。

回想自己當初的困窘，想同大家講，如果連我咁都有可能去到今日呢個位，大家都一定可以，記住要積極樂觀，記住凡事事在人為，你都一定得。

SJ結語

好勵志，好欣賞呢種「事在人為」的信念，連SJ小編都受啟蒙，可能真係要去讀個MBA！

【原文轉載自StealJobs.com。StealJobs全面透露各行各業人工，工時，晉升前景，以及入行攻略，歡迎匿名提供收入資料。】